Yobo 33:1-33
33 “Fwandi lyene Yobo, si uvwa uku mazwi yane;Ukutike kuli vyonsi vino nimalanda.
2 Kanwa kane kamalanda;Nu lulimi lwane lumalanda.
3 Mazwi yane yakalanga ulungami wa mwenzo wane,Ni milomo yane ikalanda vino namanya.
4 Leza wampanzile ukuomvya umupasi wakwe,Nupya Uwa Maka Yonsi wampeezile umi ukuomvya umupu wakwe.
5 Ungasuke ndi cakuti ungakwanisya;Ulande vino ukwelenganya; uipokolole uku mulandu wako.
6 Leza wa cumi akandola icili cimwi naawe;Pano nani kwene napanzilwe ukufuma ukwi vu.
7 Fwandi ntakukuvwisya intete,Nupya ntakukutitikizya.
8 Lelo walandanga ala nkuvwako,Natwalilile ukuvwa mazwi yaa,
9 ‘Nene musanguluke pasi vino naluvyanya;Nupya pasi uluyembu luno nacita.
10 Nomba Leza wanzana ni milandu ya kumpatilapo;Nupya akandola wa mulwani.
11 Akaingizya ingazo zyane umu makoli;Nu kundondelezya monsi muno nkupita.’
12 Nomba utalungikanga pa kulanda vivyo, fwandi namakwasuka:
Leza u mukulu ukucila umuntu umwina kufwa.
13 U mulandu ci uno ukuilizyanyizizya pali Aliwe?
Uzye ale a pa mulandu wakuti ataaswike uku mazwi yako yonsi?
14 Pano Leza akalanda nu kucila pa muku onga,Lelo kusi aakakutika,
15 Leza akacita vivyo umu ciloto, kuli kuti umu cilolwa ca usikuLino antu yali umu tuloNupya lino iyalaala pa mabedi yao.
16 Lyene akavimbula matwi yaoNu kuyanena masunde yakwe,
17 Pakuti ataalusye umuntu uku kucita iviipeNu kumucingilila uku cilumba.
18 Leza akamucingilila pakuti atafwa,Nu kucingilila umi wakwe pakuti atakomwa uku lupanga.
19 Umuntu akasundwa lino akuwaikwa pali bediNa lino akuvwa mafupa ya kuwaya,
20 Icakuti akapata ivyakulya,Nupya akakana ni vyakulya ivisuma sana.
21 Umwili wakwe ukasila ala akulola nako,Na mafupa yakwe aatalolekanga yakatandika ukuloleka.
22 Umi wakwe uli umupiipi ni mfwa;Nupya uli umupiipi na yano yakaleta imfwa.
23 Ndi cakuti umwi watumwa kuli aliwe,Wenga sile pa yantu 1,000,Uwa kuyanena umuntu ivilungame,
24 Lyene Leza angamuvwila uluse nu kulanda ati,‘Mupususyini pakuti atafwa!
Pano inzana uwa kumukulula!
25 Si umwili wakwe uzipe ukucila uno wakweti uku wance;Nupya aswilile uku manda yakwe aku wance lino wakweti maka.
26 Alapaapata kuli Leza, nawe alamuvwa,Nupya alalola icinso cakwe Leza ala watasansamukaLeza alalenga umuntu umwinakufwa ukuya umulungami.
27 Muntu wiyo alalanda uku yantu ati‘Nayembuka nupya nanyonganyizye ulungamiLelo ntapokelile cino nalinzile ukupokelela.
28 Leza watampususya uku mfwaNupya nimalolanga uluswepo.’
29 Ica cumi, Leza akacitila umuntu vintu vii vyonsiImiku iingi,
30 Akamufumya ukwi lindi,Pakuti angalola uluswepo lwa umi.
31 Ika mano kuli nene Yobo! Nu kukutika!
Ikala mya, nani nimatwalilila ukulanda.
32 Ndi cakuti ukweti ivya kulanda, ungasuke.
Landa pano nkulonda nsininkizye ukuti wewe mulungami
33 Ndi cakuti utakweti ivya kulanda, ukutike kuli nene;Uwikale mya nani nimakusambilizya mano.”
