Yoswa 20:1-9
-
Misumba ya kuutukilako (1-9)
20 Lyene Yeova wanenyile Yoswa ati:
2 “Nena Aina Izlaeli uti, ‘Isoolwelini imisumba iya kuutukilako ino namunenyile ukupitila muli Mose,
3 pakuti wensi uwakoma umuze ukwaula ukwenekela nanti ukwaula ukumanya angutukilako. Nupya imisumba iiyo ilaya iya kuutukilako ukufuma kuli kalandula wa wazi.
4 Uwakoma umuze alinzile ukuutukila uku musumba onga pa misumba iiyo nu kuyaimilila pa mpongolo, nupya afwile ukulondolwela akalamba ya mu musumba uwo ivyativicitika. Lyene nayo yalamupokelela nu kumupeela pa kwikala, nupya nawe alikala umu musumba uwo.
5 Ndi cakuti kalandula wa wazi wamukonka, yatalinzile ukuleka asende umuntu uwakomile umuze, pano ala wamukomile ukwaula ukumanya nupya ataamupasile.
6 Alinzile ukutwalilila ukwikala umu musumba uwo ukufikila lino wapingulwa pa nkoleelo ya yantu, nupya alinzile ukutwalilila ukwikala mumo kwene ukufikila simapepo mukalamba akuomba pa nsita iiyo wafwa. Lyene wino wakomile umuze angaswilila uku musumba uno wafumileko, nupya angingila umu musumba nu mu ng’anda yakwe.’”
7 Fwandi yasoolwile umusumba wa Kedesyi uwa mu Galili uwayela umu ncende iya myamba yakwe Nafutali, umusumba wa Syekemu uwayela umu ncende iya myamba yakwe Efulemu nu musumba wa Kilyati-aba, kuli kuti Hebuloni uwayela umu ncende iya myamba yakwe Yuda.
8 Umu ncende ya Yodani uku ufumondaka wa Yeliko, yasoolwile umusumba wa Bezeli uwayela umu mukonko pa ncende itambalale ukufuma umu mutundu wakwe Lubeni, mu mutundu wakwe Gadi yasoolwilemo umusumba wa Lamoti uwali umu Gilyadi, nupya umu mutundu wakwe Manase yasoolwilemo umusumba wa Golani uwa mu Basyani.
9 Yii aali misumba ino yasoolweliile Aina Izlaeli na antu afuma uku mpanga zyuze, ukwa kuutukila wensi uwakoma umuze ukwaula ukwenekela pakuti atakomwa na kalandula wa wazi lino atatala wapingulwa pa nkoleelo ya yantu.
