Yoswa 16:1-10
16 Nupya impanga ino yapeezile uku ya mu lupwa lwakwe Jozefu ukulingana na vino yapendozile, yafumilile uku Luzi Lwa Yodani uku Yeliko iya ifika uku luzi ulwayeliile uku ufumondaka wa musumba wa Yeliko, yapisile umu lwanga iya ipita umu Yeliko, iya ifika uku ncende ya myamba iyayeliile uku Betele.
2 Yafumilile uku ncende ya Betele iyali umupiipi nu musumba wa Lazi alino iya ifika uku mupaka wa Ina Aliki uku Ataloti,
3 lyene yaile ipita uku uwondaka wa mupaka wa Ina Yafuleti, iya ifika uku mupaka uwayeliile ukwisika lya musumba wa Beti-holoni na Gezeli alino iya ipelela kuli yemba.
4 Fwandi amu lupwa lwakwe Jozefu, Manase na Efulemu yapeezilwe impanga.
5 Umupaka uwapeezilwe uku ya mu lupwa lwakwe Efulemu ukulingana ni ndupwa zyao aewu: uku ufumondaka umupaka wali a Ataloti-adali kufika ku musumba wa Beti-holoni ukupela,
6 nupya watwalilile ukufika na kuli yemba. Umusumba wa Mikimetati wayeliile uku katutu, nupya umupaka waile iuzinguluka uku ufumondaka wa Taanati-shilo iuya iupita nu ku ufumondaka wa ncende ya Yanowa.
7 Lyene wafumile uku Yanowa iupita uku Ataloti nu ku Naala iuya iufika nu ku Yeliko, iutwalilila ukuyafika nu ku Yodani.
8 Umupaka wafumile uku Tapua iuya iufika uku uwondaka wa mukonko wa Kana, nupya wapelezile kuli yemba. Yii ali mpanga ino yapeezile uku ya mu mutundu wakwe Efulemu ukulingana ni ndupwa zyao;
9 kumwi ni misumba yonsi ni mizi ino yakweti umu mpanga yakwe ya mwana Manase.
10 Lelo yataazinzile Aina Kenani aikalanga umu Gezeli, fwandi Aina Kenani yatwalilile ukwikala na Aina Efulemu nupya aazya ukufika na ndakai.
