Yelemiya 6:1-30
6 Mwe yana yakwe Benjamini utukini ukufuma umu Yelusalemu mukafisame ukutali.
Lizyini ipenga umu Tekoa;Mukozye nu moto wa cimanyililo umu Beti-hakelemu!
Pano intazi iipisye ikufumilila uku katutu.
2 Umwana umwanaci wakwe Zioni waya wa mwanaci umuyembe nupya wino yapololokezya.
3 Ya kacema yaliza ni viteekwa vyao.
Yalapanga matenti ukumuzinguluka.Cila muntu alacemela iviteekwa umu ncende yakwe.
4 “Lekini tuipekanye pakuti tukalwe nawe!
Lekini tukatuke nu kuyamuzanza umusanya pakasi!”
“Kalanda kuli sweswe pano uwanda ukuya umu kusila,Nupya ivinzingwa vya manguzi vikuya vikutalimpilako!”
5 “Lekini tukatuke nu kuyamuzanza usikuTukonone ni mpungu zyakwe izikome.”
6 Pano Yeova wa maumba watalanda ati:
“Komini imiti nu kupangamo ica kuomvya pa kuzanza Yelusalemu.
Yelusalemu u musumba uulinzile ukupingulwa;Pano mwaya sana umutitikizya.
7 Wakwe viivi kwene vino umu cifula mukafuma manzi azuuke,Avino nu mu musumba uu mukafuma iviipe.
Mwaya sana unkalwe nu ononyi;Nkalolamo sile indwala ni vikuko.
8 We Yelusalemu uvwila vino nkukusoka, pano nga utacisile vivyo, ndiza kuli wewe ala insoka sana;Ndakulenga ukusyala umwaula icili consi, impanga umwaula antu.”
9 Yeova wa maumba walanda wati:
“Alwani yalasenda Ina Izlaeli yonsi aasyalako kwati imyangazi ya kusyalikizyako uku cimuti.
Konzolola ikasa lyako nupya kwene wa muntu aakukulula imyangazi.”
10 “A weni wino nimalandako nu kucelula?
A weni aamakutika kuli nene?
Lola! Amatwi yao yayalika icakuti yakufilwa ukuvwa.
Yakasaalula amazwi yakwe Yeova;Yasiyazanzya.
11 Indi nu ukali wakwe Yeova,Nupya intonta ukuusungilila.”
“Pongolwela ukali uwo apa mwana aali umu museo.Pa maumba ya yalumendo atiyakolongana.
Yonsi kwene yalasendwa, kuli kuti umonsi na mamakwe,Aikolo na aakote.
12 Mang’anda yao yalapeelwa uku yantu yauze,Kumwi ni vyalo vyao na ya mama yao.
Pano ndakonzolola ikasa lyane nu kulwisya aikazi ya mu mpanga yii,” avino Yeova walanda.
13 “Ance na aikolo yakakwatila ivintu umu ucenjezi;Ya kasesema na ya simapepo nayo kwene yaya nu ucenjezi.
14 Nupya yakaezya ukupozya ivilonda vya yantu yane ukwaula ukwikako mano, ala yakulanda yakuti,‘Kuli umutende! Kuli umutende!’
Lino kusi umutende.
15 Uzye yakauvwa insonyi pa vintu vya winyi vino yacita?
Awe yasiuvwa insonyi nanti apanono!
Yatamanya nanti avino insonyi zikauvwika!
Nayo kwene yalafwa wakwe vino yauze yafwa.
Yalaapempezyoka lino ndayafulula,” avino Yeova walanda.
16 Yeova walanda wati:
“Imililini pa mampatu ya museo nu kulolekesya.
Uzilizyini pa miseo ya mpiti,Uzyini ukwaya umuseo usuma, nupya mwapitamo,Nupya izanilini ukwa kupuuzila.”
Lelo yakalanda iyati: “Tutalapitamo.”
17 “Nupya nayasontiile alinzi aayanenyile iyati,‘Ikini amano uku ciunda ci penga!’”
Lelo yatiile: “Tusikwikako mano.”
18 “Fwandi, uvwini mwe nko!
Na mwe yantu,Manyini ivilacitikila antu ya mu Yelusalemu.
19 Uvwini mwe yantu ya mu nsi!
Nkuleta intazi pa yantu yaaPa mulandu na vino yakacita,Pano yatisile mano uku mazwi yaneNupya yakanyile masunde yane.”
20 “Vinunkile vino mukaleta ukufuma uku SyebaNu tumiti utununkile tuno mukafumya uku mpanga ya kutali
Vitacindama kuli nene,Nsipokelela malambo inu yonsi aakoca ni vya upe vinu visinzanzya.”
21 Acino Yeova walanda wati:
“Nimaikila antu yaa ivya kupumikako,Nupya yalapumika,Kuli kuti ya isi na ana,Umwinamupalamano na cuzakwe,Nupya yonsi yalalowa.”
22 Yeova walanda nu kuti:
“Antu yalafuma uku mpanga ya ku katutu,Nu luko lwa maka lulafuma uku mpanga izya kutali sana umu nsi.
23 Yalalema maulapwa na masumo.
Yaya nu unkalwe nupya yataluvwa uluse.
Mazwi yao yalaauvwika wa kuuza kwakwe yemba,Nupya yakapitila pa mfwalasi,
Yalatantama wa musilika ali umu ulwi uku kukulwisya, we mwana mwanaci wakwe Zioni.”
24 Tuvwa malyasi pa cintu cii.
Makasa itu yalemala;Malanda yatwizila,Tukucululuka wa mwanaci aali pa kupaapa.
25 Mutaaya uku vyalo,Nupya mutaapita umu museo,Pano alwani yali nu lupanga;Nupya antu yonsi yali ni ntete.
26 We mwana umwanaci uwa yantu yane,Zwala ivyakuzwala vya kulangilamo ulanda nu kukunkuluka umwi twi,
Loosya wa muntu uwatafwilwa umwanakwe umonsi wino wakwata sile wenga, pundisya pa kuloosya,Pano aakaonona aliza pali sweswe umu kupumikizya.
27 “Nakulenga ukuya wa muntu aakaengulula siuva umu yantu yane,Aakalondelezya sana;Ulinzile ukulaikako mano nu kuceeceta vino yakucita.
28 Yonsi kwene yakoma imyenzo,Yakapitana ala yakucita ulwambo.
Yaya wakwe koopa nupya wa cela;Yonsi kwene yakacita iviipe.
29 Imyuwa yatipya.
Pa moto pa kufuma sile imitovwe.
Umuntu akatwalilila ukuombesya pa kwengulula lelo akaicuzya sile,Iviipe sile ivikafumamo.
30 Antu yalaayama ukuti siuva wino yakana,Pano Yeova wayakana.”
