LOLA Mose pa cikope akuutuka ukufuma uku Eguputo. Uzye watuulola aonsi aakumuzinganya? Uzye watuumanya cino yakulondela ukumumoola? Leka tulole icalenzile.

Mose wakuliile umu ng’anda yakwe Falao, umwene wa Eguputo. Wizile aya umonsi uwa mano sana nupya umucindame. Mose wamanyile ukuti ataali umwina Eguputo, wamanyile ukuti yaisi na yanyina yaali aina Izlaeli.

Wanda umwi lino Mose wali ni myaka iyakuvyalwa 40, waile umukulola vino aina yakwe yaombanga. Wazanyile ala aina Eguputo yakucuzya sana aina yakwe. Waweni umwina Eguputo akuuma umwina Izlaeli. Mose wacelike konsi-konsi, ukuti alole ndi kwali umwi; lino waweni ukuti kuusi nanti umwi, walemile umwina Eguputo nu kumutama icipisye cakuti afwa nu kufwa. Lyene Mose atoola umuntu wiyo nu kumuziika umu mucanga.

Nupya, uwanda uwakonsilepo waswilile umu kulola aina yakwe. Welenganyanga ukuti angayavwa ukuyakulula uku uzya. Nomba, Mose waweni aina Izlaeli yaili ala yakulwa, lyene waneenyile uwaluvinye ati: ‘I cani cino ukuumila umunyonko?’

Umonsi wiyo walanzile ati: ‘A weni uwakusonta ukututeeka nu kutupingula? Uzye ukulonda ungumoole wakwe vino umoozile umwina Eguputo?’

Lyene Mose uvwile intete. Wamanyile ukuti antu yati-yamanya vino wacisile uku mwina Eguputo. Na Falao kwene wamanyile, nupya watumile aonsi ukuti yakumoole Mose. I calenzile Mose ukupuuka ukufuma umu Eguputo.

Lino Mose wafumile umu Eguputo, waiile uku mpanga ya kutali sana iya Midyani. Lino wafisile kuuku, waiile atandika ukwikala nu lupwa lwakwe Yetulo, nupya watwazile mwana Yetulo uwiziina lyakuti Zipola. Mose watandike umulimo wa kucema imfwele zyakwe Yetulo. Wateenzi uku mpanga ya Midyani pa myaka 40. Lyene apa nsita ii wali ni myaka iya kuvyalwa 80. Lyene wanda umwi lino Mose wacemanga imfwele zyakwe Yetulo, icintu cimwi icakuzungusya cacitiike icalenzile ukuti Mose atandike ukuomba umulimo uze ukome. Lola apifwa ililondeliilepo pakuti ulole icintu kwene cii icakuzungusya..