Yoswa 19:1-51
19 Lyene icipendwilo cakwe ciili caponiile pa mutundu wakwe Simyoni kulingana ni ndupwa izyalimo. Nupya impanga yao yaali umu mpanga yakwe Yuda.
2 Imisumba ino yapeezilwe aeyi: Belisyeba kumwi na Syeba, Molada,
3 Hazali-syuali, Bala, Ezemu,
4 Elitoladi, Betuli, Holima,
5 Zikilagi, Beti-malikaboti, Hazali-susa
6 Beti-lebaoti, na Syaluheni, kuli kuti misumba 13 ni mizi iyalimo;
7 Aini, Limoni, Eteli, na Asyani, kuli kuti misumba 4 ni mizi iyalimo;
8 ni mizi yonsi iyali umupiipi ni misumba yii kufika nu ku Baalati-beeli, kuli kuti Lama uku kaeya. Yii yaali ali mpanga ino yapeezile amu mutundu wakwe Simyoni kulingana ni ndupwa zyao.
9 Impanga ino yapeezile amu mutundu wakwe Simyoni yaali umu mpanga iya mutundu wakwe Yuda pano impanga ya mutundu wakwe Yuda yaali ikulu sana.
10 Lyene icipendwilo cakwe citatu caponiile pa ya mu mutundu wakwe Zebuluni kulingana ni ndupwa zyao, nupya umupaka wa mpanga yao wafisile nu ku Salidi.
11 Mupaka wao wapisile uku Maleali lwa ku uwondaka nupya wafisile uku Dabesyeti nu ku mukonko uwali umupiipi na Yokoneamu.
12 Wafumile uku Salidi lwa kuno kukatunkila ilanzi, iuya iupita uku mupaka wa musumba wa Kisiloti-taboli nu ku Dabelati iuya iufika nu ku Yafiya.
13 Nupya watwalilile ukuya ukukatunkila ilanzi iuya uku Gati-hefeli nu ku Eti-kazini alino iuya iupita uku Limoni kufika nu ku Neya.
14 Nupya umupaka wazingulwike iuya uku Hanatoni ku katutu nupya waile iupeleela uku mukonko wa Ifuta-eli,
15 mu mpanga yao mwali ni misumba yii: Katati, Nahalali, Syimuloni, Idala, na Betelemu, kuli kuti misumba 12 ni mizi iyalimo.
16 Ikwene ali mpanga iyapeezilwe uku ya mu mutundu wakwe Zebuluni ukulingana ni ndupwa zyao. Ikwene yaali ali misumba yao ni mizi.
17 Cipendwilo icalenga 4 caponiile pa ya mu mutundu wakwe Isakali kulingana ni ndupwa zyao.
18 Nupya umupaka wao wafisile uku Yezileele, Kesuloti, Syunemu,
19 Hafalaimu, Syioni, Anaalati,
20 Labiti, Kisyioni, Ebezi,
21 Lemeti, Eni-ganimu, Eni-hada nu ku Beti-pazezi.
22 Nupya umupaka wafisile uku Taboli nu ku Syahazuma nu ku Beti-syemesyi alino wapeleezile uku Luzi Lwa Yodani, kuli kuti misumba 16 ni mizi iyalimo.
23 Ikwene ali mpanga ino amu mutundu wakwe Isakali yapeezilwe ukulingana ni ndupwa zyao, nupya ikwene iyali ali misumba yao ni mizi.
24 Lyene icipendwilo icalenga 5 caponiile pa ya mu mutundu wakwe Asyeli ukulingana ni ndupwa zyao.
25 Nupya umupaka wao wali a Helekati, Hali, Beteni, Akisyafu,
26 Alameleki, Amadi, na Misyali. Waile iufika nu ku Kalimeli uku uwondaka nu ku Syiholi-libinati,
27 nupya waswilile uku ufumondaka iuya iufika nu ku Beti-dagoni, wafisile nu ku Zebuluni nu ku mukonko wa Ifuta-eli ku katutu, ku Beti-emeki nu ku Neiyeli lyene watwalilile iuya iufika nu ku Kabulu kuli cimani,
28 waile iufika nu ku Ebuloni, ku Leobu, ku Hamoni, nu ku Kana alino nu ku Sidoni Mukalamba.
