Yobo 2:1-13
2 Wanda umwi ana aonsi yakwe Leza wa cumi* yaile iimilila pa nkoleelo yakwe Yeova, na Satana kwene waile aimilila pa nkoleelo yakwe Yeova.
2 Lyene Yeova uzizye Satana ati: “Aekwi kuno wafuma?” Satana nawe waswike Yeova ati: “Nafuma nkuzinguluka nu kupitana umu nsi.”
3 Nupya Yeova uzizye Satana ati: “Uzye watulola Yobo umuomvi wane? Kutaaya uwaya wakwe aliwe umu nsi. Wene u mulungami nupya u wa kaele, akatiina Leza nu kutaluka uku viipe. Wene watatwalilila ukuya uwa kaele nanti cakuti ukulonda ukuti mukome apaula umulandu.”
4 Nomba Satana waswike Yeova ati: “Nkanda pa nkanda. Umuntu ali nu kupeela vyonsi vino wakwata pa mulandu nu umi wakwe.
5 Lelo ndi cakuti wakonzolola ikasa nu kumulema api fupa na pa munyefu, amakutuka ala ukulola nako.”
6 Lyene Yeova wanenyile Satana ati: “Namupeela umu minwe yako! Nomba utamukoma sile!”
7 Fwandi Satana wafumile pa nkoleelo yakwe Yeova nu kuyalwalika Yobo ivipute iviipisye kutandikila uku tukando ukufika uku mutwe.
8 Yobo watozile ni cinga ica kuifunyizyako, nupya wikalanga umwi twi.
9 Umuci wamunenyile ati: “Uzye mucili mukutwalilila na ukaele? Tukini Leza nu kufwa!”
10 Lelo Yobo wamunenyile ati: “Ukulanda wa mwanaci iciwelewele. Uzye tulinzile twapokelela sile ivisuma ukufuma kuli Leza wa cumi iviipe vyene foo?” Muli vii vyonsi Yobo ataatazile ayembuke muli vino walanzile.
11 Ya cuza yakwe Yobo yatatu, kuli kuti Elifazi Umwina Temani, Bilidadi Umwina Syuwa, na Zofali Umwina Naamati yuvwile pa ntazi zyonsi izyacitikiile Yobo nupya cila muntu wafumile ukwakwe. Yuvwanine ukuti yakomenkane nu kuya kuli Yobo pakuti yakamukomelezye nu kumuteekezya.
12 Lino yaweni Yobo katalamukila, yatamumanyile. Yatandike ukulila sana nu kulepula ivyakuzwala vyao, nupya yulwile ulukungu mupela iluponela na pa mitwe yao.
13 Lyene iikazile pansi pa manda 7 musanya nu usiku. Kusi uwanenyile Yobo mazwi ali yonsi, pano yaweni ukuti akuvwa sana ukali.
Mafutunoti
^ I mvwango ya Ciebele iikalozya kuli ya malaika yakwe Leza.
