Yoswa 10:1-43
10 Lino Umwene Adoni-zedeki uwa ku Yelusalemu uvwile sile ukuti Yoswa watapoka umusumba wa Ai nu kuonona, nupya watacita uku musumba wa Ai nu mwene wa uko wakwe vino wacisile uku musumba wa Yeliko nu mwene wa uko alino nu kuti Aina Gibyoni iyapanga umutende na Ina Izlaeli nupya yakwikala nayo,
2 uvwile sana intete pano umusumba wa Gibyoni wali ukalamba wa misumba yuze iikateekwa na ya mwene. Wali ukalamba ukucila nu musumba wa Ai nupya aonsi yonsi alimo yaali asilika.
3 Lyene Adoni-zedeki umwene wa ku Yelusalemu watumile mazwi uku mwene Hoamu uwa ku Hebuloni, ku mwene Pilamu uwa ku Yalamuti, mwene Yafiya uwa ku Lakisyi, nu ku mwene Debili uwa ku Egiloni, aakuti:
4 “Izini mungazwe, pakuti tulwisye Aina Gibyoni pano iyapanga umutende na Yoswa na Ina Izlaeli.”
5 Fwandi ya mwene 5 aa Ina Amoli, kuli kuti umwene wa ku Yelusalemu, mwene wa ku Hebuloni, mwene wa ku Yalamuti, mwene wa ku Lakisyi, nu mwene wa ku Egiloni yakolongine pamwi na asilika yao nupya yapisile nu kuyapanga inkambi pakuti yalwisye Aina Gibyoni.
6 Lyene aonsi aa ku Gibyoni yatumile amazwi kuli Yoswa ku nkambi uku Giligali aakuti: “Mutatulekelezya swe yaomvi inu. Izini zuwa zuwa mutupususye nu kutwazwa! Ya mwene yonsi aa Ina Amoli ukufuma uku ncende iya myamba iyakolongana pakuti yatulwisye.”
7 Fwandi Yoswa wafumile uku Giligali pamwi na onsi yonsi aulwi na asilika ya maka.
8 Lyene Yeova wanenyile Yoswa ati: “Utayatiina pano injapeela umu makasa yako. Kusi nanti aumwi pali aliyo aalakucimvya.”
9 Yoswa waile ayazanza umu kupumikizya pa cisila ca kupita usiku onsi kufuma uku Giligali.
10 Yeova waleesile icimvulunganya pali aliyo, nupya Ina Izlaeli yatandike ukuyakoma icipisye ku Gibyoni, yayakonsile umu museo uwaya uku Beti-holoni nupya yatwalilile ukuyakoma ukufika nu ku Azeka nu ku Makeda.
11 Lino yutukanga ukufuma uku Ina Izlaeli ala yali uku matelo ya ku Beti-holoni, Yeova waleesile imvula iipisye iya mawe iyafisile nu ku Azeka nupya yafwile uku mvula. Yano imvula ya mawe yakomile yavuzile ukucila yano Aina Izlaeli yakomile uku lupanga.
12 Pa nsita kwene iiya ino Yeova wacimvizye Aina Amoli ale na Ina Izlaeli yakulolako, ali lino Yoswa wanenyile Yeova mazwi aakuti:
“Leka ilanzi limilile pa Gibyoni,Nu mwezi wimilile pa mukonko* wa Aijaloni!”
13 Fwandi ilanzi nu mwezi vyatwalilile ukwimilila ukufikila lino Aina Izlaeli yacimvizye alwani yao. Nupya vikwene avino calembwa nu mwi buku lyakwe Yasyali.* Ilanzi limiliile pakasi ki yulu nupya litawile zuwa mupiipi nu wanda onsi.
14 Kutatala kwaya uwanda wakwe uwa lino Yeova uvwile ukwi izwi lya muntu, Yeova walwilanga Ina Izlaeli.
15 Pa cisila Yoswa na Ina Izlaeli yonsi yaswilile uku nkambi ku Giligali.
16 Lelo ya mwene 5 yutwike nu kuyafisama umwi cele uku Makeda.
17 Lyene yamwi yanenyile Yoswa iyati: “Ya mwene 5 iyafisama umwi cele uku Makeda.”
18 Fwandi Yoswa wayanenyile ati: “Kunkulusyini mawe akalamba mucilike pa mulyango wi cele nupya musoolole aonsi aakuti yayalinda.
19 Lelo mwemuno mwasyala mutimilila, mukonke alwani inu nu kuyakoma. Mutaleka ingile umu misumba yao, pano Yeova Leza winu watayapeela umu minwe inu.”
20 Lino Yoswa na Ina Izlaeli yamazile ukukomoola alwani yao, icakuti ikusyala sile yanono autwike iyaya ingila umu misumba ya malinga,
21 antu yaswilile kuli Yoswa ku nkambi ku Makeda ala iyacimvya. Kusi umuntu ali wensi uwatazile alande icili consi pa Ina Izlaeli.
