Yoswa 18:1-28
18 Lyene Aina Izlaeli yonsi yakolongine uku Syilo, nupya yapanzile itenti lya kupepelapo kuuku kwene, pano walanga yapoka impanga.
2 Lelo kwali imitundu 7 iya Ina Izlaeli ino walanga itatala yapeelwa impanga.
3 Fwandi Yoswa uzizye Aina Izlaeli ati: “Mulaloleela ukufika lilaci ukwaula ukuya umu kupoka impanga ino Yeova Leza wa vikolwe vinu wamupeezile?
4 Mpeelini aonsi yatatu ukufuma muli cila mutundu akuti intume; kuti yakapite umu mpanga nu kupima ukulingana ni mpanga ino cila mutundu ulapeelwa. Lyene pa cisila yace yawele kuli nene.
5 Yalinzile ukwankanya impanga umu viputulwa 7. Yuda alatwalilila ukwikala umu mpanga yakwe iya ku kaeya, na amu ng’anda yakwe Jozefu yalatwalilila ukwikala umu mpanga yao iya ku katutu.
6 Lelo mwemo muce mupime impanga nu kuyankanya umu viputulwa 7, nupya muce mulete ivipimo vivyo kuli nene, nani ndamipendwila pa nkoleelo yakwe Yeova Leza winu.
7 Lelo Aina Levi yatalapeelwa impanga pamwi namwe, pano yene Yeova wayapeela umulimo wa usimapepo; nupya Gadi, Lubeni na afu wa mutundu wakwe Manase yapeelwa mpiti impanga uku ufumondaka wa Luzi Lwa Yodani ino Mose umuomvi wakwe Yeova wayapeezile.”
8 Aonsi aali nu kuya umu kupima impanga yaipekinye ukuti yapita, nupya Yoswa wayanenyile ati: “Pitangini mukapime impanga nupya muce muwele kuli nene, nani ndizamupendwile kuno uku Syilo pa nkoleelo yakwe Yeova.”
9 Lyene yapisile nu kuyaceeceta impanga, nupya yayankinye umu viputulwa 7 ukulingana ni misumba, nu kulemba umwi buku. Pa cisila yaswilile kuli Yoswa uku nkambi uku Syilo.
10 Yoswa wayapendwilile uku Syilo pa nkoleelo yakwe Yeova. Lyene wankiinye Aina Izlaeli impanga ukulingana na ino yalinzile ukupeelwa.
11 Icipendwilo caponiile pa ya mu mutundu wakwe Benjamini ukulingana ni ndupwa zyao, nupya impanga yao yali pakasi ka yantu yakwe Yuda na antu yakwe Jozefu.
12 Uku katutu, mupaka watandikiile uku Luzi Lwa Yodani, wapisile nu ku katutu ku ncende isuluke iya musumba uwa Yeliko nupya wapisile uku mwamba uku ufumondaka iufika nu ku lwanga lwa Beti-aveni.
13 Nupya umupaka watwalilile ukufuma kuuku ukuya uku Lazi, ku ncende isuluke iya ku kaeya ka Lazi, kuli kuti Betele; wapisile uku Ataloti-adali pa mwamba uwayela uku kaeya ukwisika lya musumba wa Beti-holoni.
14 Nupya umupaka wasizilwe uku uwondaka iuzinguluka lwa ku kaeya ukufuma uku mwamba uwalozyanya na Beti-holoni; wapelezile uku Kilyati-baali, kuli kuti uku musumba wakwe Yuda uwa Kilyati-yealimu. Ukwene uwali ali mupaka wa ku uwondaka.
15 Umupaka wa ku kaeya wafumilile uku mpela ya Kilyati-yealimu nupya wafisile nu ku uwondaka; wapisile nu ku luzi lwa Nefutoa.
16 Umupaka wapisile uku mpela ya mwamba uwalozyanya nu mukonko wakwe mwana Hinomu uwaya umu mukonko wa Lefaimu uku katutu, nupya wapisile uku mukonko wakwe Hinomu, ku ncende isuluke iya Ina Yebusi uku kaeya, iufika nu ku Eni-logeli.
17 Nupya umupaka wasizilwe uku katutu nupya wafisile uku Eni-syemesyi nu ku Geliloti, incende iyayela pa nkoleelo ya mulundu wa Adumimu, nupya wapisile ukufika nu kwi iwe lyakwe Boani mwana Lubeni.
18 Nupya watwalilile ukufika uku ncende isuluke iya ku katutu iyaya pa nkoleelo ya ncende ya Alaba iuya iupita nu ku Alaba.
19 Umupaka watwalilile ukuya uku ncende isuluke iya ku katutu iya Beti-hogila, nupya wapelezile uku katutu umu mbali yakwe Yemba wa Musilya* uku mpela ya Luzi Lwa Yodani uku kaeya. Ukwene uwali mupaka wa ku kaeya.
20 Nupya Uluzi Lwa Yodani wali ali mupaka wa ku ufumondaka. Ikwene ali mipaka yonsi iya mpanga iyapeezilwe kuli yano yafumile muli Benjamini ukulingana ni ndupwa zyao.
21 Nupya imusumba iyapeezilwe uku mutundu wakwe Benjamini kulingana ni ndupwa zyao aeyi: Yeliko, Beti-hogila, Emeki-kezizi,
22 Beti-alaba, Zemalaimu, Betele,
23 Avimu, Pala, Ofula,
24 Kefali-amoni, Ofini, na Geba, kuli kuti imisumba 12 ni mizi iyalimo.
25 Gibyoni, Lama, Beeloti,
26 Mizipa, Kefila, Moza,
27 Lekemu, Ilipeele, Talala,
28 Zela, Ha-elefe, Yebusi, kuli kuti Yelusalemu, Gibeya, na Kilyati, kuli kuti imisumba 14 ni mizi iyalimo.
Ikwene ali mpanga iyapeezilwe uku ya mu mutundu wakwe Benjamini kulingana ni ndupwa zyao.
Mafutunoti
^ Kuli kuti Yemba Mufwe.
