Yesu wanenyile alondezi yakwe ukuya mu kupanga asambi. (Mate. 28:19) Mu mulimo uu mwaya kusimikila alino nu kusambilizya. Nga papita insita cingazipa twayuzya sweineco ukuti, ‘Ningacita uli pakuti naomba ningo mu mulimo uu ucindame?’

Kuluta sile ukulalolela antu ize pakuti tuyasimikile, tulinzile ukuya acincile ukulonda angatemwa ukuvwa. (Mate. 10:11) Ndi cakuti tukuombako mulimo wa kusimikila, cilalenga twakwata insita ya kulanda na antu aingi yano tukazanwa nayo insita izingi. (Mili. 17:17) Lidya wizile aya musambi wakwe Yesu pa mulandu nu mute wa kusimikila uno Paulo wakweti.—Mili. 16:13-15.

TAMBINI VIDYO YAKUTI TWALILILINI UKUSIMIKILA UKWAULA KUTOOVOKA—KONSI KUNO MWAZANA ANTU NU KU NG’ANDA NI NG’ANDA, LYENE MWASUKE MAUZYO ALONDELELAPO:

• Uzye Samuel walangilile uli ukuti walondesyanga ukuta imbezu zya cumi muli vino wacitanga?

• U mulandu ci uno tulinzile ukutwalilila ukwezya inzila zyonsi izya misimikilile?

• Uzye a kuli yaweni kuno mungasimikila ilandwe lya Wene pa nsita ino mukuomba imilimo yapa lwinu?

Pakuti tupange asambi, tufwile ukucita na vyuze kwene ukuluta sile pa kusiila antu lupapulo. Pakuti tuyazwe, tulinzile ukuswililako nu kutandika kutungulula masambililo. (1 Kol. 3:6-9) Nga ndi cakuti tukwezya na maka ukusambilizya umwi icumi nomba asikulunduluka? (Mate. 13:19-22) Tulinzile ukutwalilila kulonda yayo akwata umwenzo uwaya wa “musili uvunde.”—Mate. 13:23; Mili. 13:48, NWT.

TAMBINI VIDYO YAKUTI TWALILILINI UKUSIMIKILA UKWAULA KUTOOVOKA—KUKAZANWA ANTU AINGI NU KUPANGA ASAMBI, LYENE MWASUKE MAUZYO ALONDELELAPO:

• Uzye ya Solomon na ya Mary yakontelile uli imbezu zya cumi mu mwenzo wakwe ya Ezekiel na ya Abigail?

• Uyo ci uno tufwile kukwata lino tukuomvya inzila zipusane pusane izya misimikilile?

• U mulandu ci uno tulinzile ukwikila sana mano ku kusambilizya yauze icumi?