CIPANDE 37

Uzye ndinzile ukubatiziwa?

conga pali cila cisinka pano ukulola ukuti ali casuko:

Umwina Klistu wensi alinzile ukubatiziwa.

□ Icisinka

□ Ufi

Umulandu ukalamba uno umuntu alinzile ukubatiziwilwa uwakuti, cilamucingilila uku kucita uluyembu.

□ Icisinka

□ Ufi

Ukubatiziwa kungalenga ukwate isyuko lya kuca pusuka.

□ Icisinka

□ Ufi

Ndi cakuti utabatiziwe Leza atalakupingula pa viipe vino ukacita.

□ Icisinka

□ Ufi

Ndi cakuti auzo iyalinga ukubatiziwa ale nawe kwene watulinga.

□ Icisinka

□ Ufi

NDI cakuti ukauvwila masunde yakwe Leza, nupya watandika ukuya cuza wakwe, alino ukanenako na yauze pali vino wazumilamo, ale ulinzile ukulaelenganya pa kubatiziwa. Nomba ungamanya uli ukuti watulinga ukubatiziwa? Pakuti wasuke iuzyo lii leka tulanzyanye pa masuko aali papela.

 ● Umwina Klistu wensi alinzile ukubatiziwa.

Icisinka. Yesu wanenyile asambi yakwe ukuti yalinzile ukubatiziwa. (Mateo 28:19, 20) Alino na Yesu kwene wabatiziwe. Pakuti ukolanye Klistu, ulinzile ukubatiziwa ndi cakuti watulinga nupya ukulondesya ukucita vivyo ukufuma pansi ya mwenzo.

● Umulandu ukalamba uno umuntu alinzile ukubatiziwilwa uwakuti, cilamucingilila uku kucita uluyembu.

Ufi. Ulubatizyo lukalangilila apaswe ukuti umuntu waipeela kuli Yeova. Ukuipeela kutanga kulenge umuntu ukuta ukucita ivintu vino wacitanga umu nkama. Lelo, ukuipeela kuli Yeova cikalangilila ukuti akulonda ukulalondela masunde yakwe umu umi.

● Ukubatiziwa kungalenga ukwate isyuko lya kuca pusuka.

Icisinka. Baibo ikalondolola ukuti ukubatiziwa kwaya pa vintu ivicindame ivilatwazwa ukupusuka. (1 Petulo 3:21) Nomba cii cisikupiliula ukuti nga wabatiziwa sile ale casila ulapusuka. Umuntu akabatiziwa pa mulandu wakuti watemwa Yeova nupya akulondesya ukulamuombela nu mwenzo onsi.—Mako 12:29, 30.

● Ndi cakuti utabatiziwe Leza atalakupingula pa viipe vino ukacita.

Ufi. Pali Yakobo 4:17 pakalanda ukuti: “Ndi cakuti umwi wamanya ivya kucita icisuma nomba asikucita, ala akuyembuka” nanti cakuti wabatiziwa nanti atabatiziwa. Fwandi ndi cakuti wamanya ukusoolola icisuma ni ciipe nupya ukaipingwila ivya kucita umu umi, ikwene ili insita iyakuti ulanzyanye na avyazi yako nanti Umwina Klistu umwi uwataombela Leza pa myaka iingi. Nga wacita vivyo, ulamanya ivya kucita pakuti ulinge ukubatiziwa.

● Ndi cakuti auzo iyalinga ukubatiziwa ale nawe kwene watulinga.

Ufi. Umuntu alinzile ukuisoolwela ukubatiziwa ukufuma pansi ya mwenzo. (Masamu 110:3) Ulinzile ukusoololapo ukubatiziwa ndi cakuti wamanya vino ya Nte Yakwe Yeova yalinzile ukulacita nupya watusinkizya ukuti ungakwanisya ukucita vivyo.—Kasambilizya 5:4, 5.

Kubatiziwa Kukalenga Uumi wa Muntu Ukusenuka

Umuntu nga wabatiziwa cikalenga aapokelela mapaalo aingi. Lelo pa nsita ili imwi kwene, umuntu wiyo akakwata umulimo ukalamba uwa kutwalilila ukucita ivintu ukulingana na vino waipeela kuli Yeova.

Uzye lyene watulinga ukuipeela? Nga avino cili, icintu cico cilinzile ukukulenga ukuya ni nsansa. Pano ukucita vivyo kulalenga ukakwate isyuko ilicindamaisye ilya kuombela Yeova nu mwenzo onsi alino nu kulalangilila ukuti waipeela kuli aliwe umu cumi.—Mateo 22:36, 37.

MU CIPANDE ICILONDELILEPO

Ulasambilila ivya kwimika mauyo angakwazwa ukulacita ivintu ivicindame umu umi.

ILEMBO

“Peelini imili inu wi lambo ilipuma, ilya muzilo nupya lino Leza angapokelela, kuli kuti ukuombela Leza ukulingana na maka inu aakwelenganya.”—Loma 12:1.

VINO MUNGACITA

Avyazi yako yangakwavwa ukuzana umwi umu cilongano angakwavwa ukulunduluka muli vyakwe Leza.

—Milimo 16:1-3.

UZYE MWAMANYAPO ULI . . .

Kubatiziwa “icimanyililo” icilalenga ukuti mukapusuke.—Ezekelo 9:4-6.

 vino nkulonda ukucita!

Pakuti ndiinge ukubatiziwa, nakulaisambilizya sana Baibo pakuti nuvwikisye vino Baibo ikasambilizya pa vintu vii: ․․․․․

Vino nkulonda avyazi yane yakangazwe ukuvwikisya api lyasi lii

 UZYE MUKWELENGANYAPO ULI?

