NOWA wakweti umuci na ana yatatu. Amaziina yayana yakwe aeya, Syemu, Hamu na Yafeti. Nupya, cila mwana wakweti umuci. Fwandi yonsi pamwi umu lupwa lwakwe Nowa yaali 8.

Lyene Leza waneenyile Nowa ukucita icintu cimwi cino Nowa atatazile aelenganyepo. Wamuneenyile ukupanga iciwato icikulu sana. Iciwato cii cali icikulu wakwe vino isitima lya pa manzi lyakula, nomba, calolekanga wa cimbokosi icikulu, alino icitali. Leza waneenyile Nowa ati: ‘Paanga icange [iciwato] ica ntunti zitatu nupya upange ni miputule umukasi.’ Kwali miputule iya kwikalamo ulupwa lwakwe Nowa, ni ya kusungilamo inyama, alino nu kwa kusungila ivyakulya ivyalondekwanga.

Nakupya, Leza waneenyile Nowa ukumatilila ningo iciwato pakuti amanzi yataca ingile umukasi. Lyene Leza walanzile ati: ‘Indi nu kuleta mulamba mukalamba nu konoona insi yonsi. Wensi aatalaya umu ciwato alafwa.’

Nowa na ana yakwe yuvwilile vino Yeova wayaneenyile nu kutandika ukukuula iciwato. Nomba antu yauze yene yasekanga sile. Yatwalilile ni vicitwa vyao iviipe. Pataali nanti umwi uwazumiile vino Nowa wayaneenanga pali vino Leza wali nu kucita.

Casenzile insita itali apa kupanga iciwato, pano caali icikulu sana. Lino papisile imyaka iingi, umulimo wa kupanga iciwato wasusile iusila. Lyene Leza waneenyile Nowa ukwingizya inyama umu ciwato. Leza walanzile ukuti Nowa aingizya inyama zya misango imwi zili-zili, iyakalume ni yakaci. Nomba, imisango yanyama zyuze, Leza waneenyile Nowa ukuti aazingizya cinimbali (7). Nakupya, wamuneenyile ukwingizya ivyunyi vya misango yonsi. Nowa wacisile vyonsi vino Leza wamuneenyile.

Lino yaamazile ukwingizya vyonsi, Nowa nu lupwa lwakwe nayo ingiile umu ciwato. Lyene Leza wayazile icisaasa. Alino Nowa nu lupwa, yaatandiike ukuloleela ivyali nu kucitika ala yali umu ciwato. Elenganya ukuti naawe uli umu ciwato, ukuloleela. Uzye i cumicumi mulamba wali nu kwiza, wakwe vino Leza walanzile?