Vino Yesu wali umumalilike, atakwatanga intazi izingi na masakamika wakwe vino antu yauze yakwatanga. Lelo wali sana ni cikuuku ku yantu. Waitemelwanga ukuyazwa, kuli kuti ukuyacita ivintu ukucila na pali vino vyalondekwanga. Icikuuku calenganga ukuti aazwa yauze. Lolini vimwi vino wacisile ivya umu Vipande 32, 37, 57, 99.

Antu amisinku yonsi, kuli kuti ance na ikolo yayanga kuli Yesu pa mulandu wakuti atalolekanga ukuti umupamviwe sana nanti ukuilola ukuti wacindime sana ukucila yauze. Vino antu yailolelanga ukuti Yesu wayasumbako sana mano, yuvwanga ningo ukuya pamwi nawe. Pakuti mumanye vivyo, lolini Vipande 25, 27, 95.

Yesu lyonsi wali nu mute wa kupepa kuli Isi, lino ali wenga na lino ali na ya kapepa ya cumi. Wapepanga pa nsita izingi asi sile pa nsita ya vyakulya. Wapepanga kuli Isi pakuti amutaizye, na pakuti amulumbanye, nu kumanya ivya kucita lino atatala wapingula pali vimwi ivicindame sana. Lolini vimwi ivikazanwa umu Vipande 24, 34, 91, 122, 123.

Pa nsita zimwi lino walondekwanga ukupuuza alino nu kuya wenga, Yesu nalyo kwene atakolezyanga vino akulonda pakuti aazwilizye yauze. Aatikanga sile mano kuli vino akulonda. Fwandi watusilile icilangililo pakuti twamukolanya sana. Sambililini pali vivyo umu Vipande 19, 41, 52.

Yesu atasambilizyanga sile pali vino cacindama ukwelela, lelo walangilile vino cikapiliula ukwelela muli vino wacitilanga asambi yakwe na antu yauze. Elenganyini pali vimwi ivyaya umu Vipande 26, 40, 64, 85, 131.

Usesemo walanzile ukuti Ayuda aingi yaali nu kukana Mesiya nupya alwani yakwe yaali nu kumukoma. Fwandi limwi Yesu nga atacisile ivintu vyonsi vino wacitiile antu. Lelo wali umucincile pa kutungilila ukupepa kwa cumi. Vino wacisile vyalangilile alondezi yakwe yonsi yano antu yakalola ukuti yasuulwa nanti yano yakakaanya ukuti yalinzile ukuya acincile. Lolini Vipande 16, 72, 103.

Yesu wali umumalilike ukucila antu yonsi umu nzila izingi, wene wamanyile ivingi nupya wali sana na mano. Vino wali umumalilike, ukwaula nu kutwisika wakweti umi usuma na melenganyo ukucila antu yonsi. Lelo waicefizye pakuti aombela yauze. Mungasambilila pali vivyo umu Vipande 10, 62, 66, 94, 116.

Lyonsi Yesu watekanyizizyanga atumwa yakwe na antu yauze lino yafilwa ukumukolanya nu kucita vino wayanena. Wayasambilizyanga imiku iingi ivyeo vino yalondekwanga ukumanya pakuti yangapalama sana kuli Yeova. Lolini vino Yesu wateekanga umwenzo umu Vipande 74, 98, 118, 135.