Yelemiya 9:1-26
9 Iyee ndi cakuti umutwe wane wali icifula ca manzi,Na manso yane kafukoka ka minsozi!
Ningaalila umusanya nu usikuPa mulandu na antu yane aakomwa.
2 Ndi cakuti nakweti incende iya kupuuzilapo umu lwanga!
Lyene ningasya antu yane nu kuya ukutali,Pano yonsi kwene aacende,Nupya incenjezi.
3 Yaiteyanya ukubepa kwati ulapwa uno iyatinta uuli umupiipi nu kulasa;Mu mpanga mwaya ufi utupu, mutaaya icisinka.
Yeova walanda wati: “Yakaya yakwipilako sile,Nupya yatiika mano kuli nene.
4 “Mwensi mwacenjela uku inamupalamano inu,Nupya mutataila nanti sile umwina winu.
Pano aina inu yonsi aasikamfutu,Na inamupalamano inu yonsi aalwambo.
5 Cila muntu akabepa umwinamupalamano wakwe,Nupya kusi aakalanda icisinka.
Yasambilizya indimi zyao ukulanda ivya ufi.
Yakaitonsya umu kucita iviipe.
6 Ukaikala na antu ya ucenjezi.
Pa mulandu nu ucenjezi wao yaakana ukumanya nene,” avino Yeova walanda.
7 Fwandi Yeova wa maumba walanda wati:
“Ndayapisya umwi lungu pakuti njezye,Pano i vyani vyuze vino ningacita uku yantu yane?
8 Indimi zyao zyaya wa nceto izikalipisye.
Muntu akalanda mazwi ya mutende uku mwinamupalamano wakwe,Lelo umu mwenzo akamupangila.*
9 Yeova walanda wati: “Uzye ntalinzile ukuyapeela umulandu pa vintu vii?
Uzye ntalinzile ukuleta icilanduzi pa luko lwa musango uuwo?”
10 Ndalila nu kuloosya pa mulandu ni myambaNupya ndasaula inyimbo zya kuloosya pa mulandu nu mulemvwe uwa mu lwanga,Pano vyapya icakuti kutaaya nu wa kupitamo,Musiuvwika nanti ukulila kwa viteekwa.
Ivyunyi vya mwi yulu ni vilyanyi vyutuka; vyapita.
11 Ndalenga Yelusalemu ukuya imitumba ya mawe, umwa kwikala ya nkusa,Nupya ndalenga imisumba iya mu Yuda ukusyala umwaula icili consi, ukwaula uwa kwikalamo.
12 A weni uwaya na mano aangiluka icintu cii?
A weni wino Yeova wanena, pakuti amanyisye?
U mulandu ci uno impanga yononekela?
U mulandu ci uno yapyela wa lwanga,Pakuti kutaya uwa kupitamo?”
13 Yeova waswike ati: “A pa mulandu wakuti yaakana masunde yano nayapeela, nupya yasiyalondela nu kuvwa ukwi izwi lyane.
14 Lelo yaacitanga vino yaalondanga nu kuombela ivilubi vyakwe Baali wakwe vino ivikolwe vyao vyayasambilizye.
15 Fwandi Yeova wa maumba Leza wakwe Izlaeli walanda wati, ‘Ndalenga antu yaa ukulya ivilule, nu kumwa manzi yakwe poizoni.
16 Ndayasalanganyizizya umu nko zino yene ni vikolwe vyao yatamanya; ndayatumila alwani ukufikila yace yayalovye.’
17 Yeova wa maumba walanda wati,‘Elenganyini pali vino vikucitika.
Amini anaci aakuti yaimba inyimbo zya kuloosya,Nupya amini anaci aamanyikisya ukuloosya,
18 Ize zuwa zuwa nu kutwimbila inyimbo zya ulanda,Pakuti minsozi yafume umu manso ituNu kukonkoloka.
19 Mu Zioni mukuvwika mazwi ya ulanda aakuti:
“Iyee mwe vino itononwa!
Vino ituzewana!
Twasya impanga itu, nupya yonona mang’anda itu.”
20 Mwe yanaci, uvwini mazwi yakwe Yeova.
Uvwini vino akulanda.
Sambilizyini ana inu akazyana ulwimbo luu ulwa ulanda,Nupya sambilizyanyini ulwimbo luu ulwa kuloosya.
21 Imfwa yatiingilila umu mawindo itu;Yatiiza umu malinga itu aakomeUmu kusenda ana itu ukufuma umu miseoNa aonsi ukufuma umu ncende umukazanwa sana antu.’
22 Landa uti, ‘Yeova walanda wati:
“Vitumbi vya yantu vilaya wa muvundo umu musili,Wa ngaano zino iyasinza,Izitakweti uwa kuzikolonganika.”’”
23 Yeova walanda wati:
“Uwa mano ataayuvwila pa mano yakwe;Uwa maka ataayuvwila pa maka yakwe;Nu wa vyuma ataayuvwila pa vyuma vyakwe.”
24 “Lelo aakuyuvwa alinzile ukuyuvwila pali cii:
Pa kwiluka nu kumanya ukuti nene YeovaUwaya nu kutemwa kwa cumi, mulinganya nu ulungami umu nsi,Pano ivintu vii avino natemwa,” avino Yeova walanda.
25 Yeova walanda wati: “Manda yakwiza lino ndapingula umuntu wensi uwazembululwa lelo ataazembululwa umu cumi,
26 kuli kuti Aina Ijipti, antu ya mu Yuda, Aina Edomu, Aina Amoni, na Ina Moabu na yonsi aakapela umu mbali ya mitwe aakaikala umu lwanga; pano inko zyonsi zitazembululwa, na amu ng’anda yakwe Izlaeli yonsi yatazembululwa umu cumi.”
Mafutunoti
^ Mu Ciebele: “Akamuteyamila.”
