CINO CACINDAMILA: Ndi cakuti “amapange amu mwenzo wa muntu yakoline wi tenga,” ale mauzyo yano tukuuzya yalinzile ukuya wa mbeketi iyakutapwila mwenemo. (Mapi. 20:5) Mauzyo yakalenga itutandika ukulanzyanya. Ukuuzya mauzyo asuma kungalenga na masuko kwene iyaya acindame sana. Yesu waomvyanga ningo sana mauzyo. Uzye tungamukolanya uli?

VYAKUCITA:

• Mauzyo angalenga umwi ukwelenganyapo. Yesu uzyanga mauzyo alenganga asambi yakwe ukuilandila vino yakwelenganya. (Mate. 16:13-16; be 238 mapa. 3-5) A mauzyo ci yano munguuzya angazwa wino mukuzya ukwelenganyapo?

• Mauzyo angalenga umwi amanye icikulandwapo. Pakuti Yesu alungike Petulo, wamuzizye mauzyo nu kumupeela masuko ali nu kumwazwa ukumanya icisinka cino walandangapo. (Mate. 17:24-26) A mauzyo ci yano munguzya angalenga wino mukuzya ukumanya vino mukulandapo?

• Mwataizya ya kakutika. Lino Yesu waweni kalemba “wasuka ningo” wamutaizye. (Mako 12:34) Uzye mungataizya uli umuntu lino wasuka ningo ukulingana ni uzyo lino mumuzizye?

TAMBINI CIPUTULWA 1 CAKWE VIDYO IKUTI MWAOMBA UMULIMO UNO YESU WAOMVILEKO—KUSAMBILIZYA, ALINO MWASUKE MAUZYO ALONDELILEPO:

• U mulandu ci uno imisambilizizye ili muli vidyo ii, itayeelile ningo nanti icakuti ivyeo vilimo ivisuma?

• U mulandu ci uno tutalinzile sile ukulalondolola ivyeo lino tukulanzyanya?

TAMBINI CIPUTULWA 2 CAKWE VIDYO ALINO MWASUKE MAUZYO ALONDELILEPO:

• Uzye umwina ali waomvya uli ningo mauzyo?

• I nzila ci na zyuze izya misambilizizye yakwe Yesu ino tungakolanya?