Yoswa 4:1-24
-
Mawe aalaya icimanyililo (1-24)
4 Lino Aina Izlaeli yonsi yamazile sile ukulamba Uluzi Lwa Yodani, Yeova wanenyile Yoswa ati:
2 “Soolola aonsi 12, usoolole umonsi wenga muli cila mutundu,
3 nupya uyanene uti: ‘Tolini mawe 12 aali pakasi ka Luzi Lwa Yodani pano ya simapepo iimilila, muyasende nu kuyaika pa ncende ino mumalaalapo.’”
4 Fwandi Yoswa wamile aonsi 12 asonsilwe ukufuma muli cila mutundu uwa Ina Izlaeli,
5 nupya wayanenyile ati: “Yangini pa nkoleelo ya Mbokosi ya upangano yakwe Yeova Leza winu pakasi ka Luzi Lwa Yodani, cila muntu pali mwemwe alinzile ukunyemula iwe lyonga pa ciye, pakuti impendwa ya mawe ilingane ni mitundu ya Ina Izlaeli,
6 yalaya icimanyililo pali mwemwe. Ndi cakuti uku nkoleelo ana inu yaca yamuzya yati: ‘Nga mawe yaa aacani?’
7 muce muyanene muti: ‘A pa mulandu wakuti manzi ya mu Luzi Lwa Yodani iimilile pa nkoleelo ya mbokosi ya upangano yakwe Yeova. Lino ya simapepo yalamvyanga imbokosi ya upangano, manzi ya mu Luzi Lwa Yodani iimilile. Mawe yaa yalaiusyako Aina Izlaeli ivyacitike manda pe.’”
8 Fwandi Aina Izlaeli yacisile vino Yoswa wayanenyile. Yaile iyasenda mawe 12 pakasi ka Luzi Lwa Yodani wakwe vino Yeova wanenyile Yoswa, pakuti impendwa ya mawe ilingane ni mpendwa ya mitundu ya Ina Izlaeli. Yayasenzile nu kuyaika pa ncende ino yali nu kulaalapo.
9 Nupya Yoswa wakolonganike mawe 12 pakasi ka Luzi Lwa Yodani pa ncende ino ya simapepo aasenzile imbokosi ya upangano iimililepo, nupya mawe yayo apano yaya na ndakai kwene.
10 Ya simapepo aasenzile Imbokosi ya Upangano yatwalilile ukwimilila pakasi ka Luzi Lwa Yodani kufikila vyonsi vino Yeova walanzile ukuti Yoswa anene antu vyasila, ukulingana na vyonsi vino Mose wanenyile Yoswa. Antu nayo yacincile ukulamba uluzi.
11 Lino antu yonsi yamazile sile ukulamba uluzi, ya simapepo aasenzile Imbokosi ya Upangano yakwe Yeova nayo yalamvile ala na antu yakulolako.
12 Nupya amu mutundu wakwe Lubeni, amu mutundu wakwe Gadi, na afu wa mutundu wakwe Manase yalamvile uluzi umu maumba ya yasilika ala iyakoleelela Aina Izlaeli wakwe viivi kwene vino Mose wayanenyile.
13 Mupiipi na asilika 40,000 aaipekanye uku ulwi yalamvile pa nkoleelo yakwe Yeova nu kuya umu lwanga lwa Yeliko.
14 Pa wanda uwa Yeova wacindamike Yoswa ala na Ina Izlaeli yonsi yakulolako, nupya yamucindike sana manda yonsi yano wali nu umi wakwe viivi kwene vino yacindike Mose.
15 Lyene Yeova wanenyile Yoswa ati:
16 “Nena ya simapepo aasenzile imbokosi ya upangano ukuti yafume umu Luzi Lwa Yodani.”
17 Fwandi Yoswa wanenyile ya simapepo ati: “Fumini umu Luzi Lwa Yodani.”
18 Lino ya simapepo aasenzile imbokosi ya upangano yakwe Yeova yafumile sile pakasi ka Luzi Lwa Yodani ni vikando vyao vyalyata uku cituntu, amanzi yakonkinyepo ukupita nu kuzuula iyaya wakwe vino yaali pa kutandika.
19 Antu yafumile uku Luzi Lwa Yodani umu mwezi wa kutandikilako pa wanda uwalenga 10, nupya yaile iyapanga inkambi pa Giligali ku mupaka wa ku ufumondaka wa musumba wa Yeliko.
20 Nupya mawe 12 yano yafumizye umu Luzi lwa Yodani, Yoswa waimike pa Giligali.
21 Lyene wanenyile Aina Izlaeli ati: “Uku nkoleelo lino ana inu yalamuzya yati, ‘Nga mawe yaa yakupiliula cani?’
22 muce muyalondolwele muti: ‘Aina Izlaeli yalamvile Uluzi Lwa Yodani pa musili uume
23 lino Yeova Leza winu wakamizye manzi ya mu Luzi Lwa Yodani ala yakulola nako suka iyalamba, wakwe vino Yeova Leza winu wakamizye manzi pali Yemba Muyenzu ala tukulola nako suka itulamba.
24 Wacisile vivyo pakuti antu yonsi umu nsi yamanye ukuti Yeova wakwatisya maka na pakuti lyonsi mwatiina Yeova Leza winu.’”
