Ndakai mazanzo akuiponela yakuya yakuvulilako sile. Nga kwacitika uzanzo, cikalondekwa ukuombela pamwi nu kupekanya ningo ivikulondekwa pa kwazwa aali umu uzanzo. Pa kuti vii vicitike, Iumba Ilikatungulula lyapekanya ukuti muli cila musambo muye Dipatimenti Iikaangalila Atiyaponelwa nu Uzanzo.

Ndi cakuti aina aaya umu madipatimenti yaa yamanya ukuti kwatikucitika uzanzo, papo kwene sile yakatumila ya eluda aa ku ncende ukwatikucitika uzanzo pakuti yamanye uwazwilizyo uno ya kasimikila yakulondekwa. Ndi cakuti vintu ivyononeka sana icakuti ya kasimikila yatanga yakwanisye ukuombelapo aineco, aa ku musambo yakasonta aina atiyalinga ukwangalila umulimo uwakwazwilizya ukwatikucitika uzanzo. Aina yaa limwi yangaleengako aina na ya nkazi yamwi aakuyaazwilizya nanti ukuleenga umu kulungatika ivintu ivikulondekwa, nanti limwi yangakala ivintu ivikulondekwa iviyeliile umupiipi.

Mwaya ivisuma ivingi sana umu kucita vii. Cikaazwilizya ukukanaswilila umuli mumwi, kukanaya ni cimvulunganya, nu kukanaonona imisangulo ni vintu vyuze, ivingacitika ndi cakuti aina yaicitila ivintu pa lwao.

Aina yano aa ku musambo yasonta yangalola uwingi wa mpiya izikulondekwa alino na ina aakulondekwa pa kwazwilizyako lino kwacitika uzanzo. Nupya aina yaa yangalanzyanya na aa mu uteeko aangatwazwa ukuomba zuwa umulimo uu. Fwandi kusi aliwensi alinzile ukuitandikila ukusanguzya impiya, ukutuma ivintu ivingalondekwa ukwatikucitika uzanzo, nanti ukuyako ndi cakuti umuntu wiyo yatamunenyile ukucita vivyo.

Nomba nanti ciye vivyo, nga kwacitika uzanzo tukalonda ukwazwilizyako. (Aeb. 13:16) Twatemwa aina itu! Nomba i vyani vino tungacita pa kuyazwa? Cicindamisye cino tungacita, u kupepelako aina aatiyaponelwa nu uzanzo alino na yayo aakuyazwilizya. Nupya tungasangwilako nu musangulo uwa mu nsi yonsi. Ukulingana nu utunguluzi ukufuma ukwi Umba Ilikatungulula, aa ku misambo angamanya ningo kuno imisangulo yii ingalondekwa sana. Nupya ndi cakuti tungatemwa ukuyaazwilizyako, tungalemba Fomu ya Kuuzizyapo Umulimo wa Kuitemelwa mu LDC (ino yakati DC-50).

TAMBINI VIDYO IYAKUTI MULAMBA UMWIPISYE WACITIKA UMU BRAZIL, ALINO MWASUKE IUZYO ILYALONDELELAPO:

I vyani vino mwatemwapo pali vino Ya Nte Yakwe Yeova yazwilizyeko lino kwacitiike mulamba mu Brazil umu 2020?