Yoswa 14:1-15
14 Aina Izlaeli yapeezilwe impanga umu Kenani, Elieza simapepo na Yoswa mwana Nuni alino ni ntunguluzi zya mitundu ya Ina Izlaeli aliyo yayankinye impanga.
2 Pa kwankanya impanga ku mitundu 9 na afu, yapendwile wakwe viivi kwene vino Yeova walanzile ukupitila muli Mose.
3 Mose wapeezile impanga uku mitundu iili na afu ku lusansa luze* ulwa Luzi Lwa Yodani, lelo Aina Levi yene ataayapeezile impanga.
4 Amu lupwa lwakwe Jozefu yapendwanga ukuti imitundu iili, kuli kuti umutundu wakwe Manase na wakwe Efulemu; nupya yataapeezile impanga uku Ina Levi suka sile imisumba ya kwikalamo ni ncende iya mulemvwe iya kucemelamo iviteekwa vyao.
5 Fwandi Aina Izlaeli yankinye impanga kulingana na vino Yeova wanenyile Mose.
6 Lyene aonsi yamwi amu mutundu wakwe Yuda yaile kuli Yoswa umu Giligali, nupya Kalebu mwana Yefune umwina Kenizi wanenyile Yoswa ati: “Wamanya ningo vino Yeova wanenyile Mose umuomvi wakwe Leza wa cumi pali wewe nani uku Kadesyi-banea.
7 Nali ni myaka 40 lino Mose umuomvi wakwe Yeova wantumile ukufuma uku Kadesyi-banea ukuya umu kuceeceta impanga, nupya nawezile ni lyasi ilya cumi.
8 Nanti icakuti aina yane yano napisile nayo yalenzile antu yuvwe sana intete, nemo nalondiile Yeova Leza wane nu mwenzo onsi.
9 Mose walafile kuli nene uwanda uwa ati: ‘Impanga ino walyasilemo ilaya iyako ni ya yana yako manda pe, pano walondiile Yeova Leza wane nu mwenzo onsi.’
10 Yeova waleka ukuti inje nu umi wakwe viivi kwene vino walavile, nupya ipapita imyaka 45 ukufuma pano Yeova walayile Mose ulayo uu ala Aina Izlaeli yali umu lwanga; na ndakai ncili nu umi nupya indi ni myaka 85.
11 Nupya ndakai indi na maka wakwe viivi kwene vino nali uwanda uno Mose wantumile. Ncili na maka ya kuila uku nkondo nu kuomba imilimo yuze wakwe viivi kwene vino nali.
12 Acino mpeele incende yii iya myamba ino Yeova wandavile uwanda uwa. Nanti icakuti uvwile ukuti umu ncende iiya mwaya Aina Anaki nu kuti imisumba yao iikalamba nupya yacingililwa na malinga, Yeova alaya nani, nupya ndayazinga wakwe viivi kwene vino Yeova walavile.”
13 Fwandi Yoswa wapaazile Kalebu mwana Yefune nu kumupeela umusumba wa Hebuloni kuti uye uwakwe.
14 Ali mulandu uno umusumba wa Hebuloni wayela uwakwe Kalebu mwana Yefune umwina Kenizi ukufika na ndakai, pano walondiile Yeova Leza wa Ina Izlaeli nu mwenzo onsi.
15 Mpiti izina lya musumba wa Hebuloni lyali a Kilyati-aba (Aba wali umonsi umucindame sana umu Ina Anaki). Nupya umu mpanga mutaatazile muye inkondo.
Mafutunoti
^ Kuli kuti uku ufumondaka.
