IYE kalanda we! Uzye i vyani vino antu yakucita paa? Yakupepa akana ka ng’ombe! U mulandu ci uno yakucitila vii?

Lino Mose waile alengela uku mwamba, antu yaatandike ukulanda yakuti: ‘Tutamanyile ivyati-vicitikila Mose. Fwandi lekini tuipangile leza uwakuti atutungulule ukufuma umu mpanga ii.’

Nga alino Aloni umwina wakwe Mose aiza alanda ati: ‘Icisuma, mpeelini amasikiyo yakwe goldi yano muzwite.’ Lino antu yaacisile vivyo, Aloni wasungulwile amasikiyo kwene yaayo nu kupangilamo akana ka ng’ombe. Nupya antu yalanzile yati: ‘Wii, ali Leza witu, uwatufumizye umu Eguputo!’ Lyene aina Izlaeli yaatandike ukuzevya nu kupepa akana ka ng’ombe.

Lino Yeova waweni vii, wasosile cuze. Lyene waneenyile Mose ati: ‘Pitisya tentemuka umwamba. Vino antu yakucita vitaziifile foo. Yati-ilila amasunde yano nayapiile, lyene iyatandika ukupepa akana ka ng’ombe.’

Mose watentemwike umwamba zuwa-zuwa. Lyene lino wafisile apiipi, vino waweni vitaaziifile. Antu iimbanga nu kucina ala yakuzinguluka akana ka ng’ombe! Mose wasosile sana icakuti wasumvile na mawe yaili apaapatane apaalemvilwe amasunde, na mawe yaayo yaatamoosile iyaya sile utuvungwa. Nga alino atoola akana ka ng’ombe nu kukasungulula. Lyene akasyuta kasanguka usu.

Cino antu yaacisile citaaziifile foo. Acino, Mose waneenyile aonsi yamwi ukutoola impanga. Mose walanzile ati: ‘Antu yonsi aipe aapefile akana ka ng’ombe yumoolwe. Lyene aonsi yaayo aali ni mpanga yumoozile antu 3,000! Cii, cikutulangilila ukuti tufwile ukucenjela sana ukuti twapepa sile Yeova, aasi tu leza twaufi foo, uzye asi avivyo?