● U mulandu ci uno ulubatizyo lwacindamila?

● I vyani vingalenga uwacance aalonda ukubatiziwa lino atatala walinga?

● I vyani vingalenga ukuti uwacance asitooka ukuipeela alino nu kubatiziwa?

[Amazwi umu vilembo vikulu pifwa 306]

Holly walanzile ukuti: “Ukubatiziwa kwangazwa ukulapingula ningo pa vintu alino nu kukanacitako ivintu ivingalenga njiletele intazi.’’

 [Kambokosi/​Cikope pifwa 307]

Mauzyo yano yakauzya sana pa lubatizyo

Uzye lubatizyo lukapiliula cani? Ukutuwika umwili umu manzi nu kuufumya cikapiliula ukuti imiyele iipe ino umuntu wakweti mpiti yatifwa, lelo watatandika ukucita ukulonda kwakwe Yeova umu umi wakwe.

Uzye cikapiliula cani ukuipeela kuli Yeova? Cikapiliula ukuti umuntu wataikana nu kulaya ukuti amakolezyanga ukulonda kwakwe Leza umu umi wakwe. (Mateo 16:24) Nupya ukuipeela cikapiliula ukulanda na Yeova umwi pepo lino umuntu atatala wabatiziwa.

Uzye ulinzile ukuya ni miyeele ci lino utali ubatiziwe? Ulinzile ukulacita vino Baibo ikalanda alino nu kulanenako yauze pali vino wazumilamo. Ulinzile ukulakomya ucuza wako na Leza ukupitila umu kupepa kuli aliwe alino nu kulabelenga Izwi lyakwe. Ulinzile ukulaombela Yeova pa mulandu wakuti wewe wasoololapo ukucita vivyo asi pa mulandu wakuti yauze yakukupatikizya.

Uzye kwaya umusinku uno ulinzile ukubatiziwilwapo? Umusinku asi ukalangilila ndi cakuti umuntu watalinga ukubatiziwa nanti foo. Lelo nanti ciye vivyo ulinzile ukumanya ukupusanya icisuma ni ciipe alino nu kumanya vino ukuipeela kukapiliula.

Uzye ulinzile ukucita uli ndi cakuti ukulonda ukubatiziwa alino avyazi yakunena ukuti utale uloleeleko? Limwi yangatemwa ukuti utale umanye ningo vino Aina Klistu yalinzile ukulacita. Ulinzile ukupokelela ukwazwa kwao, nu kuomvya insita ii ku kukomya ucuza wako na Yeova.—1 Samueli 2:26.

 [Kambokosi pifwa 308, 309]

Uzye ukwelenganya pa kubatiziwa?

Lemba amasuko uku mauzyo ni visinka ivili apisika pakuti ulole ndi cakuti ukulunduluka nanti foo. Lino ucili ukulemba icasuko, watala ubelenga ilembo ilili api iuzyo nanti pa cisinka cico.

Iinzila ci zino ukalangilamo ukuti wataila sana Yeova?—Masamu 71:5. ․․․․․

Uzye ukalangilila uli ukuti wasambiliziwa ivya kupusanya icisuma ni ciipe?—Aebele 5:14. ․․․․․

Uzye ukapepa imiku iingi? ․․․․․

Uzye ukapepa mapepo amukulungatika, nupya uzye vino ukapepa vikalangilila ukuti watemwa Yeova?—Masamu 17:6. ․․․․․

Tantika vino ukulonda ukuti uwapepelapo. ․․․․․

Uzye ukaisambilizya Baibo lyonsi? —Yoswa 1:8. ․․․․․

I vyani vino ukasambililapo nga ukuisambilizya Baibo? ․․․․․

Lemba vino ukulonda uce usambililepo lino ulaisambilizya Baibo. ․․․․․

Uzye ukaomba ningo umulimo uwa kusimikila? (Wakwe: Uzye ukasambilizyako yauze amasambililo ya kutandikilapo? Uzye ukaswilila kuli yano wasimikilepo alondesyanga ukuvwa? Uzye ukuombesya pakuti uwatungulula isambililo lya Baibo?)

□ Ee □ Awe

Uzye ukaomba umulimo uwa kusimikila nanti cakuti usi na avyazi yako?—Milimo 5:42.

□ Ee □ Awe

Lemba vino ukulonda ukacite umu mulimo uwa kusimikila.—2 Timoti 2:15.

Uzye ukazanwa lyonsi uku kulongana?—Aebele 10:25.

Uzye ukalandapo lino uli apa kulongana?

Uzye ukaya umu kulongana nanti cakuti avyazi yako yasikuyako (lelo iyakuzumilizya ukuti uyeko)?

□ Ee □ Awe

Uzye ungalanda ukuti ukaipakizya ukucita ukulonda kwakwe Leza? —Masamu 40:8.

□ Ee □ Awe

Uzye ungatantika insita zimwi zino wakanyile ukucitako vimwi vino auzo yakupatikizye ukuti ucite?—Loma 12:2.. ․․․․․

I vyani vino ukulonda ukulacita ivingakwazwa ukutwalilila ukutemwa sana Yeova?—Yuda 20, 21.. ․․․․․

Uzye ungatwalilila ukuombela Yeova na lino avyazi alino naya cuza yako iyata ukumuombela?—Mateo 10:36, 37.

□ Ee □ Awe

[Cikope pifwa 310]

Ulubatizyo nalo kwene lwaya wa cupo, lukasenula ivintu umu umi nupya ulinzile ukulucindika