Yoswa 17:1-18
17 Lyene icipendwilo caponiile pa mutundu wakwe Manase pa mulandu wakuti wali iyeli lyakwe Jozefu. Vino Makili iyeli lyakwe Manase nupya isi wakwe Gilyadi wali umusilika, wapeezilwe impanga ya Gilyadi ni ya Basyani.
2 Nupya icipendwilo caponiile pa ya mu mutundu wakwe Manase yonsi asyala kulingana ni ndupwa zyao, kuli kuti ya mwana Abi-eza, ya mwana Heleki, ya mwana Asilieli, ya mwana Syekemu, ya mwana Hefeli na ya mwana Syemida. Yakwene ali yonsi ya mu mutundu wakwe Manase mwana Jozefu kulingana ni ndupwa zyao.
3 Lelo Zelofeadi mwana Hefeli, mwana Gilyadi, mwana Makili, umwana wakwe Manase ataakweti ana aonsi, wakweti sile akazyana, nupya mazina ya yana yakwe aeya: Maala, Nowa, Hogila, Milika na Tiliza.
4 Fwandi yaile iyanena Elieza simapepo, Yoswa mwana Nuni ni ntunguluzi iyati: “Yeova u wanenyile Mose ukuti atupeele impanga pamwi na ina itu.” Fwandi yapeezilwe impanga pamwi na ina yakwe isi kulingana na vino Yeova walanzile.
5 Kulunda pa mpanga iya Gilyadi ni ya Basyani, amu mutundu wakwe Manase yapeezilwe imisumba nayuze 10 iyayeliile uku lusansa luze* ulwa Luzi Lwa Yodani,
6 pano ana anaci yakwe Manase yapeezilwe impanga pamwi na ana yakwe aonsi, nupya amu mutundu wakwe Manase asyala yapeezilwe impanga iya Gilyadi.
7 Nupya umupaka wakwe Manase wafumile uku Asyeli kufika uku ncende ya Mikimetati, iyalozyanya nu musumba wa Syekemu, nupya watwalilile ukuya uku kaeya kufika uku mpanga kuno antu aku Eni-Tapua yakaikala.
8 Impanga ya Tapua yapeezilwe kuli Manase, lelo umusumba wa Tapua uwali pa mupaka wakwe Manase, wapeezilwe uku ya mu mutundu wakwe Efulemu.
9 Nupya umupaka waile iufika uku kaeya ka mukonko uwa Kana. Misumba imwi yakwe Efulemu yayeliile umu ncende yakwe Manase, nupya umupaka wakwe Manase wayeliile uku katutu ka mukonko kufika na kuli Yemba.
10 Impanga ya ku kaeya yaali iyakwe Efulemu, iya ku katutu nayo yaali iyakwe Manase, yemba wali ali mupaka wakwe Manase, nupya uku katutu wafisile uku ncende yakwe Asyeli, ku kaeya nako wafisile uku ncende yakwe Isakali.
11 Mu ncende yakwe Isakali na yakwe Asyeli, Manase wapeezilwemo imisumba iyalondelelapo kumwi ni misumba inono iyalimo, musumba wa Beti-syeani, uwa Ibeleamu, Doli kumwi ni ncende zitatu izya myamba kuli kuti Eni-doli, Taanaki na Megido.
12 Lelo amu mutundu wakwe Manase yafizilwe ukupoka imisumba yii; pano Aina Kenani yali ni cilumba nupya yakanyile ukufumamo.
13 Lino Aina Izlaeli izile iyaya na maka, yalenzile Aina Kenani ukuya azya, lelo yatayazinzile yonsi umu mpanga.
14 Amu lupwa lwakwe Jozefu yuzizye Yoswa iyati: “U mulandu ci uno watutupeelela impanga inono? Sweswe iingi, pano Yeova watupaala ukufika na ndakai.”
15 Yoswa nawe wayanenyile ati: “Ndi cakuti mwemwe iingi sana nupya impanga ya myamba yakwe Efulemu yatimucepela, yangini umu mpanga ya Ina Pelizi ni ya Ina Lefaimu mukaizifizye incende pa kwikala.”
16 Lyene amu lupwa lwakwe Jozefu yalanzile iyati: “Incende ya myamba itanga itukumane, nupya Aina Kenani yonsi akaikala umu ncende ya mikonko yakwata maceleta ya nkondo avyela, kuli kuti aakaikala umu Beti-syeani ni misumba inono iyayamo alino na akaikala mu mukonko uwa Yezileele.”
17 Fwandi Yoswa wanenyile Efulemu na Manase amu ng’anda yakwe Jozefu ati: “Mwemwe iingi nupya mwakwata sana amaka. Mutalapeelwa sile impanga yonga,
18 lelo ni ncende ya myamba ilaya iinu. Nanti cakuti mwaya sana imiti mulaizifya, nupya ilaya iinu ukufika na kuno yapeleela. Pano mulazinga Aina Kenani nanti cakuti yakwata maka, nupya yakwata maceleta ya ulwi avyela.”
Mafutunoti
^ Kuli kuti uku ufumondaka.
