PAAPISILE imyaka ingi sana. Ya mwana Nowa yaakweti ana aingi sana. Ana yaayo yakuzile, nayo yaviile ana aingi. Pataalengiile avino na antu yavuzile sana umu nsi.

Umuntu wenga pali yaa, wali a Nimulodi icizikulula cakwe Nowa. Wali umonsi umwipe uwalunganga inyama na antu. Nupya Nimulodi waiisile pa wene ukuti aateeka antu yauze. Leza ataatemilwe Nimulodi.

Antu yonsi pa nsita iiya yavwanganga sile ululimi longa. Nimulodi walondanga ukuti antu yonsi yaikala sile pamwi ukuti aayateeka. Uzye watuumanya vino wacisile? Waneenyile antu ukukuula umusumba ni cilupungu icikulu mwenemo. Lola antu yaayo apa cikope yakutama injelwa.

Yeova Leza ataatemilwe umulimo kwene uu uwakukuula. Leza walondanga ukuti antu yasalangane nu kwikala umu nsi yonsi. Nomba antu yalanzile yati: ‘Izini! Lekini tukuule umusumba nu lupungu ulutali sana pakuti luce lufike umwiyulu. Lyene tulalumbuka sana!’ Antu yalondanga ukucindikwa, asi ukucindika Leza foo.

Lyene Leza walenzile antu ukuta ukukuula ulupungu. Uzye watuumanya vino wacisile? Wavulunginye ululimi lwa yantu iyatandika ukuvwanga indimi izipusane-pusane. Ya kakuula yaatiile ukuuvwana. Ali mulandu uno umusumba wao yatandike ukuwama yakuti, Babeli nanti Babiloni, icikapiliula “icimvulunganya.”

Antu lyene yatandike ukusalangana ukufuma umu Babeli. Antu aavwanganga ululimi ulukolane yaile iyatandika ukwikala pamwi uku ncende zyuze.