Yoswa 23:1-16
23 Pa cisila ca manda aingi ukufuma pano Yeova walesile Aina Izlaeli ukupuuza uku yalwani yao yonsi ala Yoswa watakota nupya ali ni myaka iingi,
2 Yoswa wamile Aina Izlaeli yonsi, akalamba ya mu Izlaeli, ntunguluzi na ya kapingula nu kuyanena ati: “Inkota nupya indi ni myaka iingi.
3 Nupya mwailolela mweineco vyonsi vino Yeova Leza winu wamucitiile uku nko zyonsi zii pa mulandu wakuti Yeova Leza winu u wamulwilanga.
4 Napendwile nu kupeela impanga ya nko uku mitundu inu, ukwikako ni mpanga zya nko zyonsi zino nacimvizye ukufuma uku Luzi Lwa Yodani ukufika kuli Yemba Mukalamba* uku uwondaka.*
5 Nupya Yeova Leza winu aliwe wayazinzile ala mukulola nako, nupya mwatozile impanga yao wakwe viivi kwene vino Yeova Leza winu wamulavile.
6 “Fwandi mulinzile ukuya asipe sana nu kulalondela vyonsi ivyalembwa umwi buku lya Masunde Yakwe Mose, ukwaula ukupaalukila ukwi lunji nanti kuli cimani,
7 nupya mutalinzile ukupanga ivyuza ni nko izyatizisyalako. Mutalinzile nu kulalumbula mazina yakwe ya leza yao nanti ukulapila muli aliyo, nupya mutalinzile ukulayaombela nanti ukulayafukamila.
8 Lelo mulinzile ukutwalilila ukuya acumi kuli Yeova Leza winu wakwe vino mukacita ukufika ndakai.
9 Yeova alamuzingila inko izikalamba nupya izya maka, pano mwemo kusi umuntu uwatala wamucimvya ukufika na ndakai.
10 Muntu wenga sile muli mwemwe alacimvya antu 1,000, pano Yeova Leza winu akumulwila wakwe vino wamulavile.
11 Fwandi lyonsi mwatemwa Yeova Leza winu.
12 “Lelo ndi cakuti mwamufutatila nu kutandika ukucita vino inko izyatizisyala zikacita nu kutwalizyanya nazyo alino nu kupanga ucuza nazyo,
13 mulinzile ukumanya ukuti Yeova Leza winu atalatwalilila ukumuzingila inko zii. Lelo zilaya wa citeyo ni mikota iya kumicapilako umwi tundu, nupya zilaya wa myunga iya kumutota umu manso, ukufika lino mulaloviwa mwensi umu mpanga isuma ino Yeova Leza winu wamupeela.
14 “Indi umupiipi nu kufwa, nupya mwamanya ningo ni myenzo inu yonsi ukuti kusi nanti acimwi pali vyonsi visuma vino Yeova Leza winu wamulavile icitafikiliziwa. Vyonsi kwene vyafikiliziwa.
15 Lelo wakwe viivi kwene vino ivisuma vyonsi vino Yeova Leza winu wamulavile vyafikiliziwa, avino Yeova alaleta iviipe vyonsi pali mwemwe vino walanzile nupya alamulovya umu mpanga isuma ino Yeova Leza winu wamupeela.
16 Ndi cakuti mwakana ukusunga upangano uno Yeova Leza winu wamunenyile ukusunga, nupya mwaya umu kuombela ya leza yauze nu kuyafukamila, lyene ukali wakwe Yeova uliza pali mwemwe, nupya mulalowa umu mpanga isuma ino wamupeela.”
