ANTU aataali umu ciwato yatwalilile ukucita vivikwene vino yacitanga lyonsi. Nalyo kwene yataazumiile ukuti mulamba wali nu kwiza. Yafwile yasesile sana lino yaweni Nowa wingila umu ciwato. Nomba yataatwaliliile ukuseka.

Lyene umu kupumikizya, imvula yatandike ukutoonya. Yatoonyanga iingi ngati umwi akwitulula manzi ukufuma umu mbeketi. Fwandi vino Nowa walandanga vyali ivya cumi! Nomba, kutaali uwali nu kwingila umu ciwato pano ala iyacelwa mpiti. Yeova u wayazile icisaasa nu kufungako.

Pa nsita sile inoono amanzi yavimbilikizye umusili. Manzi yatandiike ukuloleka wa nguzi izikulu. Mulamba kwene wii wawisiizye imiti nupya wakunkulwisye ni vimawe ivikulu, nu kupanga sana icongo. Antu yuvwile intete sana. Yaakwezile apa milundu. Yafwile yalangulwike sana ukuti fwandi nga yuvwilile Nowa nu kwingila umu ciwato lino icisaasa citatala cayalika! Nomba ala iyacelwa mpiti.

Manzi yatwalilile sile ukuvulilako. Imvula yatoonyizye amanda 40 musanya nu usiku. Mulamba wavuzile cuze, nupya pa nsita sile inoono wavimbilikizye ni myamba iitali sana. Wakwe vino Leza walanzile, inyama na antu yonsi aataali umu ciwato yaafwile. Nomba, yonsi aali umu ciwato yaapuswike.

Nowa na ana yakwe yaacisile ningo sana ukupanga iciwato. Amanzi yakatwisye iciwato apapela, icitandika nu kweleela. Lyene wanda umwi, lino imvula yaputwike, kasanya kawazile. Kwalolike ningo sana! Kwali sile ciyemba konsi-konsi. Cintu conga sile icalolekanga, i ciwato iceleelanga apa manzi.

Ivipombolo vyalovile. Vitaali nu kuyako nupya pa kuti vyacuzya antu. Vyonsi kwene vyafwile, kumwi na yanyina alino na antu yonsi aipe. Nomba, uzye i cani icacitikiile yaisi ya vipombolo?

Yaisi ya vipombolo yataali antunze wakwe sweswe. Yaali aangeli aizile ukufuma ukwiyulu nu kwizaikala pano nsi wa yantunze. Fwandi lino mulamba wizile, yataafwilile pamwi na antunze. Yazuuzile imili ya untunze ino yaipangiile nu kuswilila ukwiyulu wa yangeli. Nomba, yataayazumiliizye ukuyaikala pamwi nu lupwa lwa yangeli yakwe Leza. Lyene izile iyaya angeli yakwe Satana. Muli Baibo yaka-amwa ukuti iviwa.

Leza wakatwisye icimuza, avino na mulamba watandike ukukama. Lino papisile imyezi isano (5) iciwato caiile iciikala apa mwamba. Lino papisile amanda aingi, antu aali umu ciwato yaatandiike ukulola imyamba. Amanzi yaatwaliliile ukukama.

Lyene Nowa watumile icunyi citifi cino yakati mwankole ukufuma umu ciwato. Cacitanga akula capapuka kasita sile akanoono iciwela, pano citazananga incende isuma pano cingawila. Catwalilile ukucita vivyokwene, nupya lyonsi kwene ndi cawela cikalanga apa wato.

Nowa walondanga ukumanya ndi cakuti amanzi yaakamile, lyene fwandi watumile inkunda ukufuma umu ciwato. Nomba, inkunda nayo kwene yawezile pano itaazanyile icifulo apa kwikala. Nowa watumile inkunda umuku wakwe ciili, nupya yaleesile ifwa lya muolivi uku mulomo. Lyene Nowa wamanyile ukuti amanzi yatiyaceepa. Nowa watumile inkunda umuku wakwe citatu; muku uu wene, yaiile izana apakwikala apuume.

Lyene Leza walanzile kuli Nowa. Wamuneenyile ati: ‘Fuma umu ciwato. Ufume nu lupwa lwako pamwi ni inyama kwene.’ Antu ni inyama iikazile umu ciwato ukucila umwaka onga utuntulu. Fwandi tungati antu yaatemilwe cuze ukufuma umu ciwato ala apuma!