22 Lyene Yoswa watiile: “Fumyini mawe aali pa mulyango wi cele nupya mundetele ya mwene 5 aalimo.”
23 Fwandi yamutwaliile ya mwene 5 aafisime umwi cele, kuli kuti umwene wa ku Yelusalemu, umwene wa ku Hebuloni, umwene wa ku Yalamuti, umwene wa ku Lakisyi, nu mwene wa ku Egiloni.
24 Lino yatwazile ya mwene yayo kuli Yoswa, wamile aonsi yonsi amu Izlaeli, nupya wanenyile akalamba ya yasilika apisile nawe ati: “Izini mulyate ya mwene yaa pa nsingo.” Nayo yaile iyayalyata pa nsingo.
25 Lyene Yoswa wayanenyile ati: “Mutuvwa intete nanti ukutiina. Musipe nupya muye akome, pano vikwene avino Yeova alacita uku yalwani inu yonsi yano mukulwisya.”
26 Lyene Yoswa wayakomile nu kuyakulika pa vimiti 5, nupya yatwalilile ukuya pa vimiti vivyo ukufikila manguzi.
27 Lino ilanzi lyawile Yoswa walanzile ukuti yaisye pa vimiti nu kuyasumbila umwi cele lino yafisimemo. Lyene isile ivimawe vikulu pa mulyango wi cele, nupya apano vyaya ukufika na ndakai.
28 Pa wanda kwene uwa Yoswa waposile umusumba uwa Makeda nu kukoma antu aikalangamo ukuomvya ulupanga. Wakomile umwene kumwi na yonsi aikalangamo ukwaula ukusyamo nanti awenga. Wacisile uku mwene wa ku Makeda wakwe viivi kwene vino wacisile nu ku mwene wa ku Yeliko.
29 Lyene Yoswa kumwi na Ina Izlaeli yonsi yafumile uku Makeda nu kuyalwisya Ina Libina.
30 Nupya Yeova wapeezile na Ina Libina kwene mu makasa ya Ina Izlaeli, yononyile umusumba nu kukoma antu yonsi aikalangamo ukuomvya ulupanga, ukwaula ukusya ali wensi. Fwandi yacisile uku mwene wa ku musumba uwa, wakwe vino yacisile uku mwene uwa Yeliko.
31 Lyene Yoswa pamwi na Ina Izlaeli yonsi yafumile uku Libina nu kuya uku Lakisyi nupya yaile iyapanga inkambi kuuku kwene.
32 Yeova wapeezile umusumba uwa Lakisyi mu minwe ya Ina Izlaeli, nayo yauposile pa wanda wakwe ciili. Yaononyile nu kukoma antu yonsi aikalangamo ukuomvya ulupanga, wakwe vino yacisile uku musumba wa Libina.
33 Lyene Holamu umwene wa ku Gezeli waile umu kwazwilizya Lakisyi, lelo Yoswa wamukomile kumwi na antu yakwe icakuti kutaali uwapuswike.
34 Lyene Yoswa pamwi na Ina Izlaeli yonsi yafumile uku Lakisyi nu kuya ku Egiloni nupya yaile iyapanga inkambi nu kulwisya umusumba wa Egiloni.
35 Pa wanda kwene uwa yaposile umusumba. Nupya yakomile antu yonsi amu musumba ukuomvya ulupanga, wakwe vino yacisile uku musumba wa Lakisyi.
36 Lyene Yoswa kumwi na Ina Izlaeli yonsi yafumile uku Egiloni iyaya uku musumba uwa Hebuloni nu kuyaulwisya.
37 Yaposile umusumba nu kuonona kumwi ni mizi iyalimo, nupya yakomile umwene na antu yonsi amu musumba ukuomvya ulupanga ukwaula ukusyamo ali wensi. Wakwe viivi kwene vino wacisile uku Egiloni, ononyile umusumba nu kukoma antu yonsi aikalangamo.
38 Nu mu kusyalikizya Yoswa kumwi na Ina Izlaeli yonsi yaile uku musumba wa Debili nu kuyaulwisya.
39 Waposile umusumba ni mizi yonsi iyalimo, nupya wakomile umwene na antu yonsi amu musumba ukuomvya ulupanga ukwaula ukusyamo ali wensi. Vino wacisile uku musumba wa Hebuloni nu mwene wa uko nu musumba wa Libina nu mwene wa uko, avino wacisile nu ku musumba wa Debili nu mwene wa uko.
40 Yoswa wacimvizye incende yonsi iya myamba, musumba wa Negebu, nu musumba wa Syefela, ni misumba iyayeliile ukusuluke kumwi na ya mwene yonsi aaku misumba iiyo ukwaula ukusyapo ali wensi, ononyile ivya umi vyonsi wakwe viivi kwene vino Yeova Leza wa Ina Izlaeli walanzile.
41 Yoswa wayacimvizye ukufuma uku Kadesyi-banea kufika nu ku Gaza nu mu ncende yonsi ya Gosyeni kuyafika nu ku Gibyoni.
42 Wacimvizye ya mwene yaa yonsi kumwi ni mpanga zyao pa nsita ili imwi, pa mulandu wakuti Yeova Leza wa Ina Izlaeli u walwilanga antu yakwe.
43 Lyene Yoswa pamwi na Ina Izlaeli yonsi yaswilile uku nkambi ku Giligali.
