Yesu wasambilizye ukuti: “Mwapeelwa amaka yakucita vii uwila, caleka namwe kwene kacitilini antu uwila.” (Mate. 10:8) Tukalondela amazwi kwene yaa yano Yesu walanzile, ndi cakuti tusikulipilisya antu lino twayapeela Baibo nanti ulupapulo ulukalanda pali Baibo. (2 Kol. 2:17) Lelo, umu mpapulo zii mwaya icumi cicindame icaya Umwi Zwi Lyakwe Leza. Kukaya ukuombesya sana alino nu kusumbapo impiya izingi pakuti impapulo zipulintwe nu kutumwa umu vilongano ivyaya umu nsi yonsi. Ali cino fwandi tulinzile ukupoka sile impapulo zino tukulondekwa.

Mwailuka lino mukupeela antu impapulo, nanti sile alino mukusimikila umu vifulo umukazanwa antu aingi. (Mate. 7:6) Fwandi ukucila ukupeela sile impapulo antu akupita, cingazipa ukulanda nayo pakuti mumanye ndi cakuti yakulondesya ukusambilila. Uzye pa mauzyo aali umu kambokosi, pali iuzyo limwi lino mungaasuka muti ee? Nga mutanga mumanye ndi cakuti umuntu akulondesya ukusambilila, cingazipa sile ukumupeela kapepala ki landwe. Lelo ndi cakuti walenga ukuti tumupeele magazini nanti ulupapulo ululi lonsi, tungamupeela.—Mapi. 3:27, 28.