Yoswa 3:1-17
-
Aina Izlaeli yalamba Uluzi Lwa Yodani (1-17)
3 Lyene Yoswa wakatwike katondotondo nupya wene pamwi na Ina Izlaeli yonsi yafumile uku Syitimu nu kuya uku Luzi Lwa Yodani. Yaizi kuuku kwene lino yatatala yalamba uluzi.
2 Lino papisile manda yatatu, intunguluzi zyapisile umu nkambi
3 nupya zyanenyile antu iziti: “Lino mwalola sile ya simapepo Aina Levi yasenda imbokosi ya upangano yakwe Yeova Leza winu, mulinzile ukutenuka nu kuilondela.
4 Lelo mulinzile ukutaluka imbokosi mupiipi na mamita 890,* mutalinzile ukupalamako pakuti mumanye kuno mulinzile ukuya, pano mutaatala mwapitapo inzila yii.”
5 Lyene Yoswa wanenyile antu ati: “Isangululini pano mutondo Yeova alamucitila ivintu ivisuma.”
6 Nupya wanenyile ya simapepo ati: “Sendini imbokosi ya upangano nu kukoleelela antu.” Fwandi yasenzile imbokosi ya upangano nupya yakoleelile antu.
7 Lyene Yeova wanenyile Yoswa ati: “Ilelo nimatandika ukukucindamika ale na Ina Izlaeli yonsi yakulolako, pakuti yamanye ukuti nimayanga naawe wakwe vino nali na Mose.
8 Ulinzile ukunena ya simapepo aakusenda imbokosi ya upangano uti: ‘Ndi mwafika umu mbali ya Luzi Lwa Yodani mwimilile umu manzi.’”
9 Nupya Yoswa wanenyile Aina Izlaeli ati: “Izini muvwe mazwi yakwe Yeova Leza winu.”
10 Lyene watiile: “Kuli cii akuno mumamanyila ukuti Leza wa umi ali namwe nu kuti alamuzingila Aina Kenani, Aina Hiti, Aina Hivi, Aina Pelizi, Aina Giligasi, Aina Amoli na Aina Yebusi.
11 Lolini! Imbokosi ya upangano iya Mwene uwa nsi yonsi iliyo imatandikilapo ukwingila umu Luzi Lwa Yodani.
12 Fwandi soololini aonsi 12 ukufuma umu mitundu ya Ina Izlaeli, musoolole umonsi wenga muli cila mutundu,
13 lino sile ivikando vyakwe ya simapepo atiyasenda imbokosi yakwe Yeova Umwene wa nsi yonsi vyakumya umu manzi ya mu Luzi Lwa Yodani, amanzi aakupita yamaimilila wa ciumba.”
14 Fwandi lino antu yafumile umu matenti yao kuti yakalambe Uluzi Lwa Yodani, ya simapepo aasenzile imbokosi ya upangano yayakoleelile.
15 Lino ya simapepo yafisile sile uku Luzi Lwa Yodani nu kulyata umu manzi ya mu mbali (Uluzi Lwa Yodani lukazuula sana umu nsita ya kuzombola),
16 manzi aafumanga ukupela iimilile. Iimilile wa ciumba ukutali sana uku musumba wa Adamu, uwali umupiipi na Zaletani, lyene manzi aayanga kuli Yemba wa Alaba, kuli kuti Yemba wa Musilya* yaapwile, lino manzi iimilile antu yalamvile nu kuya uku ncende iyalozyanya na Yeliko.
17 Lino ya simapepo aasenzile imbokosi ya upangano yakwe Yeova yatwalilile ukwimilila pa musili uume pakasi ka Luzi Lwa Yodani, Aina Izlaeli yonsi yalamvile uluzi pa musili uume.
