Yobo 5:1-27
5 “Ale ama, uzye kuli ali wensi aakukwasuka?
U ku wa muzilo ci wino umautukilako?
2 Icipyu cilakoma umuwelewele,Nu muvimbila ulalenga umuntu aakazumila icizumilezumile ukufwa.
3 Nalola kuno umuwelewele ivintu vikumuzipila wakwe vino umuti ukakwata imisila,Lelo umukupumikizya ing’anda yakwe ikatiipwa.
4 Ana yakwe yasicingililwa,Yakafyengwa pa mpongolo ya musumba ukwaula nu wa kuyapokolola.
5 Umuntu aali ni nzala akalya vino umuwelewele wazombola,Akavifumya nu mu myunga kwene,Nupya ivyuma vino umuwelewele na ana yakwe yakwata vyaya umu citeyo.
6 Pano ivintu viipe visimela umu lukungu,Ni ntazi zisifuma umu musili.
7 Pano umuntu akavyalilwa ukucula,Wakwe vino umoto ukapantoka.
8 Nga nali anene ningalilila kuli Leza,Nu kutwala umulandu kuli Leza,
9 Aakacita ivintu vikalamba nupya vino kusi aanguvwikisya,Alino ni vizungusyo ivitanga vipendwe.
10 Akaleta imvula pano nsiNupya akalenga umu mpanga muye manzi.
11 Akakatusya asulwe,Nupya akakatusya aali nu ulanda pakuti ayapususye.
12 Akavulunganya mapange ya yantu acenjele,Pakuti milimo yao itaaombwa ningo.
13 Akaalema aamano umu ucenjezi wao,Pakuti mapange ya muntu umucenjele yavulunganyiziwe.
14 Yakaaya umu mfinzi umusanya,Nupya yakapampata umusanya pakasi kwati usiku.
15 Akapususya antu uku ndimi izyaya kwati ulupanga,Nupya akapususya apiina uku yantu aamaka,
16 Pakuti antu asuulwe yaye nu upaalilo,Lelo kanwa ka muntu aasi umulungami kakayalwa.
17 Uwa nsansa u muntu wino Leza akasunda;Fwandi utaakana ukusalapula uku kufuma uku wa Maka Yonsi!
18 Pano wene akalenga umuntu ukuvwa ukuwaya, lelo akanyepelela icilonda;Akacisa nomba akapozya uku minwe yakwe kwene.
19 Alakupususya uku ntazi 6,Ni yalenga 7 kwene italakucita iciipe.
20 Mu nsita ya cipowe alakupususya uku mfwaNupya alakupususya uku lupanga mu nsita ya nkondo.
21 Ulacingililwa uku lulimi ulwaya wa mukota,Nupya utalatiina lino ulazanzwa.
22 Ulasansamuka pa nsita ya wononesi na pa nsita ya nzala,Nupya utalatiina ivilyanyi vya mu mpanga.
23 Pano mawe ya mu mpanga yatalakucisa,Nupya ivilyanyi vya mu mpanga vitalakuzanza.
24 Ulamanya ukuti itenti lyako i licingililwe,Nupya kusi icili consi icilaponga lino ulaya umu kuceeceta impanga yako iya mulemvwe.
25 Ulakwata ana aingi,Nupya ana aalafuma muli wewe yalavula kwati isote lya mu mpanga.
26 Ulaya ukwi lindi ala ucili na maka,Wa myanzi ya ngaano zino yakolonganika umu nsita ya kuzombola.
27 Uutulondelezya vyonsi vii, nupya vikwene avino cili.
Uwelenganyepo pa mazwi yaa nu kuyalondela.”
