Tukaikala umu nsi muno antu yakalola ivisuma kwati iviipe ni viipe navyo kwati ivisuma. (Eza. 5:20) Icaulanda icakuti, antu yamwi yakacita ivintu vino Yeova wapata ukwikako sile nu kulaalana kwa yonsi yatupu nanti anaci yatupu. Ivyuza vya pa sukulu nanti antu yauze yangapatikizya acance ukulacita iviipe vino yene yakacita. Uzye mungazwa uli ana inu ukucimvya amezyo wakwe yaa alino na yauze akolineko?

Mwasambilizya ningo ana inu amasunde yakwe Yeova. (Levi 18:3) Mwateekela lino mukusambilizya ana inu vino Baibo ikalanda pa kupanga icupo, nupya mwayasambilizya ukulingana nu musinku. (Mala. 6:7) Yuzyini mweineco muti: ‘Uzye nasambilizya ana yane inzila isuma iyakulangilamo ukutemwa, umulandu uno cacindamila ukuzwala ningo, nu mulandu uno cacindamila ukuti antu yauze yayacindika? Uzye ana yane yamanya vino yangacita ndi cakuti umwi akuyalanga ivikope vya uzelele nanti akuyanena ukucita ivintu iviipe vino Leza wapata?’ Ndi cakuti mwasambilizizya limwi ana inu cingayazwa ukucimvya intazi zii. (Mapi.27:12; Kasa. 7:12) Ndi cakuti mukusambilizya ana inu, ala mukulanga ukuti mwatemwa uwiila uwafuma kuli Yeova.—Masa. 127:3.

TAMBINI VIDYO YAKUTI: “MWAKUULA ING’ANDA IKOME—MWACINGILILA ANA INU “UKU VIIPE,” ALINO MWASUKE MAUZYO ALONDELELAPO:

• U mulandu ci uno avyazi yamwi yakatiinila ukusambilizya ana yao apa kupanga icupo?

• U mulandu ci uno avyazi yalinzile ukusambilizya ana yao ukulingana nu ‘kusunda’ alino nu kusalapula kwakwe Yeova?—Efeso 6:4

• I vyani vino iuvi lyakwe Yeova likako ivikaazwa avyazi ukusambilizya ana yao apa kupanga icupo?—w19.05 ifwa 12, kambokosi

• U mulandu ci uno mulinzile ukulalanzyanyizizya na ana inu cila nsita lino yatatala yaponelwa ni intazi iziipisye?