Yelemiya 7:1-34
7 Yaa ali mazwi yano Yeova wanenyile Yelemiya, aakuti:
2 “Yanga ukimilile pa mpongolo ya pa ng’anda yakwe Yeova nu kuma imbila uti, ‘Uvwini mazwi yakwe Yeova mwe yantu ya mu Yuda mwensi mwemuno mukaingilila pa mpongolo zii kuti mukafukamile Yeova.
3 Yeova wa maumba, Leza wakwe Izlaeli walanda wati: “Senukini nu kuzifya imiyele inu, nupya ndamuzumilizya ukwikala umu ncende yii.
4 Mutataila mazwi ya ufi nu kulanda muti, ‘Lii i tempele lyakwe Yeova, i tempele lyakwe Yeova, i tempele lyakwe Yeova!’
5 Pano ndi cakuti mwasenuka nu kuzifya imiyele inu nu kuya nu mulinganya lino mukupingula milandu ya yantu
6 nupya ndi cakuti musikucuzya antu ya ku mpanga yuze, ana ya nsiwa, na ya mukamfwilwa nu kukanazwisya uwazi wa muntu wa kaele umu ncende yii, nupya nga musikupepanga ya leza yauze aangamuletelela,
7 lyene ndaleka ukuti mutwalilile ukwikala umu ncende yii umu mpanga ino napeezile ivikolwe vinu manda pe.”’”
8 “Lelo mwataila umu mazwi ya ufi aatalamwazwa nanti acimwi.
9 Uzye mungaiya, kukoma, kucita ucende, ukulapa ivya ufi, kupeela malambo kuli Baali, nu kulondela ya leza yano mutaamanya,
10 alino lyene mwize pa nkoleelo yane umu ng’anda yii muno izina lyane likacindikilwa nu kulanda muti, ‘Tulapusuka,’ na lino mukacita ivintu vyonsi vii ivya winyi?
11 Uzye ing’anda yii apa kucindikila izina lyane ikuloleka wi cele lya yapuupu kuli mwemwe? Injilolela vino mukucita,” avino Yeova walanda.
12 “‘Lelo yangini uku ncende yane uku Syilo ukwali izina lyane pa kutandika, mukalole vino nacisile uku ncende iiyo pa mulandu ni viipe vino Aina Izlaeli antu yane yacitanga.’
13 Yeova walanda wati, “Lelo mwatwalilila ukucita ivintu vii vyonsi nupya nanti cakuti namuvwanzyanga cila nsita mutuvwanga. Natwalilile ukumwama, lelo mutasukanga.
14 Ndacita uku ng’anda ino mwataila apakacindikilwa izina lyane, nu ku ncende yii ino namupeezile ni vikolwe vinu, wakwe vino nacisile uku Syilo.
15 Ndamuzinga pa manso yane wakwe vino nazinzile aina inu yonsi, kuli kuti amu lupwa lwakwe Efulemu.”
16 “Lelo wemo Yelemiya, utapepela antu yaa. Utaalila nanti ukupepa nanti ukuyapaapatilako kuli nene, pano ntalakuvwa.
17 Uzye usikulola vino yakucita umu misumba ya mu Yuda nu mu miseo ya mu Yelusalemu?
18 Ana yakutiya inkwi, ya isi yakupemba umoto, aci nayo yakupanga umunya pakuti yapange keke uwa kupeela kuli Namwene wi Yulu,* nupya yakwitulwila malambo ya vyakumwa kuli ya leza yauze pakuti yansosye.
19 Yeova walanda wati, ‘Nomba uzye nene ya kusosya?’ Uzye yasikuiletelela sile aineco nu kuizewanya?’
20 Fwandi Yeova Umwene wa Papelapela walanda wati, ‘Lolini! Ndaleta ukali wane ala indi ni cipyu pa ncende yii, pa muntu na pa nyama, pa miti ya mu mpanga na pa vilimwa; ukali wane ulaya wa moto uutangauzimiwe.’
21 “Yeova wa maumba, Leza wa Ina Izlaeli walanda wati, ‘Pa malambo yauze yano mukapeela ikinipo na malambo ya koca nu kuiliila mweineco.
22 Pano pa wanda uno nafumizye ivikolwe vinu umu mpanga ya Ijipti ntalanzile nayo nanti ukuyanena pa malambo ya koca na malambo yauze.
23 Lelo nayanenyile inti: “Mwauvwa ukwi izwi lyane, nani ndaya Leza winu, nupya mulaya antu yane. Mwacita vyonsi vino nkumunena pakuti ivintu vimuzipile.”’
24 Lelo yatuvwile nanti ukukutika; yacitanga sile vino aineco yakulonda, yatwalilile ukucita iviipe nupya yakaipilako sile
25 kufuma pa wanda uno ivikolwe vyao vyafumile umu Ijipti ukufika ndakai. Fwandi natwalilile ukuyatumila aomvi yane yonsi ya kasesema cila wanda nupya pa miku iingi.
26 Lelo yakanyile ukuvwa kuli nene nu kukutika. Nupya yakomizye imyenzo nu kucita iviipe ukucila vino ivikolwe vyao vyacisile!
27 “Ulayanena mazwi yonsi yaa, lelo yatalakuvwa; ulayama lelo yatalakwasuka.
28 Nupya ulayanena uti, ‘Luu ali luko ulwakanyile ukuvwila Yeova Leza wao nupya lwakanyile ukusundwa. Ucisinka utaya muli aliyo nupya yasiulanda napo.’
29 “Pela inyele nu kuzisumba, nupya kasawile ulwimbo lwa kuloosya pa tumyamba, pano Yeova wakana inkulo yii iyamusosya sana nupya alaisya.
30 Yeova walanda nu kuti, ‘Antu ya mu Yuda iyansosya sana.’ Yaleta ivilubi umu ng’anda umukacindikilwa izina lyane pakuti yaikowezye.
31 Yapanga incende zya kupepelapo umu Tofeti mu Mukonko Wakwe Mwana Hinomu,* pakuti akuno yaocela ana yao aonsi na anaci umu moto, icintu cino ntaatazile ndandepo nanti ukwelenganyapo.’
32 “Lelo ne Yeova nalanda nati, ‘Manda yakwiza lino incende yii italaamwa ukuti Tofeti nanti Umukonko Wakwe Mwana Hinomu* lelo ilaamwa ukuti Mukonko wa Kukomelamo. Yalaazikamo antu kufikila incende ice isile.
33 Vitumbi vya yantu yaa vilaya ivyakulya vya vyunyi vya mwi yulu ni vya vilyanyi vya mu mpanga, kutalaya na alavitiinya.
34 Ndalenga ukuti yataasansamuka nu kuzanga, nu kusansamuka kwakwe siwinga na nawinga kutaluvwika umu misumba ya mu Yuda nu mu miseo ya mu Yelusalemu pano impanga ilononwa.’”
Mafutunoti
^ I lumbo lyakwe leza mwanaci wino Aina Izlaeli ya cisanguka yapepanga; nanti limwi leza mwanaci aakapeela uvyazi.
^ Lolini Ulondolozi wa Mazwi, “Gehena.”
^ Lolini Ulondolozi wa Mazwi, “Gehena.”
