Yoswa 8:1-35
8 Lyene Yeova wanenyile Yoswa ati: “Utuvwa intete nanti ukutiina. Senda aonsi yonsi aulwi nu kuya uku musumba wa Ai. Lola, impeela umwene wa Ai na antu yakwe, musumba wakwe ni mpanga yakwe umu minwe yako.
2 Ucite uku musumba wa Ai nu mwene wa uko wakwe vino wacisile uku musumba wa Yeliko nu mwene wa uko, lelo mungasenda ivintu vya mu musumba wa Ai ni viteekwa ivyayamo. Mukafisame ukunzi ya musumba.”
3 Fwandi Yoswa na onsi yonsi aulwi yaile uku kulwisya umusumba wa Ai. Yoswa wasoolwile asilika ya maka 30,000 nu kuyatuma usiku.
4 Wayanenyile ati: “Yangini mukafisame ukunzi ya musumba. Mutalizile ukuya ukutali sana nu musumba nupya mwensi muiteyanye.
5 Lelo nemo na antu yonsi tulaya tukafike uku musumba, lyene lino yaliza umu kutulwisya wakwe vino yacisile uku cisila tulutuka.
6 Lino yalatukonka tulayafumya uku musumba, pano yalalanda yati, ‘Yakuutuka wakwe vino yacisile pa kutandika.’ Naswe tulutuka ukufuma kuno yali.
7 Lyene namwe mulinzile ukukatuka ukufuma kuno mufisiime nu kupoka umusumba; Yeova Leza winu alamupeela umusumba.
8 Lino mwapoka sile umusumba mulinzile ukuoca. Mulinzile ukucita ukulingana na vino Yeova watalanda. Namunena vino mulinzile ukucita.”
9 Lyene Yoswa wayatumile, nayo yaile uku ncende ino yaali nu kufisamako; iikazile pakasi ka ncende ya Betele nu musumba wa Ai, kuli kuti uku uwondaka wa Ai, lelo Yoswa wikazile usiku onsi na antu.
10 Lyene uwanda uwalondelilepo lino Yoswa wazyusile katondotondo nu kukolonganika asilika asileko, wene na akalamba ya mu Izlaeli yayatungulwile uku Ai.
11 Aonsi yonsi aulwi aali na Yoswa yapisile nu kuyafika umupiipi nu musumba. Yapanzile inkambi uku katutu ka musumba wa Ai, nupya pakasi ka musumba wa Ai na kuno yayeliile, paali umukonko.
12 Pa nsita iiya ala watasoolola aonsi umupiipi na 5,000 nu kuyanena ukuti yakafisame pakasi ka ncende ya Betele nu musumba wa Ai, kuli kuti ku uwondaka wa musumba.
13 Fwandi antu yapangiile inkambi ikalamba uku katutu ka musumba nupya asilika yamwi yaile iyafisama uku uwondaka wa musumba, lyene Yoswa nawe wapisile usiku kwene uwa nu kuya pakasi ka mukonko.*
14 Lino umwene wa ku Ai waweni sile vivyo, wene na asilika yakwe yakatwike katondotondo nu kuya umu kukomenkanya Aina Izlaeli umu ulwi pa ncende imwi iyalozyanya nu lwanga. Lelo atamanyile ukuti kwali yamwi aafisime umupiipi nu musumba.
15 Lino aonsi ya mu Ai yazanzile Aina Izlaeli, Yoswa na Ina Izlaeli yonsi yutwike nu kulungama umu museo uwaya lwa ku lwanga.
16 Lyene antu yonsi aali umu musumba yayanenyile ukuti yakonke Aina Izlaeli; nupya lino yakonkanga Yoswa yayanga yakutaaluka uku musumba.
17 Kutaali umonsi uwasiile umu musumba wa Ai nu mu Betele, yonsi yakonsile Aina Izlaeli. Yasiile umusumba uwaula ukucingililwa.
18 Lyene Yeova wanenyile Yoswa ati: “Tambalika isumo ilili umu minwe yako ukulozya uku musumba wa Ai, pano nimapeela umusumba uu umu minwe yako.” Fwandi Yoswa watambalike isumo lyakwe ukulozya uku musumba.
