MOSE waiile ni mfwele uku mwamba wa Holebu uku kuzilondela umulemvwe. Lino wafisile kuuku, waweni icimpuza cikwaka umoto, nomba, citaapyanga!

Mose welenginye ati: ‘Ntaatala nalola icintu ca musango uu. Namapalama apiipi pakuti ndole ningo icikucitika.’ Lino wapaliime, uvwile izwi ukufuma umu cimpuza, iliti: ‘Imilila papokwene. Zula indyatu, pano incende ino uimipo i ya muzilo.’ Leza aliwe wavwanzyanga Mose ukupitila umu mungeli, lyene lino Mose uvwile vivyo, wavimvile apa manso.

Lyene Leza walanzile ati: ‘Natindola ukucula kwa yantu yane umu Eguputo. Nkulonda ukuyakulula, nupya namatuma wewe kwene ukuti ukatungulule antu yane ukufuma umu Eguputo.’ Yeova wali nu kutungulula antu yakwe uku mpanga isuma cuze iya Kenani.

Nomba Mose walanzile ati: ‘Nene muntu uwasile-sile. Uzye ndaomba ntuuli umulimo kwene uu? Ukuya kwene ningaya uku Eguputo. Nomba aina Izlaeli yalanguzya yati: “A weni uwakutumile ukwiza kuno?” Uzye lyene ndaasuka ntuuli?’

Leza wamuneenyile ati: ‘Vino ulaasuka aevi: “YEOVA Leza wakwe Abulaamu, Leza wakwe Isaki nupya Leza wakwe Yakobo u watantuma.”’ Nupya Yeova walanzile nu kuti: ‘Lii, lili ziina lyane amanda pe.’

Mose waswike ukuti: ‘Nomba, nga ndi cakuti yaaya yakaana ukuzumila vino ndayaneena ukuti wewe wantumile, cilaya uli?’

Lyene Leza uzizye Mose ati: ‘I cani icili umu minwe yako?’

Mose waswike wati: ‘Iintuwa.’

Leza amunena ati: ‘Isumbe pansi.’ Lyene lino Mose wasumvile intuwa pansi, yasangwike inzoka. Alino Yeova walangiizye Mose icizungusyo na cuze. Wamuneenyile ati: ‘Ingizya ikasa umu mwingila uno uzwite.’ Mose wingiizye ikasa lyakwe mu mwingila, nupya lino wafumizye ikasa, lyatandike ukuloleka mpee wa mpemba! Ikasa lyaloliike ngati walwala indwala ipisye ino yakati tembwe. Nupya Leza wapeezile Mose amaka yakucita icipezya mano cakwe citatu. Alino, Leza wamuneenyile ati: ‘Ndi waca wacita ivipezya mano vii, aina Izlaeli yalazumila ukuti nene nakutumile.’

Lino vyonsi kwene vii vyacitiike, Mose waswiliile uku ng’anda nu kuneena Yetulo ati: ‘Nkuleenga ukuti munzumilizye nswilile uku ina yane uku Eguputo nkalole vino yali.’ Lyene Yetulo wapakiisye Mose, avino Mose watandiike nu lwendo ulwa kuswilila uku Eguputo..