LOLA lyene ivikucitika paa. Adam na Eva yayazinga ukufuma umu calo icisuma ica Edeni. Uzye watuumanya icalenga kuti yayazinge?

Pano yaacisile cintu cimwi iciipe sana. Lyene nawe Yeova akuyafulula. Nomba uzye watuumanya icintu iciipe cino Adamu na Eva yaacisile?

Yaacisile vino Leza wayaneenyile ukuti yatafwile ukucita. Leza wayaneenyile ukuti yaalya ivizao vya miti iyali umu calo. Nomba kwali umuti onga uno Leza watiile yatafwile ukulya, pano nga yalya, yalafwa. Umuti uwo waali u wakwe Leza sile. Nupya twamanya ukuti i ciipe ukutoola ivintu vyaeneco, asi avivyo? Nomba uzye watuumanya ivyacitike?

Wanda umwi, lino Eva wali wenga umu calo, kwali inzoka iyamuvwanzizye. Celenganye cico, inzoka ukuvwanga! Inzoka iyo yaneenyile Eva ukulya ivizao vya muti uno Leza wayalesizye. Nomba lino Yeova wapanzile inzoka, ataazipanzile ukuti zyavwanga. Fwandi kwali sile umwi uwalenzile ukuti inzoka ivwange. Nga wiyo kwene a weni?

Asi Adamu foo. Fwandi afwile a umwi pali yaaya yano Yeova wapanzile ala atatala wapanga insi. Antu yaayo aangeli, nupya tutanga tuyalole. Mungeli wenga wakweti cilumba. Watandike ukwelenganya ukuti nawe angaya kateeka wako vino Leza waya. Nakupya, walondanga ukuti yamuvwila ukucila ukuvwila Yeova. Ali mungeli uwalenzile ukuti inzoka ivwange.

Mungeli wii wasomvile Eva. Lino wamuneenyile ukuti ndi walya icizao, alaya wakwe Leza, Eva uvwilile. Waliile icizao, alino na Adamu kwene aiza alya. Adamu na Eva yatuvwilile Leza, na cii calenzile ukuti yayazinge ukufuma umu calo icisuma muno ikalanga.

Nomba, wanda umwi Leza alaziifya insi yonsi pakuti ikaziipe wakwe vino icalo ca Edeni caali. Uku nkoleelo tulasambilila vino naawe kwene ungazwilizyako ukuziifya insi. Nomba, leka tulole ivyacitikiile Adamu na Eva..