Yobo 15:1-35
15 Elifazi Umwina Temani waswike ati:
2 Uzye umuntu wa mano angasuka mazwi auwelewele,Nanti uzye angikuta umuza wa ku ufumondaka?
3 Kukalipila na mazwi yatupu u kwa sile sile,Nupya ukulanda kutupu kusiavwa nanti acimwi.
4 Pano watusuula ukutiina Leza,Nupya watuta ukwika mano kuli Leza.
5 Pano ukuluvyanya kwako kukulolekela muli vino ukulanda,Nupya watusoolola imilandile ya mucenjelo.
6 Kanwa kako kakukusinila asi nene foo,Ni milomo yako ikukusinila pa kuluvyanya kwako.
7 Uzye wewe wali umuntu wa kutandikilapo ukuvyalwa,Nanti uzye wewe watandikiilepo ukuyako lino kutatala kwaya imyamba?
8 Uzye ukauvwa uku nkama zyakwe Leza,Nanti uzye ukailola ukuti wewe uli muntu wenga sile uwakwata mano?
9 I vyani vino wemo wamanya vino swemo tutamanya?
I vyani vino wiluka vino swemo tutanga twiluke?
10 Aamvwi na akote tuli nayo pakwene,Aikolo ukucila so.
11 Uzye mazwi aakuteekezya ukufuma kuli Leza yatakulingiine,Nanti mazwi atiyavwangwa umu cikuuku kuli wewe?
12 U mulandu ci uno umwenzo wako ukuituumikila,Nupya umulandu ci uno ukutulolekesya ukali ukali?
13 Pano watusokela Leza,Nupya watufumya mazwi yayo umu kanwa kako.
14 Uzye a weni umwina kufwa angaya umusanguluke,Nanti uwavyalwa uku mwanaci aangaya u mulungami?
15 Wene atataila amuzilo yakwe,Nanti sile a mayulu kuli aliwe yatasanguluka.
16 Uzye lyene cingapela kwi uku muntu wa winyi nupya umukowele,Wino akacita iviipe kwati akumwa manzi?
17 Kutika kuli nene,
Namakunena vino nalola,
18 Ivintu vino aamano yasokolola nupya vino yatafisa,Vino yuvwile uku vikolwe vyao.
19 Kuli aliyo sile akuno impanga yapeezilwe,Nupya kusi umwenyi uwapisile muli aliyo.
20 Umuntu umwipe akacuula manda ya umi wakwe onsi,Nupya umuntu umunkalwe akacuula imyaka yakwe yonsi.
21 Akauvwa iviunda vya kutiinya;Mu nsita ya mutende ivipondo vikamuzanza.
22 Atazumila ukuti alapusuka ukufuma umu mfinzi;Alakomwa uku lupanga.
23 Akalulumba umu kulonda ivyakulya ala akuti vili kwi?
Wamanya ningo ukuti uwanda wa mfinzi iupalama.
24 Masakamika ni ntanzi vikamutiinya;Vikamumala maka kwati u mwene uwataipekanya ukuya umu kuzanza.
25 Pano akakatusya ikasa pakuti alwisye LezaNupya akaezya ukucimvya uwa Maka Yonsi;
26 Pa mulandu ni cilumba akautukila kuli Leza pakuti amulwisya,Akaya ni cisyangu icitikame nupya icikome;
27 Cinso cakwe ciina pa mulandu na mafuta,Ni ntungu zyakwe zyatutumuka pa mulandu na mafuta;
28 Akaikala umu misumba iilononwa,Mu mang’anda umutalikala nanti aumwi,Yano yalasyala i mitumba ya mawe.
29 Atalakwata icuma, nupya ivyuma vyakwe vitalavula,Ni vikwatwa vyakwe vitalasalangana umu mpanga.
30 Atalutuka imfinzi,Alaya kwati u muti uno utumisambo uutuma pa mulandu ni cimbilimbili,Nupya alakomwa uku mupu uukafuma umu kanwa kakwe Leza.
31 Atalinzile ukuibepa nu kutaila umu vintu vya sile sile,Pano icilambu cakwe cilaya i ca sile sile;
32 Cilacitika lino uwanda wakwe utatala wafika,Nupya imisambo yakwe italatala ilembe.
33 Alaya wa mwangazi uukaponya imyangazi iisi,Nupya alaya wa muolivi uukaponya maluwa.
34 Pano asangu aasile sile,Nupya umoto uloca matenti aa yantu aaya na mafisakanwa.
35 Yakakwata inda zya ntazi nupya yakavyala iviiipe,Nupya umunda zyao mwaya ucenjezi.”
