LOLA vino umulumendo wii ali nu ulanda. Mulumendo wii a Yosefu. Yasilenzi iyamukazya uku yantu aakuya uku Eguputo. Yosefu alaya akaye umuzya. Ngu mulandu ci uno aina yakwe yakucitila icintu iciipe vii? Pano Yosefu yakamuvwila uzuwa.

Isi, Yakobo watemilwe sana Yosefu. Wamutemwisizye ukucila yasilenzi, acino wamupangiile ikoti ilisuma ilitali. Lino aina yakwe Yosefu 10 yaaweni ukuti Yakobo wamutemilwe sana kuluta aliyo, yaatandike ukumuvwila uzuwa nu kumupata. Nomba, kwali na cuze icalenzile ukuti yamupate.

Yosefu waloosile iviloto viili. Umu viloto vyonsi vyoili vino Yosefu waloosile, aina yakwe yamufukamilanga. Lino Yosefu waneenyile aina yakwe iviloto vii, calenzile ukuti yamupatileko sana.

Lyene uwanda umwi Yakobo atuma Yosefu ukuyalola yasilenzi lino yakucema imfwele zyakwe isi. Lino yasilenzi yalola Yosefu akwiza, yamwi pali aliyo iyalanda yati: ‘Lekini tumumoole!’ Nomba Lubeni, uwikolo ukuluta yonsi alanda ati: ‘Awe, mutacita vivyo!’ Lyene iyalema Yosefu nu kumusumbila umu ciwiina icakama amanzi. Alino iikala pansi ukuti yapingule vino yamamucita.

Apa nsita ili imwi kwene, aina Isumeli iiza. Yuda aneena aina yakwe ukuti: ‘Lekini tumukazye uku ina Isumeli.’ Nupya vivyo kwene avino yacita. Yakazya Yosefu apa mpiya zyakwe siluva makumi yaili (20). Yaali ni myenzo ipisye nupya yataakweti nu uluse!

Uzye lyene yasilenzi yakwe Yosefu yaali nu kuyalanda yatuuli kuli isi? Yaakomile imbuzi nu kupaka uwazi ukwikoti lisuma lyakwe Yosefu. Lyene yaasenzile ikoti kwene lilyo kuli isi Yakobo nu kuyamuneena yati: ‘Twalombola ikoti lii. Lilolini ndi cakuti ilyakwe Yosefu.’

Yakobo walimanyile ukuti lyali ilyakwe Yosefu. Walizile ati, ‘Ivilyanyi ivikoma Yosefu.’ Vikwene avino aina yakwe Yosefu yaalondanga ukuti isi azumile. Yakobo wali sana nu ulanda. Waloosizye amanda aingi. Nomba Yosefu ataafwile. Leka tulole ivyamucitikiile kuno yaamusenzile.