19 Lino watambalike ikasa, lilyo kwene sile aafisime yakatwike zuwa zuwa nu kusimwilila uku musumba nu kuupoka. Nupya lilyo kwene sile yaosile.
20 Lino aonsi amu musumba wa Ai yapiliwike, yaweni icunsi cikusuuka umu musumba, nupya yataakweti maka ya kuutukila ukuli konsi. Lyene Aina Izlaeli autukilanga lwa ku lwanga yapiliwike nu kutandika ukuyakoma.
21 Lino Yoswa na Ina Izlaeli yonsi yaweni ukuti aafisime yapoka umusumba nu kulola ukuti cunsi cikusuuka umu musumba, yapiliwike nu kuzanza aonsi ya mu Ai.
22 Nupya Ina Izlaeli yauze aali umu musumba yatandike ukuyakomenkanya icakuti aonsi amu Ai izile iyaya pakasi ka Ina Izlaeli, nupya yatandike ukuyakoma icakuti kutaali nanti aumwi uwapuswike nanti ukuutuka.
23 Lelo yalemile umwene wa ku Ai ala umupuma nupya yamutwazile kuli Yoswa.
24 Pa cisila cakuti Aina Izlaeli yakoma antu yonsi amu Ai aayakonsile umu lwanga, yaswilile uku musumba wa Ai nu kuyakoma yonsi aasileko ukuomvya ulupanga.
25 Antu yonsi aafwile pa wanda uwa ukutandikila uku monsi kufika uku mwanaci yaali 12,000, kuli kuti antu yonsi amu musumba wa Ai.
26 Yoswa atatazile awezye ikasa lino watambalike umwali isumo kufika lino wakomile antu yonsi amu musumba wa Ai.
27 Lelo Aina Izlaeli yasenzile iviteekwa ni vintu vyonsi ivyali umu musumba, kulingana na viivi kwene vino Yeova wanenyile Yoswa.
28 Lyene Yoswa osile umusumba wa Ai nu kuusya itongwa wakwe vino waya na ndakai.
29 Yoswa wakulike umwene wa ku Ai pa cimuti ukufika manguzi, nupya lino ilanzi lyali umupiipi nu kuwa, wanenyile aakuti isye icitumbi pa cimuti. Lyene yacisumbiile pa mpongolo ya musumba nu kutuulikapo umutumba ukalamba uwa mawe uwayapo ukufika na ndakai.
30 Lilyo kwene alino Yoswa wakuuliile Yeova Leza wa Ina Izlaeli ulambo pa mwamba wa Ebali,
31 wakwe viivi kwene vino Mose umuomvi wakwe Yeova wanenyile Aina Izlaeli nupya wakwe vino calembwa umu masunde yakwe Mose ukuti: “Mupange ulambo na mawe apuma aula ukuputula.” Nupya papa kwene apano yapeelile malambo ya koca kuli Yeova na malambo ya mutende.
32 Lyene pa mawe yaya wakopolwelilepo masunde yano Mose walemvile ala na Ina Izlaeli yakulolako.
33 Aina Izlaeli yonsi, akalamba ya mu Izlaeli, intunguluzi na ya kapingula iimilile umu mbali zyonsi zya Mbokosi ya Upangano pa nkoleelo yakwe ya simapepo Aina Levi aasenzile imbokosi ya upangano yakwe Yeova. Aafumile uku mpanga zyuze nayo kwene yali pamwi na Ina Izlaeli. Afu pali yayo iimilile pa nkoleelo ya Mwamba wa Gelizimu, lyene afu yuze nayo iimilile pa nkoleelo ya Mwamba wa Ebali (wakwe viivi kwene vino Mose umuomvi wakwe Yeova wayanenyile uku cisila), pakuti Aina Izlaeli yangapaalwa.
34 Lyene pa cisila wabelengiile antu vyonsi ivyali umu masunde, mapaalo ni vitiipu kulingana na vyonsi ivyalemvilwe umwi buku lya masunde.
35 Kutaali mazwi ali yonsi yano Mose walanzile yano Yoswa atabelengiile Aina Izlaeli yonsi, ukwikako na anaci, ana na afumile uku mpanga zyuze aikalanga nayo.
Mafutunoti
^ Nanti “umu nyika.”
