Yeova akalola milapo ino antu yakalapa pa kutwalana ukuti yacindama sana. Walanzile ukuti iya nu muci yalinzile ukutwalilila ukuya pamwi. (Mate. 19:5, 6) Kwaya antu yakwe Leza aingi aya ni nsansa mu vyupo vyao. Nanti ciye vivyo, kutaya icupo cimalilike, mu vyupo vyonsi mukaya intazi. Tutalinzile ukwelenganya wakwe vino amu nsi yakaelenganya ukuti kupalukana nu kutana ivingazwa atwalane ukumala intazi. Uzye Aina Klistu atwalane yangacingilila uli icupo cao?

Lolini ivintu vicindame 5 vino yalinzile ukucita.

1. Mwacingilila imyenzo inu ku vintu ivili wakwe, kulanga icintemwa uku yantu yano mutatwalana nayo, ni vyakuizanzya ivitaya ningo ivingalenga mu cupo cinu muye intazi.—Mate. 5:28; 2 Pet. 2:14.

2. Mwakomya ucuza winu na Leza nupya mwalondesya ukumuzanzya mu cupo cinu.—Masa. 97:10.

3. Mwatwalilila ukuzwala untu upya nupya mwalanga icikuuku nu mu tuntu tunono pano tungalenga ya winu ukuya ni nsansa.—Kolo. 3:8-10, 12- 14.

4. Lino mukulanzyanya, mwaya nu mucinzi nupya mwalanzyanya ningo.—Kolo. 4:6.

5. Mwalanga ukutemwa kuli ya winu kulozya ukukulonda kwa mwili kwa kupanga icupo.—1 Kol. 7:3, 4; 10:24.

Ndi cakuti Aina Klistu yakucindika icupo ala yakucindika katandika wa cupo, Yeova.

TAMBINI VIDYO YAKUTI: TULINZILE ‘KUSIMULA NU MUKOZYA’​—KULONDELA MASUNDE, ALINO MWASUKE MAUZYO ALONDELELAPO:

• Nanti icakuti pa kutandika vintu vingaloleka kwati vili ningo mu cupo, i ntazi ci izingiza pa cisila?

• Uzye visinte ivya muli Baibo vingazwa uli atwalana akayuvwa ukuti mu cupo cao mutaya ukutemwa?

• A masunde ci yano Yeova wikako akalanda pa cupo?

• I vyani vino atwalane yalinzile ukucita pakuti mu cupo cao mwaya insansa?