Yoswa 13:1-33
13 Lyene walanga Yoswa atakota nupya wali ni myaka iingi sana. Fwandi Yeova wamunenyile ati: “Watukota nupya uli ni myaka iingi sana; lelo kucili impanga ikalamba iitatala yapokwa.
2 Impanga iciliko aeyi: ncende yonsi ya Ina Filisti ni ncende yonsi ya Ina Gesyuli
3 (kufuma uku luzi lwa Naelo, kuli kuti ku ufumondaka wa mpanga ya Ijipti kufika uku katutu ka mupaka wa Ekiloni, mpanga ino yaali iya Ina Kenani) kumwi na yakwe ya mwene 5 aa Ina Filisti, kuli kuti Aina Gaza, Aina Asyidodi, Aina Asyikeloni, Aina Gati, na Ina Ekiloni; mpanga ya Avimu ku kaeya,
4 mpanga yonsi ya Ina Kenani, musumba wa Meyala uwali uwa Ina Sidoni, kufika nu ku Afeki nu ku mupaka wa Ina Amoli;
5 mpanga ya Ina Gebali, ni mpanga yonsi ya Lebanoni lwa ku ufumondaka, ukufuma uku Baali-gadi umwisika lya Mwamba wa Helimoni, nu kufika uku Lebo-hamati;
6 incende yonsi ya myamba ukufuma uku Lebanoni kufika uku Misilefoti-maimu; kumwi ni ncende yonsi ya Ina Sidoni. Antu yonsi aakaikala umu ncende zizyo ndayazinga ala na Ina Izlaeli yakulolako. Ulinzile sile ukupeela impanga iiyo uku Ina Izlaeli wakwe vino nakunenyile.
7 Lyene ulinzile ukwankanya impanga iiyo uku mitundu 9, na afu wa mutundu wakwe Manase.”
8 Afu muze uwa mutundu wakwe Manase, mutundu wakwe Lubeni nu mutundu wakwe Gadi yatozile impanga yao ino Mose wayapeezile ku ufumondaka wa Luzi Lwa Yodani wakwe viivi kwene vino Mose umuomvi wakwe Yeova wayapeezile:
9 kufuma uku ncende ya Aloeli iyaya uku mpela ya mukonko wa Alinoni, nu musumba uwaya pakasi ka mukonko, alino ni ncende itambalale iya Medeba kufika nu ku Diboni;
10 ni misumba yonsi yakwe Sihoni umwene wa Ina Amoli, uwateekanga umu Hesyiboni kufika nu ku mupaka wa Ina Amoni;
11 alino na Gilyadi ni ncende ya Ina Gesyuli ni ya Ina Maakati ni ncende yonsi ya Mwamba wa Helimoni ni ncende yonsi ya Ina Basyani kufika nu ku Saleka;
12 ncende yonsi ino Ogi uwa ku Basyani wateekanga uwateesile umu Asyiteloti nu mu Edilei. (Wali pali yano yasyalikizyeko mu Ina Lefaimu.) Mose wayacimvizye nu kuyazinga.
13 Lelo Aina Izlaeli yataazinzile Aina Gesyuli na Ina Maakati, pano Aina Gesyuli na Ina Maakati yakaikala umu Izlaeli kufika na ndakai.
14 Amu mutundu wa Ina Levi sile ali yano atapeezile impanga. Malambo ya koca aapeelwanga kuli Yeova Leza wa Ina Izlaeli yaali ali upyanyi wao, wakwe viivi kwene vino wayalavile.
15 Lyene Mose wapeezile impanga ku ya mutundu wakwe Lubeni kulingana ni ndupwa zyao,
16 ni ncende yao yatandikiile uku Aloeli, incende iyaya uku mpela ya mukonko wa Alinoni, nu musumba uwaya pakasi ka mukonko, ni ncende yonsi itambalale iyaya lwa ku Medeba;
17 Hesyiboni ni mizi yonsi iyali uku ncende itambalale, Diboni, Bamoti-baali, Beti-baali-meoni,
18 Yahazi, Kedemoti, Mefaati,
19 Kilyataimu, Sibima, ni ncende ya Zeleti-syaali iyaya pa mwamba uwaya umupiipi nu mukonko,
20 Beti-peoli, ncende isuluke iya Pisiga, Beti-yesyimoti,
21 misumba yonsi iyali uku ncende itambalale, ni misumba yonsi ino Sihoni umwene uwa Ina Amoli wateekanga, uwateesile umu Hesyiboni. Mose wamucimvizye kumwi ni ntunguluzi zya Ina Midyani, kuli kuti Evi, Lekemu, Zuli, Huli, na Leba, alino na ya mwene yano Sihoni watungululanga.
22 Balamu umwana umonsi wakwe Beoli kasapola, nawe kwene wali pali yano Aina Izlaeli yakomile ukuomvya ulupanga.
23 Mupaka wa mutundu wakwe Lubeni wali Uluzi Lwa Yodani; nupya iiyo kwene ali ncende ino umutundu wakwe Lubeni wapeezilwe pamwi ni ndupwa zyao, kwikako ni misumba ni mizi iyalimo.
24 Nupya Mose wapeezile impanga ku ya mu mutundu wakwe Gadi kulingana ni ndupwa zyao,
25 nupya impanga yao yali a Yazeli, misumba yonsi ya mu Gilyadi, na afu wa mpanga ya Ina Amoni kufika nu ku Aloeli musumba uwalozyanya na Laba;
26 nu kufuma uku Hesyiboni kufika uku Lamati-mizipa nu ku Betonimu, alino nu kufuma uku Mahanaimu kufika uku mupaka wa Debili;
27 ni ncende iyayela uku mukonko, ku Beti-halani, ku Beti-nimula, ku Sukoti nu ku Zafoni, alino ni ncende yonsi ino Sihoni umwene wa ku Hesyiboni wateekanga, nupya Uluzi Lwa Yodani ulwali umupaka, kufuma uku mpela yakwe Yemba wa Kineleti* ku ufumondaka wa Luzi Lwa Yodani.
28 Ikwene iyali ali mpanga ya mutundu wakwe Gadi kulingana ni ndupwa zyao, ukwikako ni misumba ni mizi iyalimo.
29 Nupya Mose wapeezile impanga kuli afu wa mutundu wakwe Manase kulingana ni ndupwa zyao.
30 Nupya incende yao yafumilile uku Mahanaimu kumwi ni ncende yonsi ya Basyani, ni ncende yonsi ino Ogi umwene wa ku Basyani wateekanga, alino ni mizi yonsi yakwe Jaili iyali umu Basyani, mizi yonsi pamwi yali 60.
31 Nupya afu wa mpanga ya Gilyadi ni misumba iili ino Ogi umwene wa ku Basyani wateekanga, kuli kuti musumba wa Asyiteloti nu wa Edilei, yapeezilwe kuli afu wakwe ya mwana Makili mwana Manase ukulingana ni ndupwa zyao.
32 Ikwene ali mpanga ino Mose wayapeezile mu lwanga lwa Moabu, ku mbalama ya Luzi Lwa Yodani ku ufumondaka wa Yeliko.
33 Lelo Mose atapeezile impanga ku ya mutundu wakwe Levi. Yeova Leza wa Ina Izlaeli wali ali upyanyi wao wakwe vino wayalavile.
Mafutunoti
^ Kuli kuti Yemba wa Genesaleti, nanti Yemba wa Galili.
