LINO Mose waswilile uku Eguputo, waneenyile Aloni umwina wakwe pa vizungusyo vyonsi. Lino Mose na Aloni iizile iyalanga aina Izlaeli ivizungusyo viivi, antu yonsi yaazumile ukuti Leza uwatumile Mose na Aloni.

Lyene Mose na Aloni yaiile uku kulolana na Falao. Yaamuneenyile ukuti: ‘Yeova Leza wa ina Izlaeli walanda wati, “Leka antu yane yapite ulwendo lwa manda yatatu ukuti yakampepe umu lwanga.”’ Nomba Falao waswike ati: ‘Ntaamumanya Yeova wiyo. Nupya ntakuzumilizya ukuti aina Izlaeli yapite.’

Falao wasosile sana, pano antu yalondanga ukusya imilimo pakuti yaye uku kupepa Leza. Acino wayapatikizye ukuombesya sana ukuluta navino yaombanga lyonsi. Aina Izlaeli yasokiile Mose ukuti u walenzile yaayaomvya sana, na cii calenzile Mose ukuya nu ulanda sana. Nomba, Yeova waneenyile Mose ukuti ataasakamala. Yeova walanzile ati: ‘Ndaleka Falao ukuzumilizya antu yane ukupita.’

Nupya kwene Mose na Aloni yaaswilile kuli Falao. Umuku uu wene yaacisile icizungusyo. Aloni wasumvile intuwa yakwe apansi, nayo yasangwike inzoka ikulu sana. Nomba, aonsi yano Falao wamanga ukuti aamano nayokwene yaasumvile apansi intuwa zyao, nazyo izisanguka inzoka. Nomba, lola icikucitika paa! Inzoka yakwe Aloni ikumila inzoka zya yantu yakwe Falao. Nupya kwene Falao asikulonda ukuzumilizya aina Izlaeli ukupita.

Lyene insita yafisile iyakuti Yeova asambizye Falao. Uzye watuumanya vino wacisile? Leza waleesile ivinkunka 10 pa ina Eguputo.

Lyonsi lino icinkunka cacitika, Falao watumanga yamwi ukuya-ama Mose, nu kumuneena ati: ‘Lesya icinkunka, namamuzumilizya ukupita.’ Nomba, lyonsi lino icinkunka casila, Falao wasenukanga. Ataazumilizyanga antu ukupita. Lelo, lino icinkunka ca kusyalikizya cacitiike, Falao wazumilizye aina Izlaeli ukupita.

Uzye watuumanya ivinkunka kwene vii 10 ivyacitiike? Leka tulole apifwa ililondeliilepo pakuti tusambilile pa vinkunka vii.