Yobo 19:1-29
19 Yobo waswike ati:
2 “Mulatwalilila ukunsosya ukufika lilaci,Nu kulanda mazwi aakumbavya umwenzo?
3 Pa miku yii 10 imunkalipila;Mutakweti ni nsonyi pali vino mukuncuzya.
4 Ndi cakuti naluvyanya,Ale umulandu wane.
5 Ndi cakuti mwatwalilila ukuituntumbaNu kulanda ukuti cili sile ningo pali vino nkucula,
6 Ale lyene mumanye ukuti, a Leza uwatambepa,Nupya watandemela umwi sumbo lino akaomvya pa kulunga.
7 Nkapunda inti, ‘Owee yancisa!’ lelo kusiya uwakungasuka;Nkaleenga uwazwilizyo, lelo kusiya umulinganya.
8 Wanjalila inzila ni ciumba ca mawe, nupya ntanga mpite;Wancingila imiseo ukuomvya imfinzi.
9 Wanzula ululumbiNupya wazula icisote ca ucindami wane.
10 Akamvunola monsi monsi suka ince indowe;Akatukula upaalilo wane kwati umuti.
11 Akansokela sana,Nupya akandola wa mulwani wakwe.
12 Asilika yakwe yakaizila pamwi nu kunzinguluka,Nupya yakapanga inkambi ukuzinguluka itenti lyane.
13 Aina yane wayazingila ukutali,Nupya antu aamanya yamfutatila.
14 Ya cuza yane apalamisye iyansya,Na antu yano namanyile ningo iyanjilila.
15 Aenyi ya mu ng’anda yane na aomvi yane akazyana;Yakundola wa muntu wino yatamanyile.
16 Nkaama umuomvi wane nomba asingasuka;Nkamupaapata pakuti anguvwile uluse.
17 Mamane watapata umupu wane,Nupya aina yane yano navyalwa nayo iyampata.
18 Nanti sile ana anono yansuula;Nga nakatuka yakanseka.
19 Ya cuza yane yonsi iyampata,Na yano natemilwe iyamfutuka.
20 Mafupa yane iyakambatila uku nkanda nu ku munyefu,Nupya ikusyala sile kwempe ukuti imfwe.
21 Nguvwiliniko uluse, mwe ya cuza yane, nguvwiliniko uluse,Pano ikasa lyakwe Leza ilindema.
22 U mulandu ci uno imutwalilila ukuncuzya wakwe vino Leza akuncuzya,Nu kunzanza ukwaula ukuta?
23 Nga cazifile mazwi yane iyalembwa,Nupya nga cazifile iyalembwa umwi buku!
24 Fwandi nga yalemvilwe api we pakuti iikalilila manda pe,Ukuomvya ica kulembelako ica cela nu mutovwe!
25 Pano imanya ningo ukuti kakulula wane u wa umi;Aliza lyuze nu kwimilila pano nsi.
26 Nanti icakuti inkanda yane yononeka viiLino ncili nu umi ndalola Leza,
27 Ndamulola nemwineco,Ndamulola na manso yane, kusi muze aalandolelako.
Lelo umukasi nkuyuvwa uwa ulanda sana!
28 Pano mukuti, ‘U mu nzila ci muno tukumucuzizya?’
Kwati nene nalenzile ivintu vyonsi vii ukucitika.
29 Mwatiina ulupanga,Pano ulupanga lukaomviwa uku kufulula kacita wa viipe;Mulinzile ukumanya ukuti kwaya kapingula.”
