UZYE watuulola vino Abulaamu akucita paa? Ali nu mupeni, nupya cikuloleka ngati amakoma umwana wakwe. U mulandu ci uno angacitila icintu ca musango uu? Ica kutandikilako, leka tulole vino caali pakuti Abulaamu na Sala yakwate umwana.

Iusya ukuti Leza walavile Abulaamu na Sala ukuti yaali nu kukwata umwana. Nomba icintu cii calolekanga kwati citanga cicitike, pano Abulaamu na Sala yaali akote sana. Abulaamu wazumiile ukuti Leza angacita icintu icikuloleka ngati citanga cicitike. Uzye lyene icacitiike i cani?

Ukufuma pano Leza walaiile Abulaamu, papisile umwaka upuma. Lyene, lino Abulaamu wali ni myaka 100 na Sala ala ali ni myaka 90, izile iyakwata umwana umulumendo iyamutemela ni ziina lyakuti Isaki. Fwandi Leza wasunzile ulayo!

Nomba lino Isaki wakuzile, Yeova wezizye Abulaamu ukulola ndi cakuti waali nu utailo. Leza wamwamile ati: ‘Abulaamu!’ Na Abulaamu waswike ati: ‘Indi pano!’ Lyene Leza walanzile ati: ‘Senda umwana wako, wenga mpo wino wakwata, Isaki, uye nawe uku mwamba uno namakulanga. Ndi wafika kuuku, ukome umwana wako nu kumupeela impolelwa.’

Amazwi kwene yaa yaalenzile Abulaamu ukuya sana nu ulanda, pano watemilwe sana umwana wakwe. Nupya iusya ukuti, Leza walavile Abulaamu ukuti ana yakwe yaali nu kwikala umu mpanga ya Kenani. Nomba uzye cico cali nu kucitika uli ndi cakuti Isaki wafwile? Abulaamu wafizilwe ukuvwikisya, nomba uvwilile Leza.

Lino wafisile uku mwamba, Abulaamu wanyefile Isaki nu kumulalika pa ulambo uno wakuuzile. Lyene Abulaamu watoozile umupeni ukuti akome umwana wakwe. Nomba apa nsita kwene iiya, umungeli wakwe Leza wamwamile ati: ‘Abulaamu!’ Na Abulaamu aasuka ati: ‘Indi pano!’

Leza walanzile ati: ‘Utacisa umulumendo nanti ukumucitila cimwi ciipe. Lyene namanya ukuti wantaila, pano utakaanyile ukumpeela umwanako wino wakwata wenga mpo.’

Abulaamu wataile sana Leza! Wazumile ukuti pasi cino Yeova angafilwa, nu kuti Yeova angatuutulula Isaki. Nomba, kutaali ukulonda kwakwe Leza ukuti Abulaamu akome Isaki. Fwandi Leza walenzile ukuti imfwele ilemye apa vimpuza ivyali apiipi, nupya waneenyile Abulaamu ukuti apeele imfwele kwene iiya impolelwa asi umwanakwe foo.