Yoswa 11:1-23
11 Lino Yabini umwene wa ku Hazoli uvwile sile ivyacitike, watumile mazwi kuli Yobabu umwene wa ku Madoni, ku mwene wa ku Syimuloni, ku mwene wa ku Akisyafu,
2 kuli ya mwene ya ku katutu ka ncende ya myamba, ku ya mu lwanga* lwa ku kaeya ka Kineleti, ku ya ku Syefela, nu ku ya ku milundu ya ku uwondaka wa ku Doli,
3 ku Ina Kenani aku ufumondaka nu ku uwondaka, ku Ina Amoli, ku Ina Hiti, ku Ina Pelizi, ku Ina Yebusi aa ku ncende zya myamba, nu ku Ina Hivi amwisika lya mwamba wa Helimoni ku ncende ya Mizipa.
4 Nayo izile na asilika yao yonsi, yaali aingi sana wa mucanga uwaya umu mbali yakwe yemba, kumwi ni mfwalasi zyao izingi sana na maceleta ya nkondo.
5 Ya mwene yonsi yaa yuvwanyile ukuti yakomenkane, nupya izile nu kupanga inkambi umupiipi nu luzi lwa Melomu pakuti yalwisye Aina Izlaeli.
6 Yeova wanenyile Yoswa ati: “Utayatiina pano mutondo pa nsita ikwene, ndayapeela uku Ina Izlaeli pakuti yace yayakome. Muce mulemalike imfwalasi zyao, na maceleta yao ankondo muce muyoce umu moto.”
7 Lyene Yoswa kumwi na asilika yonsi yaile iyazanza alwani yao umu kupumikizya mupiipi nu luzi lwa Melomu.
8 Yeova wayapeezile umu makasa ya Ina Izlaeli nayo yayacimvizye nu kuyakonka ukufika nu ku musumba ukalamba uwa Sidoni nu ku Misilefoti-maimu alino nu ku ufumondaka wa mukonko wa ku Mizipa, nupya yayakomile ukwaula ukusya nanti awenga.
9 Yoswa wacisile kuli aliyo wakwe viivi kwene vino Yeova wamunenyile; walemalike imfwalasi zyao nu koca maceleta yao ankondo umu moto.
10 Nupya Yoswa waswilile nu kuyapoka umusumba wa Hazoli, wakomile nu mwene wa mu musumba uwo ku lupanga, pano Hazoli wali ali musumba ukalamba pa mawene yonsi yaa.
11 Yakomile antu yonsi uku lupanga kusi nanti aumwi uwapuswike, lyene yosile umusumba wa Hazoli.
12 Yoswa waposile imisumba yakwe ya mwene yonsi nu kucimvya ya mwene ya mu misumba iiyo uku lupanga. Wayakomile ukulingana na viivi kwene vino Mose umuomvi wakwe Yeova walanzile.
13 Lelo Aina Izlaeli yatoosile umusumba uli onsi uwali pa mulundu suka sile umusumba wa Hazoli ali uno Yoswa osile.
14 Aina Izlaeli yasenzile vyonsi ivyali umu misumba yii kumwi ni viteekwa. Lelo yakomile antu yonsi uku lupanga kufikila iyayalovya. Yataasilemo nanti aumwi.
15 Wakwe viivi kwene vino Yeova wanenyile Mose umuomvi wakwe, avino na Mose wanenyile Yoswa, nawe vivyo kwene avino wacisile. Kutaali nanti acimwi cino atacisile pali vyonsi vino Yeova wanenyile Mose.
16 Yoswa wacimvizye impanga yonsi yii, ncende ya myamba, mpanga yonsi iya Negebu, mpanga yonsi ya Gosyeni, Syefela, mpanga ya Alaba, ncende ya myamba iya Ina Izlaeli ni ncende zya mwisika lya myamba iiyo,
17 ukufuma uku mwamba wa Halaki uwafika uku Seili, nu ku Baali-gadi ku mukonko wa Lebanoni mwisika lya mwamba wa Helimoni, nupya walemile ya mwene yonsi amu misumba iiyo ayacimvya alino nu kuyakoma.
18 Yoswa walwile na ya mwene yaa yonsi pa nsita itali.
19 Kusi umusumba uli onsi uwapanzile upangano wa mutende na Ina Izlaeli suka sile Aina Hivi aikalanga umu Gibyoni. Yacimvizye imisumba yonsi iyasyala umu nkondo.
20 Yeova uwalesile ukuti yakome imyenzo acino yaalwilile na Ina Izlaeli pakuti yakomwe ukwaula uluse. Yayalovizye wakwe viivi kwene vino Yeova wanenyile Mose.
21 Pa nsita iiya Yoswa walovizye Aina Anaki kufuma uku ncende ya myamba ku Hebuloni, ku Debili, ku Anabu nu ku ncende yonsi iya myamba iya Yuda nu ku ncende yonsi iya myamba iya Ina Izlaeli. Yoswa wayononyile yonsi kumwi ni misumba yao.
22 Kutaali Aina Anaki ali yonsi asyazile umu mpanga ya Ina Izlaeli suka sile uku Gaza, ku Gati, nu ku Asyidodi.
23 Fwandi Yoswa waposile impanga yonsi wakwe viivi kwene vino Yeova walavile Mose, nupya Yoswa waipeezile uku Ina Izlaeli nu kuyankanya ukulingana ni mitundu yao. Nupya umu mpanga mutaatazile muye inkondo.
Mafutunoti
^ Nanti “Alaba.”
