Yelemiya 8:1-22
8 Yeova walanda wati: “Pa nsita iiya, mafupa yakwe ya mwene ya mu Yuda na yakwe ya cilolo na yakwe ya simapepo na yakwe ya kasesema na mafupa ya yantu amu Yelusalemu yalaziikulwa umu malindi.
2 Yalayasalanganyizizya ukwi lanzi, uku mwezi nu ku vintu vyonsi ivya mwi yulu vino yaatemilwe, vino yaombelanga, vino yalondelanga nupya vino yalengangako utunguluzi na vino yafukamilanga. Yatalakolonganikwa nanti ukuziikwa. Yalaya umuvundo umu musili.”
3 Yeova wa maumba walanda wati: “Antu ya mu lupwa luu ulwipe aalapusuka yalasoololapo imfwa ukucila umi mu ncende zyonsi zino ndayasalanganyizizyamo.”
4 “Nupya ukayanene uti, ‘Yeova walanda wati:
“Uzye yalapona ukwaula ukuti yakatuke?
Ndi cakuti umwi wawela, uzye nu muze kwene atalawela?
5 U mulandu ci uno antu yaa amu Yelusalemu yatwalilila ukukanaya na ucisinka?
Yaya nu ucenjezi;Nupya yakakana ukuwela.
6 Nisileko mano nupya natwalilile ukukutika, lelo vino yalandanga vitaali ningo.
Kutaali uwalapiile uku viipe, nanti ukuzya ati, ‘I vyani vino incita?’
Yonsi kwene yatwalilile ukucita vino aingi yacitanga wa mfwalasi iikusimula umu ulwi.
7 Inkowa zyamanya insita ino zifwile ukukuukilapo;Vipeele, tumimbi nu tunyi tunono vyamanya insita ino vifwile ukuwelelapo.
Lelo antu yane yene yatamanya upinguzi wakwe Yeova.”’
8 ‘Mungalanda uli muti: “Twakwata mano nupya twamanya masunde yakwe Yeova”?
Pano kalemba akaomvya ica kulembelako uku kulemba sile ivya ufi.
9 Antu ya mano yali ni nsonyi.
Yali ni ntete nupya yalalemwa.
Pano yaakana mazwi yakwe Yeova,Uzye lyene a mano ci yano yaakwata?
10 Fwandi ndapeela aci yao uku yonsi yauze,Ni vyalo vyao kuli yauze;Ance na aikolo yakakwatila ivintu umu ucenjezi;Ya kasesema na ya simapepo nayo kwene yaya nu ucenjezi.
11 Nupya yakaezya ukupozya ivilonda vya yantu yane ukwaula ukwikako mano, ala yakulanda yakuti,“Kuli umutende! Kuli umutende!”
Lino kusi umutende.
12 Uzye yakauvwa insonyi pa vintu vya winyi vino yacita?
Awe yasiuvwa insonyi nanti apanono!
Yatamanya nanti avino insonyi zikauvwika!
Nayo kwene yalafwa wakwe vino yauze yafwa.
Yalaapempezyoka lino ndayafulula,’ avino Yeova walanda.
13 Yeova walanda wati, ‘Lino ndayakolonganika ndayalovya.’
‘Uku myangazi kutalaya ivizao, nu ku misamvu kutalaya masamvu, nupya mafwa yaluuma.
Yalapokwa vino nayapeezile.’”
14 “U mulandu ci uno itwikalila paa?
Lekini tukolongane nu kuya umu misumba iya malinga amuno tukafwile.
Pano Yeova Leza witu alatukoma,Nupya akatupeela manzi umuli poizoni,Pano twayembukila Yeova.
15 Twenekelanga ukuti kulaya umutende, lelo kusi ivisuma ivyacitika,Twalolelanga ukupoziwa, lelo kwaya sile intete!
16 Uku mpanga yakwe Dani kukuvwika icongo ca mfwalasi zya yalwani izikufuteka.
Pa mulandu nu kulila kwa mfwalasiImpanga yonsi ikusunkaana.
Alwani yakaiza nu konona impanga na vyonsi ivyayamo,Kumwi nu musumba na antu aakaikalamo.”
17 “Nkutuma inzoka muli mwemwe,Inzoka zya usungu zino kusi aangacinya,Nupya zilamuluma,” avino Yeova walanda.
18 Ulanda wane utanga usile;Mwenzo wane uli nu ulanda.
19 Kuli umwi aakulenga uwazwilizyo ukufuma uku mpanga ya kutali,Ukufuma umu yantu yane akuti:
“Uzye Yeova ataaya umu Zioni?
Nanti uzye umu Zioni mutaaya umwene?”
“U mulandu ci uno yansosezya ukuomvya ivilubi vyaoNa ya leza aasile sile aku mpanga zyuze?”
20 “Insita ya kuzombola yasila, ni cisanya icisila,Lelo kutaaya uwatupususya!”
21 Nkuvwa uyi pa mulandu ni vilonda vya yantu yane;Indi nu ulanda.
Intete izindema.
22 Uzye umu Gilyadi mutaya basamu?
Nanti umuntu wa kupozya antu?
I cani calenga antu yane yatapoziwa?
