UZYE naawe watala walayapo umwi ukuti ulamucitila vimwi alino icikutalila ukucita vino walavile? Vivyo kwene a vino cali uku monsi wii apa cikope, acino akulilila. Umonsi wii a Yefuta, a kapingula umusipe sana uwa Izlaeli.

Yefuta waliko apa nsita lino aina Izlaeli yaatiile ukupepa Yeova. Yaatandike ukucita iviipe. Fwandi acino Yeova walekiile aina Amoni ukuyacimvya. Lyene aina Izlaeli yaatandike ukulilila kuli Yeova yati: ‘Twati twifya kuli wewe. Twapapata tutuule!’

Antu yaa yuvwile uyi pali vino yaacisile. Lyene pa kulanga ukuti yaalapiile, yaatandike nupya ukupepa Yeova. Acino nawe Yeova wayavwizye nupya kwene.

Yefuta a wino antu yaasoolwile ukuya uku kulwisya aina Amoni. Nawe Yefuta walondesyanga ukuti Yeova amwavwe ukucimvya. Acino, walavile Yeova ati: ‘Ngu langavwa ukuti nkacimvye aina Amoni, wensi aalatandikilapo ukufuma umu ng’anda nu kwizankomaanya lino ndaafuma uku kucimvya, a wino ndapeela kuli wewe.’

Nawe Yeova uvwile amazwi yakwe Yefuta, nupya wamwavwizye ukucimvya. Nomba lino Yefuta wawezile uku ng’anda, uzye watuumanya uwatandikiilepo ukufuma umu ng’anda nu kwizamukomaanya? U mwanakwe umukazyana uwavilwe sile wenga. Lyene Yefuta waloosizye ati: ‘Owe mwanane! Wandetela ulanda. Nomba, nalavile Yeova, alino ntanga nsenuke.’

Lino mwana Yefuta wamanyile ukuti avino Yefuta walavile, nawe kwene uvwile ulanda. Pano lyene capiliwile ukuti wali nu kusya isi na nyina na auze. Wali nu kuyaikala amanda yonsi apitenti lya kupepelapo Yeova nu kumuombela kuuku kwene uku Syilo. Waneenyile isi wati: ‘Ndi cakuti avino mwalavile Yeova, mufwile kufikilizya vino mwalavile.’

Acino, mwana Yefuta waile uku Syilo kuno waile aikala manda yonsi ala akuombela sile Yeova apitenti lya kupepelapo. Manda yani cila-mwaka anaci aina Izlaeli yaayanga uku kumulola nu kuyaizya nawe sana. Antu yatemilwe sana umukazyana wii pano wali umuomvi wakwe Yeova umusuma.