Yoswa 7:1-26
7 Lelo Aina Izlaeli yatuvwilile isunde ilyalandanga pa vintu ivyali nu kononwa. Pano Akani mwana Kami, mwana Zabidi, mwana Zela uwa mu mutundu wakwe Yuda wasenzile ivintu vimwi ivyali nu kononwa. Na cii calenzile Yeova asokele sana Aina Izlaeli.
2 Lyene Yoswa watumile aonsi yamwi kufuma umu musumba wa Yeliko ukuya uku musumba wa Ai, uwaya umupiipi nu musumba wa Beti-aveni ku ufumondaka uwa ncende ya Betele, nupya wayanenyile ati: “Yangini mukaceecete impanga iiya.” Fwandi aonsi yayo yaile iyaceeceta umusumba wa Ai.
3 Lino yawezile kuli Yoswa yamunenyile iyati: “Utatuma asilika yonsi ukuya umukulwa. Asilika umupiipi sile na 2,000 nanti 3,000 aliyo yangalondekwa pa kucimvya umusumba wa Ai, utacuzya asilika yonsi ukuya umukulwa pano antu akuuku yatavuzile.”
4 Fwandi aonsi umupiipi na 3,000 yaile umukulwa, lelo lino yaweni aonsi amu Ai yutwike.
5 Aonsi aa ku Ai yakonsile Aina Izlaeli ukunzi ya musumba kufika nu ku Syebalimu* ala yakuyakoma, nupya yakomile Aina Izlaeli 36. Fwandi antu yuvwile sana intete nupya amaka yasizile.
6 Lino Yoswa uvwile ivyacitike walepwile ivyakuzwala vyakwe nu kufupama pa nkoleelo ya Mbokosi ya Upangano yakwe Yeova kufika na manguzi, nupya wene na akalamba ya mu Izlaeli yatwalilile ukuipaka ulukungu uku mitwe.
7 Yoswa watiile: “Iye we Yeova Mwene wa Papelapela, u mulandu ci uno watulamvizye Uluzi Lwa Yodani nu kwizatupeela uku Ina Amoli pakuti yatonone? Fwandi nga cazifile itwikala uku mbalama yuze* iya Luzi Lwa Yodani!
8 We, Yeova, i vyani vino ningalanda vino lyene Aina Izlaeli iyutuka alwani yao?
9 Lino Aina Kenani na antu yonsi amu mpanga izili umupiipi yaluvwa vii, yaliza kuli sweswe nu kulovya izina litu umu nsi, uzye lyene ulacita uli api zina lyako ilikalamba?”
10 Yeova wanenyile Yoswa ati: “Katuka! U mulandu ci uno watufupamila papo?
11 Aina Izlaeli iyayembuka. Iyatama upangano uno nayanenyile ukuti yalinzile ukusunga. Iyasenda ivintu vimwi ivilinzile ukononwa, yatiyaviya nu kuyavifisa pa vintu vyao.
12 Fwandi Aina Izlaeli yatalatala yacimvyepo alwani yao. Yalutuka alwani yao pano yalinzile ukononwa. Ntalatala injepo namwe kufikila lino mulafumya ivintu ivilinzile ukononwa muli mwemwe.
13 Katuka nu kusangulula antu! Uyanene uti, ‘Muisangulule lino wanda wa mutondo utatala wafika, pano Yeova Leza wa Ina Izlaeli watalanda ati: “Mwe Ina Izlaeli imusunga ivilinzile ukononwa. Mutalatala mucimvyepo alwani inu kufika lino mulafumya ivilinzile ukononwa muli mwemwe.
14 Muce mukolongane imitundu yonsi katondo, lyene umutundu uno Yeova alasoolola ulaapalama, nupya indupwa zyonsi zya mu mutundu uwo zice zize pa nkoleelo, lyene ulupwa luno Yeova alasoolola ululapalama, nupya amu mang’anda yonsi amu lupwa lulo yace ize pa nkoleelo, lyene amu ng’anda ino Yeova alasoolola aalapalama.
15 Nupya umuntu aalazanwa ni vintu ivilinzile ukononwa muce mumoce umu moto pamwi na vyonsi vino wakwata, pano watatama upangano wakwe Yeova, nupya watacita icintu ca muzewanya umu Izlaeli.”’”
16 Fwandi uwanda uwalondelilepo Yoswa wakatwike katondotondo na Ina Izlaeli yonsi yakolongine imitundu yonsi, nupya umutundu wakwe Yuda wasoolwilwe.
17 Wanenyile indupwa zyakwe Yuda ukuti zipalame umupiipi nupya ulupwa lwakwe Zela lwasoolwilwe, lyene wanenyile ulupwa lwakwe Zela ukuti lupalame nupya Zabidi wasoolwilwe.
18 Nu mu kusyalikizya wanenyile amu ng’anda yakwe Zabidi ukuti yapalame, nupya Akani mwana Kami, mwana Zabidi umwana wakwe Zela uwa mutundu wakwe Yuda wasoolwilwe.
19 Lyene Yoswa wanenyile Akani ati: “Napaapata mwanane, cindika Yeova Leza wa Ina Izlaeli nu kumusokolwela vino watucita. Napaapata nene vino watucita utamfisa nanti acimwi.”
20 Akani wanenyile Yoswa ati: “I cisinka nene injembukila Yeova Leza wa Ina Izlaeli, nupya vino nacisile aevi:
21 Lino naweni icakuzwala icisuma sana ica ku Syinali pa vintu ivyali nu kononwa, na masyekele* 200 yakwe siuva na goldi anganyoma masyekele 50, navikumvilwe nu kuvitoola, nupya navizisile umwi tenti lyane pamwi ni mpiya.”
22 Lilyo kwene sile Yoswa watumile aakuti yakalole umwi tenti, nayo yaileko zuwa zuwa, nupya yazanyile icakuzwala ni mpiya ivyafisilwe umwi tenti.
23 Fwandi yafumizye ivintu vivyo umwi tenti nu kuvitwala ukwali Yoswa na Ina Izlaeli yonsi nupya yaavisile pa nkoleelo yakwe Yeova.
24 Lyene Yoswa na Ina Izlaeli yonsi yasenzile Akani mwana Zela, pamwi na ana yakwe aonsi na anaci, siuva, icakuzwala icisuma sana, goldi, cipambasi, punda, imfwele zyakwe, itenti na vyonsi vino wakweti, nu kuvitwala uku mukonko wa Akoli.
25 Yoswa watiile: “U mulandu ci uno watuletela intazi? Yeova amakufulula umu wanda wi lelo.” Lino walanzile vivyo, Aina Izlaeli yonsi yatamile Akani nu lupwa lwakwe na mawe, nupya yayosile yonsi umu moto, vikwene ali vino yayatamile yonsi na mawe.
26 Nupya yatuulike umutumba wa mawe ukalamba pali aliwe, uwayapo ukufika na ndakai. Lyene icipyu cakwe Yeova casizile. Ali mulandu uno incende iiya ikaamilwa ukuti umukonko wa Akoli kufika na ndakai.
Mafutunoti
^ Icikapiliula ukuti “Viwina muno yakaimba mawe.”
^ Kuli kuti uku ufumondaka.
^ Syekele wenga angalingana na magilamu 11.4. Lolini Ivyeo na Vyuze pa B14.
