Yoswa 2:1-24
2 Lyene Yoswa mwana Nuni watumile aonsi yaili inengu kufuma uku Syitimu mu nkama. Wayanenyile ati: “Yangini mukaceecete impanga, maka maka umusumba uwa Yeliko.” Nayo yapisile nu kuya uku ng’anda yakwe Lahabu cizelele nupya yaile iikala kuuku kwene.
2 Yamwi yanenyile umwene uwa ku Yeliko iyati: “Aonsi Aina Izlaeli iiza kuno muno manguzi ku kuceeceta impanga.”
3 Lino umwene wa ku Yeliko uvwile vivyo, watumile amazwi kuli Lahabu ati: “Fumya aonsi atiiza umu ng’anda yako, pano iiza umu kuceeceta impanga yonsi.”
4 Lelo umwanaci wasenzile aonsi yayo yaili nu kuyayafisa. Lyene walanzile ati: “Ee aonsi yene iiza kuli nene, nomba ntaali namanya kuno iyafuma.
5 Nupya lino ikwafita ale impongolo ya musumba ili umupiipi nu kuyalwa, iyafuma. Ntamanyile kuno iyaya, lelo nga mwayakonka zuwa mumayazana.”
6 (Nomba walanga atayasenda api laali nu kuyafisa umu mitumba ya tumiti twakwe fulakisi.)
7 Fwandi yapisile umu kuyalonda ukulungama kuno Uluzi Lwa Yodani lutaali uluzike, nupya lino aile umu kuyalonda yafumile umu musumba impongolo yayazilwe.
8 Lino aonsi yatatala yalaala, Lahabu waile kuli aliyo api laali.
9 Wayanenyile ati: “Nimanya ukuti Yeova alamupeela impanga yii, nupya tuli ni ntete pa mulandu namwe. Antu yonsi amu mpanga yii yali ni ntete,
10 pano tuvwa vino Yeova walenzile Yemba Muyenzu ukupwa ala mukulola nako lino mwafumile umu Ijipti, na vino mwacisile kuli ya mwene yaili aa Ina Amoli, kuli kuti Sihoni na Ogi yano mwakomile uku lusansa* luze ulwa Luzi Lwa Yodani.
11 Lino tuvwile vivyo, tuvwile sana intete, nupya kusi ali wensi aakweti maka ya kumulwisya, pano Yeova Leza winu aali Leza wenga sile umwi yulu na pano nsi.
12 Acino napaapata, lapini kuli nene umwi zina lyakwe Yeova ukuti pa mulandu wakuti namulanga ukutemwa kwa cumi, namwe mulalanga ukutemwa kwa cumi uku ya mu ng’anda yakwe tata, nupya mulinzile ukumpeela icimanyililo icisininkiziwe.
13 Muce muleke tata na mayo, ya kalume yane na ya kaci yanji kumwi ni ndupwa zyao zyonsi ukuya nu umi, nupya muce mutupususye pakuti tutaca tufwe.”
14 Lino aonsi yuvwile vivyo, yamunenyile iyati: “Sweswe tulafwilapo pa maumi inu! Ndi cakuti utalasokolola vino tukulonda ukucita, lyene ale tulakulanga ukutemwa kwa cumi nu kufikilizya vino twalanda lino Yeova alatupeela impanga.”
15 Pa cisila wayafumizizye api windo ukuomvya umwando, pano ing’anda yakwe yalemenkine ni linga lya musumba. Nupya wikalanga papela yi linga.
16 Lyene wayanenyile ati: “Yangini uku ncende iya myamba akuno mukafisame pa manda yatatu, pakuti aakumulonda yataca yamuzane. Lyene nga yawela muce mutwalilile nu ulendo winu.”
17 Lyene aonsi yamunenyile iyati: “Tulaya akaele uku mulapo uno watulenga ukulapa
18 ndi cakuti lino tuliza umu mpanga yii, tutalazana watunyepa umwando uno umatufumizyako api windo. Uce ulete ya tata yako, ya mayo yako, na ina yako, na yonsi amu ng’anda yakwe ya tata yako umu ng’anda kwene yii.
19 Lyene wensi aalafuma umu ng’anda yako nu kuya panzi uwazi wakwe ulaya pa mutwe wakwe, nupya tulaya akaele. Lelo ndi cakuti ciipe cilacitikila ali wensi alaya umu ng’anda yako, uwazi wakwe ulaya pa mitwe itu.
20 Nomba nga wasokolola vino tukulonda ukucita, tulaya akaele uku mulapo uno watulenga ukulapa.”
21 Nawe walanzile ati: “Kacice ciye vivyo kwene vino mwalanda.”
Lyene walesile ukuti yapite. Pa cisila wanyefile umwando uyenzulukile pi windo.
22 Fwandi yapisile nu kuya uku ncende iya myamba nupya yaile iikala kuuku kwene pa manda yatatu, kufikila lino ayalondanga yawezile. Ayalondanga yapisile umu miseo yonsi ala yakuyalonda lelo yatayazanyile.
23 Lyene aonsi yaya yaili inengu yatentemwike ukufuma umu ncende ya myamba, iyalamba uluzi nu kuya kuli Yoswa mwana Nuni. Yaile iyamusimikila vyonsi ivyayacitikile.
24 Yamunenyile iyati: “Yeova watatupeela impanga yonsi. Nupya antu yonsi yali ni intete pa mulandu naswe.”
Mafutunoti
^ Kuli kuti uku ufumondaka.
