Ucilo uno Yesu wazevizye apa muku wa kusyalikizyako wali ucindame sana. Pa mulandu wakuti wali umupipi nu kufwa, wapekinye ukulya icakulya ica Ucilo pamwi na atumwa yakwe. Nupya wayalangilile na vino yali nu kulazevya ukuzevya ukupya kulikuti Icakulya Icamanguzi Ica Mwene. Fwandi watumile Petulo na Yoane ukuyapekanya umuputule umwa kuzevezya. (Luka 22:7-13; lolini cikope icili pa nkupo.) Cii cikutwiusyako ukuti tulinzile ukuipekanya ukuti tukazanweko uku Ciusyo icilayako pa 27 Maaci. Aa mu vilongano limwi yaapekanya kalanda wi lyasi, vinkolanya, alino na vyuze. Nomba, i vyani vino swensi wenga na wenga tungacita pakuti tuipekanye ukuzanwa uku Ciusyo?

Mwataizya sana pa mfwa yakwe Yesu. Mwabelenga nu kwelenganya sana pa malembelo ya Ciusyo. Mungazana utantiko mu kabuku kakuti Mwasambilila Malembelo Cila Wanda. Kabuku Kakutwazwa Ukusambilila Pali Leza kakwata utantiko uwalondololwa sana. (Lolini na kabuku kakuti Swe Ina Klistu nu Mulimo Witu aka mu Epuleo 2020.) Aamu ndupwa yangazana ivyeo ivyakuomvya pa kupepa kwa lupwa ivikalondolola vino ukukululwa kwacindama umwi Buku Ilyakwazwa Inte Zyakwe Yeova Ukulondelezya Ivyeo nanti Ibuku Lya Kwazwa Ukulondelezya Ivyeo.

Mwaama na yauze kuti yakazanweko. Mwaombesya muli kampeni yakwama antu ku Ciusyo. Mwaelenganya pali yano mungama wakwe, yano mwasimikileko, yano mwasambililanga nayo Baibo, ivyuza, alino na yalupwa. Ya eluda yalinzile ukusininkizya ukuti yama ya kasimikila atonte. Mwaiusya ukuti ndi cakuti umuntu asiikala uku cifulo cinu, mungalondelezya insita ni cifulo kuno yalazevezya Iciusyo kuko kwene kuno akaikala ndi cakuti mwayula apakuti PALI SWESWE apa webusaiti itu iya jw.org alino mutinike apakuti “Ciusyo.”

I vyani vyuze vino tulinzile ukucita pakuti tuipekanye?