Baibo wa muzilo wino Leza watulembela, amuno akalandila naswe swensi. Tulinzile ukuibelenga pakuti tumanye uwailemvile. (Yoani 17:3; 2 Timoti 3:16) Muli Baibo amuno Yeova Leza wasokolola vino akalonda ukucitila antu na vino alacita uku nsi ino yakaikalamo.​—Utandiko 3:15; Kusokolola 21:3, 4.

Kutaya ibuku lyuze ilikalenga antu ukusenuka wakwe Baibo. Baibo ikatwazwa ukulakolanya imiyele yakwe Yeova wakwe, ukutemwa, uluse ni icikuuku. Ikalenga antu ukuya nu upaalilo nu kuyazwa ukuzizimizya nanti sile a macuzi aipisye. Nupya ikasokolola imiyele ya mu nsi isiuvwana nu kulonda kwakwe Leza ukumalilike.​—Masamu 119:105; Aebele 4:12; 1 Yoani 2:15-17.

Pa kutandika Baibo yalemvilwe umu Ciebele, Icialamaiki, ni Cigiliki, yasenulwa yonsi nanti iciputulwa umu ndimi ukucila 3,000. Aali buku ilyasenulwa sana nupya lino antu aingi yakwata. Vikwene avino tufwile ukwenekela. Usesemo wa mu Baibo ukalanda ukuti: “Ni lyasi lisuma lii ilya Wene [ilyasi licindame sana ilyaya muli Baibo] lilasimikilwa umu nsi yonsi ukuya unte ku yantu amu nko zyonsi, lyene alino impela iliza.”​—Mateo 24:14.

Pa mulandu wa kuti twamanya ucindami wa vyeo ivyaya muli Baibo, twisileko sana mano pa kupituluka umu vyeo ivyayamo. Twasininkizye ukuti ivyeo vyasenulwa wakwe viivi kwene vino vyali. Baibo yii yasenulwa ukufuma kuli Baibo Uwa Malembo ya Nsi Ipya iyafumile ukucila pa myaka 60 iyapita. Lelo ululimi lwa Cizungu lwasenuka pa myaka 50 iyapita. Kusenuka kuu kwalenzile kuti aaya muli komiti Yakwe Baibo wa Nsi Ipya ukutandika ukupituluka muli Baibo wiyo. Cino twalondanga u kukwata Baibo umwaya ivyeo vya cumi, isenulwe ningo nupya iyangupale pa kubelenga. Vipande ivili umu Vyeo na Vyuze ivikuti “Vya kulondela pa kusenula Baibo,” Ivyaya muli Baibo yii iya Nsi Ipya, ni cikuti “Vino cali pakuti tukwate Baibo” vyalandapo mumwi muno Baibo yii yazifiwe.

Antu aatemwa Yeova Leza nupya aakamupepa, yakalonda Izwi Lyakwe Leza ilyasenulwa ningo nupya ilyangupale ukuvwa. (1 Timoti 2:4) Uli mulandu uno Baibo yii yapitulwikwemo umu Cizungu pakuti ice isenulwe umu ndimi izingi. Itutaila nupya tukupepa ukuti mwe yano mukubelenga mulazana ukuti Baibo yii iya Malembo ya muzilo ilamwazwa lino mukwezya ‘ukulonda Leza. . .nu kumuzana.’​—Milimo 17:27.