Yoswa 6:1-27
6 Musumba wa Yeliko wayazilwe ningo sana pa mulandu na Ina Izlaeli; kutaali ali wensi uwafumangamo nanti ukwingilamo.
2 Lyene Yeova wanenyile Yoswa ati: “Lola, inkupeela umusumba wa Yeliko, umwene wao, na asilika yao amaka.
3 Mwe yasilika mwensi mulinzile ukuzinguluka umusumba umuku onga. Mwakulacita vivyo kwene pa manda 6.
4 Usoolole ya simapepo 7 aakuti yakoleelele Imbokosi ya Upangano ale iyasenda na mapenga 7 aapangilwa ni mpembe zyakwe suuku. Lelo pa wanda uwalenga 7 muce muzinguluke umusumba imiku 7, nupya ya simapepo yace yalizye mapenga.
5 Lino muluvwa ya simapepo yalizya mapenga aapangilwa ni mpembe zyakwe suuku, antu yonsi yace yapunde sana wa kupunda kwa yantu aali umu ulwi. Lyene ilinga lya musumba lilapona, nupya asilika yace ingile umu musumba cila muntu ulunga na pano ayelile.”
6 Fwandi Yoswa mwana Nuni wamile ya simapepo nu kuyanena ati: “Sendini Imbokosi ya Upangano, nupya ya simapepo 7 yalinzile ukusenda mapenga 7 aapangilwa ni mpembe zyakwe suuku nu kukoleelela Imbokosi ya Upangano yakwe Yeova.”
7 Lyene wanenyile asilika ati: “Yangini mukazinguluke umusumba, nupya asilika yamwi yalinzile ukukoleelela Imbokosi ya Upangano yakwe Yeova.”
8 Nupya wakwe viivi kwene vino Yoswa wanenyile antu, ya simapepo 7 aali pa nkoleelo yakwe Yeova aasenzile mapenga 7 aapangilwa ni mpembe zyakwe suuku 7, yakolezile nu kutandika ukulizya mapenga, ni mbokosi ya upangano yakwe Yeova yali cisila.
9 Asilika yamwi yakoleelile ya simapepo aalizyanga mapenga nupya asilika yauze yalondiile Imbokosi ya Upangano ala mapenga yakulila.
10 Lyene walanga Yoswa watanena asilika ati: “Mutapunda nanti ukuleka mazwi inu yuvwike. Mutalanda icili consi kufikila uwanda uno ndamunena ukuti, ‘Pundini!’ Lyene alino muce mupunde.”
11 Walesile ukuti yakazinguluke umusumba umuku onga, ale iyasenda Imbokosi ya Upangano yakwe Yeova, lyene yaswilile uku nkambi nu kuyalaala.
12 Uwanda uwalondelilepo, Yoswa wakatwike katondotondo nupya ya simapepo yasenzile Imbokosi ya Upangano yakwe Yeova,
13 nupya ya simapepo 7 aasenzile mapenga yakoleelile Imbokosi ya Upangano yakwe Yeova ale yakulizya. Lyene asilika yamwi yayakoleelile, yauze nayo yaali cisila cao, yalondiile Imbokosi ya Upangano yakwe Yeova ala mapenga yakulila.
14 Pa wanda wakwe ciili, yazingulwike umusumba muku onga, na pa cisila yaswilile uku nkambi. Vikwene avino yacisile pa manda 6.
15 Pa wanda uwalenga 7 yakatwike katondotondo, nupya yazingulwike umusumba imiku 7. Uwanda sile uwa ali uno yazingulwike umusumba imiku 7.
16 Nupya pa muku uwalenga 7, ya simapepo yalizizye mapenga, lyene Yoswa wanenyile asilika ati: “Pundini, pano Yeova watamupeela umusumba!
17 Musumba na vyonsi ivyayamo vilinzile ukononwa pano ivyakwe Yeova. Lelo Lahabu sile cizelele na amu ng’anda yakwe aataalinzile ukononwa, pa mulandu wakuti wafisile aonsi yano twatumile.
18 Lelo mutaaluke uku cili consi icilinzile ukononwa pakuti mutakumbwa icintu cico nu kucisenda, nu kuletela Aina Izlaeli intazi iingalenga ukuti yononwe.
19 Lelo siuva wensi na goldi ni viya ivyapangilwa na koopa ni cela i vya muzilo kuli Yeova. Vilinzile ukuzungilwa umu cipao cakwe Yeova.”
20 Lino ya simapepo yalizizye mapenga asilika yapunzile. Lino asilika yuvwile sile iciunda ca mapenga yapunzile sana ukupunda kwa mu ulwi, lyene ilinga lyaponyile. Pa cisila ingiile umu musumba cila umuntu ulunga na pano wayelile nu kupoka umusumba.
21 Yononyile vyonsi ivyali umu musumba ivyalinzile ukononwa ukuomvya ulupanga, kuli kuti umonsi, umwanaci, umwance nu wikolo, cipambasi, imfwele, na punda.
22 Lyene Yoswa wanenyile aonsi yaili aceecesile impanga ati: “Yangini umu ng’anda yakwe cizelele nu kuyamusenda kumwi na amu ng’anda yakwe yonsi wakwe vino mwalafile kuli aliwe.”
23 Fwandi aonsi yaya yaile iyasenda Lahabu kumwi na ya isi, ya nyina, na ina yakwe, na amu ng’anda yakwe yonsi, kuli kuti ulupwa lwakwe lonsi, nupya yayatwazile uku nkambi ya Ina Izlaeli.
24 Lyene yosile umusumba na vyonsi ivyalimo. Lelo siuva na goldi ni viya ivyapangilwe na koopa ni cela yavisungiile umu cipao icali umu ng’anda yakwe Yeova.
25 Lahabu cizelele na amu ng’anda yakwe isi alino na antu yakwe yonsi ayano Yoswa atakomile sile; nupya Lahabu akaikala umu Izlaeli kufika na ndakai kwene pa mulandu wakuti wafisile aonsi yano Yoswa watumile umu kuceeceta impanga iya Yeliko.
26 Pa nsita iiya, Yoswa walafile umulapo ati: “Umuntu wensi aalezya ukukuula umusumba uwa Yeliko cipya cipya alatiipwa pa manso yakwe Yeova. Ndi cakuti wimika umufula alafwilwa umwanakwe iyeli, nupya ndi cakuti wimika ivisaasa alafwilwa kasuli.”
27 Fwandi Yeova wali na Yoswa nupya wamanyikwe umu nsi yonsi.
