YOSEFU walondanga ukumanya ndi cakuti yaisilenzi 10 yaatiile imiyele iipe. Acino wayaneenyile ati: ‘Mwemwe nengu. Mwizile uku kulengula impanga itu mulole pano mungiza mwingilile.’

Nayo yaaswike yati: ‘Awe tusi nengu. Sweswe yantu yacumi. Swensi kwene sweswe ina. Swensi pamwi twavilwe 12. Nomba, umwina witu wenga wafwa, alino nkwangu ali na yatata uku mpanga kuno twafuma.’

Yosefu acita ngati atazumiile vino yaamuneena. Ayalila isilenzi Simeoni umu cifungo, nu kuleka aina yauze ukusenda ivyakulya nu kuswilila ukumwao. Nomba, wayaneenyile ati: ‘Lino muliza nupya muce mwize na nkwangu.’

Lino yaaswiliile ukumwao uku Kenani, yaile yaneena isi Yakobo vyonsi ivyacitiike. Yakobo wali sana nu ulanda. Walizile ati: ‘Yosefu wafwa, na Simeoni kwene lyene wafwa. Ntalamuzumilizya ukusenda nkwangu wane Benjamini.’ Nomba, lino ivyakulya vyaceefile, Yakobo wayazumiliizye ukusenda Benjamini uku Eguputo pakuti yakaseende ivyakulya.

Lyene Yosefu walozile aina yakwe yakwiza. Watemilwe sana ukulola umuto Benjamini. Lelo pataali nanti umwi uwamanyile ukuti umonsi kwene wiiya umucindame wali a Yosefu. Lyene Yosefu wezizye aina yakwe 10.

Waneenyile aomvi ukuloongela aina yakwe ivyakulya umu mifuko. Nomba, wapeezile umuomvi umukalamba kapu wakwe siluva ukuti alonge umu mufuko wakwe Benjamini. Lino yonsi yaapisile akatalamukila, Yosefu watumile aomvi yakwe ukuyakonka. Lino yaayazanyile, aomvi yaaneenyile aina yakwe Yosefu yati: ‘U mulandu ci uno mwasendela kapu wakwe siluva wino sikulu witu akaomvya?’

Yonsi kwene yakaana yati: ‘Tutivile kapu wino mukulandapo. Ndi cakuti mwazana umwi pali sweswe ali na kapu wiyo, mumukome.’

Lyene aomvi yakwe Yosefu yapeketa imifuko yonsi nu kuzana kapu umu mufuko wakwe Benjamini, wakwe vino ukulola apa cikope. Aomvi yati: ‘Mwensi kwene mungapita, nomba Benjamini wene tumaswilila nawe.’ Uzye lyene aina yakwe Benjamini 10 yaacisile uli?

Yonsi kwene yaaswiliile kuli Yosefu pamwi na Benjamini. Yosefu waile aneena aina yakwe ati: ‘Pitangini ukumwinu, nomba Benjamini wene amasyala aye umuomvi wane.’

Nga nawe Yuda avwanga ati: ‘Ndi cakuti naswilila ukumwitu ukwaula Benjamini, yatata yalafwa, pano yaamutemwa sana. Acino fwandi napapaata ukuti musunge nene inje umuomvi winu, nomba Benjamini wene mumute aswilile ukumwitu.’

Lyene Yosefu wamanyile ukuti aina yakwe yaata imiyele iipe. Lyene yaali aantu asuma sana. Leka lyene tulole vino Yosefu wacisile.