Yoswa 9:1-27
9 Lino ya mwene yonsi aikalanga uku uwondaka wa Luzi Lwa Yodani yuvwile ivyacitike, aikalanga umu ncende ya myamba, mu Syefela, nu mupiipi na Yemba Mukalamba* alino nu ku Lebanoni, kuli kuti Aina Hiti, Aina Amoli, Aina Kenani, Aina Pelizi, Aina Hivi na Ina Yebusi,
2 yapangine ukuti yalwisye Yoswa na Ina Izlaeli.
3 Aina Gibyoni nayo kwene yuvwile vino Yoswa wacisile uku musumba wa Yeliko nu wa Ai.
4 Fwandi yaomvizye umucenjelo nu kwika ivyakulya umu vyola ivisile iyavikwezya na pali ya punda yao, kumwi ni nyambi zyakwe waini izya mpiti nupya izikampike;
5 yazwite indyatu izisile ni visaamu. Alino imikate yao yonsi yali iyume nupya yavungokanga.
6 Lyene yaile kuli Yoswa uku nkambi ku Giligali nupya yamunenyile ala ali na onsi Aina Izlaeli iyati: “Twafuma uku mpanga ya kutali. Pangana upangano naswe.”
7 Lelo aonsi amu Izlaeli yanenyile Aina Hivi iyati: “Limwi mukaikala sile umupiipi. Tungapangana uli upangano namwe?”
8 Aina Gibyoni yanenyile Yoswa iyati: “Sweswe yaomvi yako.”
Nawe wayuzizye ati: “Mwemwe yaweni nupya aekwi kuno mufumile?”
9 Nayo yamwaswike iyati: “Swe yaomvi yako tufumile uku mpanga iya kutali sana pa mulandu ni zina lyakwe Yeova Leza wako, pano tuvwa pa lulumbi lwakwe na pali vyonsi vino wacisile umu Ijipti
10 na vyonsi vino wacisile kuli ya mwene yaili aa Ina Amoli aali uku lusansa luze* ulwa Luzi Lwa Yodani, kuli kuti Umwene Sihoni uwa ku Hesyiboni, nu Mwene Ogi uwa ku Basyani uwali uku Asyiteloti.
11 Fwandi intunguluzi zitu na antu yonsi amu mpanga itu yatunenyile iyati: ‘Sendini vyakulya vya pa lwendo nu kuyayakomenkanya, muce muyanene muti: “Tulaya aomvi inu; acino pangini upangano naswe.”’
12 Mukate uu wali ukaye lino twausenzile ukufuma pa mang’anda itu ukwiza kuli mwemwe. Nomba lyene lolini, uume nupya ukuvungoka.
13 Nupya inyambi zii zyali izipuma lino twazuuzizyemo waini nomba lyene zyalepuka. Ni vyakuzwala vitu ni ndyatu vyasila pa mulandu nu kutalimpisya kwa lwendo.”
14 Lyene aonsi Aina Izlaeli yaceecesile ivyakulya vyao vimwi, lelo yatuuzizye kuli Yeova.
15 Fwandi Yoswa wapanzile umutende nayo nupya wapangine upangano nayo uwa kuleka ukuti yaye nu umi, nupya avino intunguluzi zya Ina Izlaeli zyalafile umulapo kuli aliyo.
16 Pa cisila ca manda yatatu, ala iyapangana nayo upangano, yuvwile ukuti yakaikala umupiipi nayo, aainamupalamano.
17 Lyene Aina Izlaeli yakatwike nu kuyafika uku misumba ya Ina Gibyoni pa wanda wakwe citatu; misumba yao yaali a Gibyoni, Kefila, Beeloti, na Kilyati-yealimu.
18 Lelo Aina Izlaeli yatayazanzile, pano walanga intunguluzi zya Ina Izlaeli zyalapa kuli aliyo umwi zina lyakwe Yeova Leza wa Ina Izlaeli. Fwandi Aina Izlaeli yonsi yatandike ukuilizyanya pa mulandu na vino intunguluzi zyao zyacisile.
19 Lyene intunguluzi zyonsi zyanenyile antu iziti: “Pa mulandu wakuti twalafile kuli aliyo umwi zina lyakwe Yeova Leza wa Ina Izlaeli, tutalinzile ukucita iciipe kuli aliyo.
20 Vino tumacita aevi: Tumayaleka yaye nu umi, pakuti ukali wakwe Leza utiza pali sweswe pa mulandu wa mulapo uno twalafile kuli aliyo.”
21 Intunguluzi zya Ina Izlaeli zyalanzile nu kuti: “Yalekini yaye nu umi, lelo lekini yatiyila Ina Izlaeli yonsi inkwi nu kuyatapila manzi.” Vikwene avino intunguluzi zyayalavile.
22 Lyene Yoswa wayamile nu kuyuzya ati: “U mulandu ci uno mwatubepiile nu kulanda ukuti mufumile uku mpanga ya kutali sana, lino mukaikala sile umupiipi?
23 Kufuma ilelo mwatiipwa nupya mwakulaomba umulimo wa uzya uwa kutiya inkwi nu kutapa manzi pa ng’anda yakwe Leza wane.”
24 Nayo yanenyile Yoswa iyati: “Tuvwa ukuti Yeova Leza wako wanenyile Mose umuomvi wakwe ukumupeela impanga yonsi nu kukoma antu yonsi amu mpanga yii. Fwandi twatiinyile ukuti mumatukoma, ali cino twacitiile vivyo.
25 Nomba lyene tuli mu minwe yako. Cita kuli sweswe cino ukwelenganya ukuti cili ningo nupya icisuma.”
26 Nupya vikwene avino wacisile kuli aliyo; wayapuswisye uku Ina Izlaeli nayo yatayakomile.
27 Lelo uwanda uwa, Yoswa walesile yatiyila Ina Izlaeli inkwi nu kuyatapila manzi, nupya yatiyanga inkwi nu kutapa manzi ya kuomvya pa ulambo wakwe Yeova pa ncende ino wasoolola, nupya vivyo kwene avino yakacita ukufika na ndakai.
