Yoswa 22:1-34
22 Lyene Yoswa wamile amu mutundu wakwe Lubeni, amu mutundu wakwe Gadi na afu wa mutundu wakwe Manase
2 nupya wayanenyile ati: “Imucita vyonsi vino Mose umuomvi wakwe Yeova wamunenyile, nupya imuvwila vyonsi vino namunenyile.
3 Mutaatala mwalekelezyapo aina inu ukufika na ndakai; nupya mwasunga masunde yakwe Yeova Leza winu.
4 Lyene Yeova Leza winu wataleka aina inu ukupuuza wakwe vino wayalavile. Fwandi mungaswilila umu matenti inu, uku mpanga ino Mose umuomvi wakwe Yeova wamupeezile ukuti iye iinu uku lusansa luze* ulwa Luzi Lwa Yodani.
5 Mwaikisya sile mano uku kulondela masunde yano Mose umuomvi wakwe Yeova wamupeezile, ukupitila umu kutemwa Yeova Leza winu, ukucita ukulonda kwakwe, kusunga masunde yakwe, kumulondela sana nu kumuombela ni myenzo inu yonsi nu umi winu onsi.”
6 Lyene Yoswa wayapaazile nu kuleka ukuti yapite, nayo yaswilile uku matenti yao.
7 Mose wapeezile impanga ya Basyani kuli afu wa mutundu wakwe Manase, nupya Yoswa wapeezile impanga iya ku uwondaka wa Luzi Lwa Yodani kuli afu yuze iya mutundu pamwi na ina yao. Lyene Yoswa walesile ukuti yaswilile uku matenti yao, wayapaazile
8 nu kuyanena ati: “Swililini uku matenti inu ni vyuma ivingi, ni viteekwa ivingi na siuva na goldi, koopa ni cela alino ni vyakuzwala ivingi sana. Sendini ivyuma vino mwaposile alwani inu pamwi na ina inu.”
9 Lyene amu mutundu wakwe Lubeni, amu mutundu wakwe Gadi na afu wa mutundu wakwe Manase yafumile uku Ina Izlaeli yauze, ku Syilo umu mpanga ya Kenani, nupya yaswilile uku Gilyadi, ku mpanga ino yapeezilwe ukulingana na vino Yeova walanzile ukupitila muli Mose.
10 Lino yafisile uku ncende ya Luzi Lwa Yodani ku Kenani, amu mutundu wakwe Lubeni, amu mutundu wakwe Gadi na afu wa mutundu wakwe Manase, yakuuzile ulambo ukalamba kuuku kwene, mupiipi nu Luzi Lwa Yodani.
11 Pa cisila Aina Izlaeli yauze yuvwile yamwi yakuti: “Amu mutundu wakwe Lubeni, amu mutundu wakwe Gadi na afu wa mutundu wakwe Manase, iyakuula ulambo umupiipi ni mpanga iya Kenani, mu ncende ya Luzi Lwa Yodani umu ncende itu.”
12 Lino Aina Izlaeli yuvwile vivyo, yakolongine yonsi uku Syilo pakuti yaye umu kuyalwisya.
13 Lyene Aina Izlaeli yatumile Finiasi mwana Elieza simapepo uku ya mu mutundu wakwe Lubeni, amu mutundu wakwe Gadi na afu wa mutundu wakwe Manase uku mpanga ya Gilyadi,
14 nupya wali ni ntunguluzi 10, muli cila mutundu wa Ina Izlaeli mwafumile intunguluzi yonga, cila ntunguluzi yatungululanga Aina Izlaeli masauzandi.
15 Lino yafisile uku ya mu mutundu wakwe Lubeni, ku ya mu mutundu wakwe Gadi na kuli afu wa mutundu wakwe manase umu mpanga iya Gilyadi, yayanenyile iyati:
16 “Antu yakwe Yeova yonsi iyalanda iyati: ‘U mulandu ci uno mwacitila cii nu kuyembukila Leza wa Ina Izlaeli? Imuleka ukulondela Yeova ukupitila umu kuikuulila ulambo nu kupondokela Yeova.
17 Uzye musikwiusya vino twacisile uku Peoli? Tutaisangulula ukufika na ndakai, nanti cakuti cinkunka cafumile kuli Yeova nu kwiza pali sweswe.