29 Nupya umupaka waswilile uku Lama iuya iufika nu ku musumba uwi linga uwa Tuli. Lyene waswilile uku Hosa iuya iupeleela na kuli yemba uwayela umu ncende ya Akizibu,
30 Uma, Afeki, na Leobu, kuli kuti misumba 22 ni mizi iyalimo.
31 Ikwene ali mpanga iyapeezilwe uku ya mu mutundu wakwe Asyeli ukulingana ni ndupwa zyao. Nupya ikwene ali misumba yao ni mizi.
32 Cipendwilo icalenga 6 caponiile pa ya mu mutundu wakwe Nafutali ukulingana ni ndupwa zyao.
33 Umupaka wao wafumile uku Helefu nu ku cimuti cikalamba ica ku Zaananimu, iuya uku Adami-nekebu nu ku Yabuneele iuya iufika nu ku Lakumu nupya wapeleezile uku Luzi Lwa Yodani.
34 Mupaka waswilile lwa ku uwondaka kuyafika uku Azinoti-taboli alino iutwalilila ukuyafika uku Hukoki nupya wafisile nu ku mpanga yakwe Zebuluni ku kaeya nu ku mpanga yakwe Asyeli ku uwondaka alino nu ku mpanga ya Yuda ku Luzi Lwa Yodani lwa ku ufumondaka.
35 Nupya imisumba iyakweti malinga aeyi: Zidimu, Zeli, Hamati, Lakati, Kineleti,
36 Adama, Lama, Hazoli,
37 Kedesyi, Edilei, Eni-hazoli,
38 Yiloni, Migidala-eli, Holemu, Beti-anati na Beti-syemesyi, kuli kuti misumba 19 ni mizi iyalimo.
39 Ikwene ali mpanga iyapeezilwe uku ya mu mutundu wakwe Nafutali kulingana ni ndupwa zyao, nupya ikwene ali misumba yao ni mizi.
40 Cipendwilo icalenga 7 caponiile pa ya mu mutundu wakwe Dani kulingana ni ndupwa zyao.
41 Nupya umupaka wa mpanga yao wali a Zola, Esyitaoli, Ili-syemesyi,
42 Syaalabini, Aijaloni, Itila,
43 Eloni, Timuna, Ekiloni,
44 Eliteke, Gibetoni, Baalati,
45 Yeudi, Bene-belaki ,Gati-limoni,
46 Me-yalikoni, na Lakoni, nupya umupaka wapisile umupiipi na Yopa.
47 Lelo impanga ya mutundu wakwe Dani yacefile. Fwandi yaile iyalwisya umusumba wa Lesyemu nu kuupoka nupya yakomile antu aikalangamo ukuomvya ulupanga. Lyene yatandike ukwikalamo, nupya yautemile izina lyuze ilyakuti Dani, kuli kuti izina lya cikolwe cao.
48 Ikwene ali mpanga iyapeezilwe ku ya mu mutundu wakwe Dani ukulingana ni ndupwa zyao. Nupya ikwene iyali ali misumba yao ni mizi.
49 Fwandi yamazile ukwankanya impanga. Nupya Aina Izlaeli yapeezile Yoswa mwana Nuni incende umu mpanga yao.
50 Yamupeezile umusumba uno walenzile ukulingana na vino Yeova walanzile, kuli kuti musumba wa Timunati-sela, uwali umu ncende yakwe Efulemu iya myamba nupya waukuuzile nu kutandika ukwikalamo.
51 Zii ali mpanga zino Elieza simapepo, Yoswa mwana Nuni ni ntunguluzi zya mu mitundu ya Ina Izlaeli yapendozile uku Syilo pa nkoleelo yakwe Yeova, pa mulyango wi tenti lya kupepelapo nu kupeela antu. Vikwene avino yamazile ukwankanya impanga.
