Nomba, u mulandu ci uno Satana ni viwa iikalila sile ukusomba antu? Pano yakalonda ukuti nafwe kwene tuye yacipondoka. Yakalonda ukuti a yano twapepa nu ukuti twazumila ufi wao nu kucita ivintu vino Leza wapata. Pa vintu vino Leza wapata paya ni ntambi pa vya yafwe.

Umuntu uno twatemwa ndi wafwa, cikatuwaya sana, kupya caya sile ningo ukulosya. Lino Lazalo wafwile, Yesu ‘walukwisye ivilamba.’—Yoane 11:35.

Umunsi yonsi mwaya intambi izipusane-pusane zino antu yakacita umuntu ndi wafwa. Intambi zimwi zisyatama masunde muli Baibolo. Nomba zimwi zyene, zikalanga ukuti afwe yakatwalilila ukuya nu umi, nu kuti afwe yakalola vino apuma yakacita. Citaziipa ukufuvya utulo pa ndosya ku mulandu ni ntambi, nanti ukuloosya ukucizya umu cipimo, kupya citaziipa kucita icililo kwati a pa ma liila, pano ukucita vii kukalanga ukuti mukatiina afwe. Afwe ‘yatamanya nanti cimwi,’ fwandi yonsi aakacita vii yakatungilila Satana nu usomvi wakwe.—Lukala Milandu 9:5.

 Lyene intambi zyunze, na vino yakacita pa ndosya, vikacitika apa mulandu wa kuti antu yamwi yazumila ukuti afwe yakalondeka ukuyasakamala, nu kuti ndi mutakulanga umucinzi uku yafwe, yangasoka. Ku mpanga zimwi, yakakwata ipumpo [nanti ulupupo] ndi papita amanda 40 nanti umwaka onga ukufuma pano umwi wafwilile. Aineco yakati kuli kwazwa umufwe pa kuti asanguke umupasi. Kuze nako yatemwa ukutwala ivyakulya nu wengwa uku malindi pa kuti umufwe atemwe.

Ivintu vii, i vipe, pano vikatungilila usomvi wakwe Satana uwakuti afwe apuma. Uzye Yeova angatemwa nga tukucita intambi izikafuma ukuvisambilizyo vya viwa? Atanga ezye!—2 Kolinto 6:14-18.

Aomvi yakwe Leza wa cumi yasyacitako intambi izikatungilila usomvi wakwe Satana. Yene yasumba sana mano uku kwavwa apuma nu kuyakomelezya. Yamanya ukuti umuntu  ndi wafwa, ala casila, a Yeova sile aangamututulula.—Jobo 14:14, 15.

Antu yamwi yakalonda ukulanzyanya ni viwa aineco, nandi ukupitila muli yasing’anga. Konsi kuu, u kuvwana ni viwa. Uwanga, maleele, kusoowela ivya masyuko, kuuzya mauzyo uku yafwe, na vyo kwene vii u kuuvwana ni viwa.

Baibolo yalesya ukucita vii, yene ikati: ‘Mutaca muzanwe umwi muli mwemwe. . .wino akasapola, wa malele, nanti wensi aakaiilula, nanti umulozi, nanti wensi aakavina, nanti wensi aakauvwana ni mipasi, nanti kasowela, nanti wensi wino akauzya uku yafwe. Pano wensi wino akacita ivintu vii, u wa winyi kuli Yeova.’—Amalango 18:10-12.

Ngu mulandu ci uno Yeova akatulesezya vyonsi vii?

 Yeova akatulesya kucita ivya mipasi pano akalonda twaikala ningo. Wene watemwa antu kupya akayasakamala, nupya wamanya ukuti yonsi aakakonkelela ivya viwa, yalacula.

Umuntu umwi uwacuzile vii, a Nilda kasapola waku Brazil. Iviwa vyamucuzyanga wakwe cimwi. Walanzile ati: “Nawililwe. . .ni mipasi, nupya yantungululanga. Limwi-limwi nafwanga icipafi, nanti ukuta ukwelenganya ningo. Iviwa vyancuzyanga cuze icakuti nu wazi watanga nu kupita ningo umu mwili. Natandike ukumwa imilembo ipe nu kumwa sana uwengwa alino nu kupeepa fwaka. Uwavya uu watwalilile pa myaka iingi sana.”

Lino papisile manda, Yeova naya Nte yakwe yamwazwizye Nilda icakuti ni viwa vyatiile ukumucuzya, lyene akaikala ningo sana. Walanzile ati: “Nkukomelezya yonsi ukuti kusi kwezya nanti panono ukucita ivya mipasi [ipe].”