18 Nupya mukulonda ukuta ukulondela Yeova! Ndi cakuti mwapondokela Yeova, lyene mutondo alasokela Aina Izlaeli yonsi.
19 Lelo ndi cakuti a pa mulandu wakuti impanga inu iikowele, yangini uku mpanga yakwe Yeova ukuli cikuulwa ca muzilo cakwe Yeova, nu kuyaikala naswe, lelo mutapondokela Yeova nupya mutaleka ukuti tumupondokele kupitila umu kukuula ulambo nauze ukulunda pa ulambo wakwe Yeova Leza witu.
20 Lino Akani mwana Zela wapondwike ukulozya uku vintu ivyalinzile ukononwa, uzye ukali wakwe Leza utiizile pa Ina Izlaeli yonsi? Nupya atafwile sile wenga pa luyembu lwakwe.’”
21 Lyene amu mutundu wakwe Lubeni, amu mutundu wakwe Gadi na afu wa mutundu wakwe Manase yaswike intunguluzi izyatungululanga Aina Izlaeli masauzandi iyati:
22 “Yeova Leza uwacila tuleza tonsi nupya Yeova uwa maka aamanyile, alino na Ina Izlaeli kwene yamamanya. Ndi cakuti itupondokela Yeova, mutaleka tuye nu umi.
23 Ndi cakuti itukuula ulambo pakuti tuleke ukulondela Yeova, nu kulapeelelapo malambo ya koca, malambo ya vyakulya na malambo ya mutende, ale Yeova amatufulula.
24 Lelo kwali umulandu uze uwalenzile tucite vivyo, pano twelenginye ukuti, ‘Ku nkoleelo ana inu yaluzya ana itu yati: “Uzye ucuza winu na Yeova Leza wa Ina Izlaeli waya uli?
25 Yeova waleka ukuti Uluzi Lwa Yodani luye ali mupaka pali sweswe namwe, amu mutundu wakwe Lubeni na amu mutundu wakwe Gadi mutakwata ucuza na Yeova.” Nupya ana inu yalaleka kuti ana itu yafilwa ukupepa* Yeova.’
26 “Fwandi twatiile, ‘Lekini tukuule ulambo, lelo asi wa kupeelelapo malambo ya koca nanti malambo yauze,
27 lelo a pakuti uye ali ukambone pali mwemwe naswe na ana itu alalondelelapo ukuti tulaombela Yeova ala tukupeela malambo ya koca na malambo itu aamutende alino na malambo yauze, pakuti uku nkoleelo ana inu yataca yanene ana itu ukuti: “Mutakwata ucuza na Yeova.”’
28 Fwandi twatiile, ‘Ndi cakuti uku nkoleelo yalalanda vivyo kuli sweswe nu ku yana itu, tulayanena tuti: “Lolini icikozile ulambo wakwe Yeova cino ivikolwe vitu vyapanzile, asi ca kupeelelapo malambo ya koca nanti malambo yauze, lelo ali ukambone pali sweswe namwe.”’
29 Tutanga tupondokele Yeova nu kuta ukulondela Yeova, kupitila umu kukuula ulambo wa kupeelelapo malambo ya koca, malambo ya vyakulya na malambo yauze, ukucila pa ulambo wakwe Yeova Leza witu uwaya pa cikuulwa cakwe ica muzilo.”
30 Lino Finiasi simapepo, intunguluzi zya Ina Izlaeli, ni ntunguluzi izyatungululanga Aina Izlaeli masauzandi izyali pamwi nawe zyuvwile vino amu mutundu wakwe Lubeni, amu mutundu wakwe Gadi na amu mutundu wakwe Manase yalanzile, yuvwile ningo.
31 Acino Finiasi mwana Elieza simapepo, wanenyile amu mutundu wakwe Lubeni, mutundu wakwe Gadi na amu mutundu wakwe Manase ati: “Ilelo twamanya ukuti Yeova ali naswe, pano mutapondokile Yeova. Fwandi mwapususya Aina Izlaeli kuli Yeova.”
32 Lyene Finiasi mwana Elieza simapepo kumwi ni ntunguluzi yafumile uku ya mu mutundu wakwe Lubeni nu ku ya mu mutundu wakwe Gadi uku mpanga iya Gilyadi nu kuya uku Kenani, nupya yaile iyanena Aina Izlaeli yauze vino yazanyile.
33 Aina Izlaeli yuvwile ningo. Yalumbanyizye Leza nupya yataatazile yalandepo nupya pa kuya umu kulwisya amu mutundu wakwe Lubeni na amu mutundu wakwe Gadi pakuti yonone impanga ino ikalangamo.
34 Fwandi amu mutundu wakwe Lubeni na amu mutundu wakwe Gadi yatemiile ulambo izina ilyakuti, “Ukambone pali sweswe uwakuti Yeova ali Leza wa cumi.”
